Víkurfréttir - 21.06.2012, Blaðsíða 22

22 FIMMTUDAGURINN 21. júNí 2012 • VÍKURFRÉTTIR
Björn Snæ var Björnsson yfirþjálfari Hnefaleikafélags
Reykjaness er þessa dagana staddur
í Las Vegas í Bandaríkjunum
þar sem hann mun æfa í elsta
æfingasal borgarinnar ásamt
reyndum hnefaleikaköppum.
Víkurfréttir litu við á æfingu í
gömlu sundlauginni í Keflavík en
þar var Björn að ljúka við að setja
á sig vafningana.
Björn hefur verið að æfa box í
fimm ár og á að baki 17 bardaga.
Björn hóf að æfa hnefaleika 19 ára
gamall og þá undir handleiðslu
Daða Ástþórssonar sem Björn
segir vera einn færasta þjálfara
landsins. Björn hefur nú tekið við
keflinu af Daða sem yfirþjálfari
Hnefaleikafélags Reykjaness. Björn
sér um það að þjálfa fólk sem
vill ná grunn- og tækniatriðum í
íþróttinni en einnig er hægt að æfa
svokallað fitness-box, þar sem fólk
nýtir hnefaleika sem líkamsrækt.
Einnig þjálfar Björn þá sem vilja ná
langt í hnefaleikum.
Um 40 hnefaleikakappar á öllum
aldri eru undir handleiðslu Björns
um þessar mundir en hann er
nú staddur í Bandaríkjunum
í æfingabúðum eins og áður
segir. Nánar t i l tekið í Las
Vegas í eyðimörkinni í Nevada-
fylki, þar sem margir frægustu
hnefaleikakappar sögunnar hafa
æft og margir stórir bardagar hafa
einnig verið háðir. Þar hyggst
Björn ná sér í reynslu sem hann
mun miðla af sér með iðkendum
hér heima.
Björn segist hafa endað í boxinu
til þess að skora á sjálfan sig. Hann
ætlaði sér í raun aldrei að fara
eitthvað langt í íþróttinni en að
lokum var það svo komið að hann
sá sér ekki fært að hætta að mæta
á æfingar. Það sem heillar Björn
hvað mest við boxið er hversu erfið
íþróttin er. „Maður þarf að vera í
góðu líkamlegu ástandi, hafa góða
færni, gott þol og sprengikraft.
Þetta spilar allt svo vel saman,“
segir Björn. Fyrir honum eru
hnefaleikar eins og skák frekar en
bardagi. Honum finnst krefjandi að
reyna að lesa andstæðinginn.
Í Bandaríkjunum mun Björn
æfa í elsta æfingasal í Las Vegas
borg, Johnny Tocco´s gym, sem
hefur verið starfræktur síðan í
kringum 1950. Þar hafa margir
goðsagnarkenndir kappar æft en
á meðal þeirra eru: Mike Tyson,
Sonny Liston og Larry Holmes. Með
Birni í för verða fleiri Íslendingar,
m.a. Daði Ástþórsson fyrrum
þjálfari hans og Árni Ísaksson
sem er einn fremsti bardagakappi
Íslendinga. „Ég ákvað að stökkva
á þetta tækifæri og fara með,“ en
Björn vonast til þess að fá að reyna
sig í bardögum gegn reyndum
köppum. Tilhlökkunin er mikil og
Björn er afar spenntur. „Á Íslandi
eru ekki það margir í hverjum
þyngdarf lokki og því verður
gaman að fá að takast á við nýja
andstæðinga,“ segir Björn.
Björn er sammála blaðamanni að
því leyti að vinsældir hnefaleika hafa
dalað talsvert á undanförnum árum
enda hafa aðrar bardagaíþróttir
verið á mikilli uppleið. „Ég hef trú
á því að boxið sé aftur á uppleið.
Það eru mikið af bardagaíþróttum
í boði og fólk er að prófa þær. Ég
tel þó að boxið muni alltaf koma
sterkt inn aftur enda rótgróin
íþrótt.“ Til þess að hnefaleikar skipi
sér aftur á fyrri stall telur Björn að
hlúa þurfi að unga fólkinu. Björn
er á því að boxið muni alltaf vera
spennandi kostur þegar ungt fólk
stendur frammi fyrir því að velja
sér íþróttagrein til þess að æfa.
Sama hvort fólk vilji stíga inn í
hringinn eða bara þjálfa og vera
með vinum sínum. Hann segir að
í einstaklingsíþróttum læri maður
að treysta fyrst og fremst á sjálfan
sig.
„Hér hef ég séð unga stráka verða
að mönnum. Það er það sem við
viljum gera hérna. Hjálpa ungum
krökkum að styrkja sig bæði
andlega og líkamlega og þroskast
sem manneskjur. Við þurfum ekki
að búa til neina heimsmeistara til
þess að ná því fram.“ Björn segir
hnefaleika hafa hjálpað honum
mikið í lífinu og mun boxið alltaf
vera til staðar fyrir hann að hans
mati.
Starfsemin er alltaf á fullu í gömlu
sundlauginni í Keflavík en það
hús hefur gengið í endurnýjun
lífdaga eftir að húsinu var breytt í
hnefaleikasal. Nú á næstunni eru
að hefjast grunntækninámskeið
fyrir 16 ára og eldri. Á Ljósanótt
fer svo fram árlegt mót í
Reykjanesbæ. Hnefaleikamenn
á Íslandi hafa átt í góðu
samstarfi við frændur okkar
Dani á undanförnum árum og
hefur Björn fimm sinnum keppt
við danska hnefaleikamenn. Eins
og er er hann undir 3-2 í þeim
viðureignum en hann hefur átt
góðu gengi að fagna í öðrum
bardögum. Á Ljósanótt gæti
farið svo að Danir verði fyrir
barðinu á okkar mönnum
en einnig mæta margir af
fremstu hnefaleikamönnum
landsins til Reykjanesbæjar
á mótið.
En af hverju ætti maður
að prófa boxið?
„Ég get tryggt það að þú sért að
fara að prófa eitthvað sem þú hefur
aldrei gert áður. Það að prófa nýja
hluti er eitthvað sem ég tel að fólk
ætti að gera meira af,“ sagði Björn
að lokum.
Æfir í elsta „gymminu“
í Las Vegas