Húnavaka - 01.05.1979, Side 45

SR. BIRGIR SNÆBJÖRNSSON:
„Aðgát skal höfð
í nærveru sálar“
Fyrir nokkrum árum fór Karlakórinn Geysir í söngferð til Skotlands
og Englands. Eitt af því sem okkur var sýnt i þeirri ferð var hin
heimsfræga leir- og glerverksmiðja Wedgewood. Skoðunin tók langan
tíma og margir hópar voru þarna sömu erinda samtímis okkur. Við
fengum sérstakan leiðsögumann er lýsti gerð listmunanna frá upphafi
til enda, og var það bæði aðdáunarvert og fróðlegt að sjá hve fimlega
þessir munir voru gerðir í höndunum. Margir keyptu sér að lokum
minjagripi og kostuðu þeir ærið fé eins og allt með þessu kunna merki.
Til er lærdómsrík saga um stofnanda þessa fyrirtækis Josiah
Wedgewood, sem, auk þess að vera frábær leirkerasmiður vandur að
verkum sínum, var trúaður, grandvar og góður. Og þar sem ég er viss
um að jafnt yngri sem eldri geta mikið af henni lært, langar mig til
þess að endursegja hana hér lauslega.
Dag nokkurn kom aðalsmaður í verksmiðjuna og herra Wedgewood
bað ungan dreng að sýna gestinum allt sem hann vildi sjá og útskýra
fyrir honum hvernig hlutirnir væru gerðir.
Aðalsmaðurinn var skarpur að viti, en yfirlýstur trúleysingi og
andvaralaus. Á könnunarferðinni var aðalsmaðurinn óspar á blótsyrði
og einnig hæddist hann að mörgu því sem í augum trúaðra var heilagt.
í fyrstu virtist þetta fá á drenginn en áður en varði fór hann að hlæja
að hinum grófu athugasemdum.
Þegar aðalsmaðurinn sneri aftur til skrifstofunnar tók leirkera-
smiðurinn kunni, sem séð hafði hvað fram fór, forkunnarfagran vasa
og útskýrði hversu mikil vinna og snilli byggju þar að baki. Aðals-
maðurinn varð yfir sig hrifinn og falaðist ákveðið eftir listaverkinu. En
þegar Wedgewood rétti vasann fram lét hann þennan dýrmæta hlut
detta bersýnilega af ásettu ráði. Og vasinn fór í hundrað mola.