Húnavaka - 01.05.1979, Qupperneq 91

SIGURÐUR BJÖRNSSON, Örlygsstöðum:
Hofskirkja á Skagaströnd
Þegar ég í þessum þætti tala um kirkju er ekki víst að ég eigi aðeins
við húsið, því skáldið okkar sagði:
„Meistarans höll er sem moldar hrúga.
Musteri Guðs eru hjörtun sem trúa.“
Þannig var högum Hofskirkju háttað á vordögum 1868, að kirkju-
húsið var svo að falli komið að ekki var talið fært að koma þar saman
til messuhalds. Presturinn sr. Magnús Jónsson á förum, búinn að fá
veitingu fyrir Skorrastað í S-Múlasýslu. Enginn umsækjandi var um
Hofsprestakall svo að hingað vantaði bæði prest og kirkju. Þegar
prófasturinn, sr. Jón Þórðarson á Auðkúlu vísiteraði á Hofi vorið 1868
varð hann að ráðstafa rifi og burtflutningi gömlu kirkjunnar og
byggingu þeirrar nýju. Þetta gerði hann á þann hátt að byggja jörðina
Hof Sigurði Helgasyni trésmið frá Auðólfstöðum. Hann tók að sér að
endurbyggja kirkjuna af því efni sem honum yrði til þess fengið.
Skyldi því verki lokið innan tveggja ára. Söfnuði Hofskirkju var gert
að skyldu að fjarlægja gömlu kirkjuna og gera grunn undir þá nýju
sem smíðuð skyldi úr timbri. Fyrir kirkjusmíðið skyldi Sigurður fá
greidda 400 ríkisdali. Nú þurfti að fjarlægja gömlu kirkjuna og annast
alla aðdrætti til þeirrar nýju með þeim tækjum sem þá voru tiltæk,
sem varla hafa verið annað en krókar, kláfar og sleðar. Kerra mun ekki
hafa verið til á þessum dögum. Þetta hefir því tekið mikinn tíma og
ærið erfiði frá öðrum störfum heimilanna. Mættum við, sem nú höfum
not af þessu húsi en höfum litlu fyrir það fórnað, minnast þess „er við
göngum í Guðshús inn“.
Sigurður smiður Helgason stóð vel við alla samninga. Húsið var
komið upp á áramótum 1869 og 70 og vígt til nota fyrsta sunnudag í