Dagblaðið Vísir - DV - 13.07.2011, Blaðsíða 20

20 | Fókus 13. júlí 2011 Miðvikudagur
Kanaríeyja­
flakkarar
skemmta sér
Á hverju ári hittast á annað hundrað
manns og skemmta sér saman í
sveitum landsins. Þessi hópur á það
eitt sameiginlegt að ferðast til
Kanaríeyja á veturna og kalla sig
Kanaríeyjaflakkarana. Í ár hittist
hópurinn í Árnesi helgina 15.–17.
júlí og gerir sér glaðan dag. Hljóm­
sveit Ingvars Hólmgeirssonar mætir
á svæðið ásamt söngkonunni
Kristrúnu Sigurðardóttur. Þá hefur
fyrrverandi landbúnaðarráðherra,
Guðni Ágústsson, einn helsti
Kanaríeyjaflakkari landsins, mætt á
þessar samkomur og skemmt
flökkurunum.
„Það eru allir velkomnir með
nikkurnar sínar,“ segir Guðrún Sig­
urborg Jónasdóttir sem er ein þeirra
sem standa að skemmtuninni í ár.
Þarna er tjaldstæði og sundlaug og
við rifjum upp góðar stundir á Kan­
arí í íslenskri sveit.“
Þjóðfundurinn
endurvakinn
Þ
ann 17. júní síðastliðinn
héldu Íslendingar upp á 200
ára afmæli Jóns Sigurðsson­
ar. Í tilefni þess setti afmæl­
isnefnd Jóns Sigurðssonar
upp í Menntaskólanum í Reykjavík
sýningarnar Alþingi á sal Lærða skól­
ans og Jón Sigurðsson og Reykjavík.
Í hátíðarsal skólans má sjá uppstill­
ingu af þjóðfundinum fræga en að­
setur Alþingis var í MR frá 1845 til
1881, frá því Alþingi var endurreist
þar til alþingishúsið var byggt.
Upplýsingar um „óskabarn Ís­
lands, sóma þess, sverð og skjöld“eins
og stendur á kistu þjóðhetjunnar, má
finna í nærliggjandi stofum við há­
tíðarsalinn. Leiðsögumenn taka á
móti gestum og svara spurningum,
klædd í 19. aldar skrúða. Sýningin er
opin alla daga vikunnar frá 13 til 17
og stendur til 18. ágúst.
Þjóðfundurinn og sjálfstæðis-
baráttan
Blaðamaður ræddi við þau Ragnhildi
Ástu Valsdóttur og Elías Bjart Einars­
son, safnverði og leiðsögumenn á
sýningunni og jafnframt nemend­
ur í skólanum; Ragnhildur að byrja
þriðja árið og Elías verður stúdent
næsta vor ef allt gengur vel.
„Við tökum á móti gestum og svör­
um spurningum þeirra og kynnum
sýninguna eftir bestu getu. Segjum
fólki frá endurreisn Alþingis og líka
frá ævi og störfum Jóns Sigurðsson­
ar,“ segir Ragnhildur og Elías bætir
við: „Það má heldur ekki gleyma sög­
unni um sjálfstæðisbaráttu okkar Ís­
lendinga og þróun Reykjavíkur frá
því að vera smáþorp og til þess að
verða höfuðborg.“
Á sýningunni gefur að líta spjöld
með upplýsingum um stjórnmála­
sögu Íslands og hvaða mál voru til
umræðu á 19. öld, sem og hvaða
hlutverki þjóðfundurinn og endur­
reisn Alþingis gegna í sögu Íslands.
Þau Ragnhildur og Elías segja
að sýningin sé aðgengileg fyrir alla,
þannig að hún nýtist bæði þeim sem
lítið vita um Jón forseta og einnig
þeim sem vita mikið um hann.
„Mjög margir sem koma vita lít­
ið um Jón Sigurðsson og sögu hans,“
segir Ragnhildur.
„Spurningarnar sem við fáum eru
margar og mismunandi og líka und­
arlegar og ítarlegar, ég hef til dæmis
verið spurður um það hvenær síðast
hafi verið skipt um ljós í hátíðarsaln­
um,“ segir Elías með bros á vör.
Forsetinn eilífi
En hver var þá Jón Sigurðsson og
hvernig maður var hann? Elías segir
Jón forseta hafa verið ótrúlega fram­
úrstefnulegan.
„Menn gleyma því stundum í
dag hversu framsýnn hann var og
skemmtilegur og um leið ofsalega
kræfur gagnvart danska konungs­
valdinu. Svo var hann líka mikill
persónuleiki en barátta hans gekk að
miklu leyti út á það að skýra stöðugt
mál sitt með föstum rökum.“
Ragnhildur bætir því við að Jón
hafi farið vestur í Arnarfjörð, þar sem
hann fæddist, og talað við bændur
og búalið þar og spurt hvaða mál þau
vildu að yrðu upp tekin á Alþingi.
„Svo sendi hann þessu fólki
skýrslur um gang mála. Hann veitti
upplýsingar um þingstörfin og það
var náttúrulega algjör nýjung í sam­
bandi Alþingis og alþýðu. Þessar
aðferðir og rökfræði hans voru ein­
kennandi fyrir upplýsingastefnuna,
sem hafði mjög mikil áhrif á Jón.“
Það er athyglisvert hversu margar
ljósmyndir eru til af Jóni forseta. Þau
Ragnhildur og Elías telja að hann hafi
lagt upp úr því að láta taka myndir af
sér í Danmörku og senda heim til Ís­
lands. Þetta var hluti af ímynd hans
sem leiðtoga. Ragnhildur bendir líka
á að Jón hafi passað mjög vel upp á
öll skjöl sín, bókhald og bréf.
„Það eru til kvittanir fyrir alls kyns
smáhlutum eins og kaupum hans á
vindlum og sígarettum. Það er því
auðvelt að kíkja inn í líf mannsins.“
Um helgar halda leiðsögumenn­
irnir stundum niður í bæ í fullum
skrúða til að ræða við fólk og kynna
sýninguna fyrir erlendum ferða­
mönnum og líka þeim Íslendingum
sem eiga leið um miðbæinn. Síðan er
lifandi tónlist í salnum en við opnun
sýningarinnar var stutt leikverk flutt
um ævi Jóns.
Ragnhildur Ásta Valsdóttir og Elías
Bjartur Einarsson, safnverðir og
leiðsögumenn á sýningunni Á sýning-
unni gefur að líta spjöld með upplýsingum
um stjórnmálasögu Íslands og hvaða mál
voru til umræðu hér á 19. öld, sem og hvaða
hlutverki þjóðfundurinn og endurreisn
Alþingis gegna í sögu Íslands.
Tinni kemur í ljós
Aðdáendur Tinna reyna að halda
ró sinni meðan þeir bíða stór­
myndarinnar The Adventures of
Tintin: The Secret of the Unicorn
en myndin verður jólamynd kvik­
myndahúsanna í ár. Í nýrri stiklu á
veraldarvefnum má sjá útlit Tinna
og Kolbeins kafteins og heildarútlit
myndarinnar.
Myndin verður sýnd í þrívídd.
Jamie Bell (Billy Elliott) leikur Tinna
og Daniel Craig fer með hlutverk
hins dimmraddaða Kolbeins kaft­
eins.
Myndin er tekin upp með leik­
urum í kvikmyndasetti en síðan er
teiknað ofan á leikarana til að gefa
persónunum það útlit sem Hergé
gaf þeim. Steven Spielberg leik­
stýrir myndinni og Peter Jackson og
Kathleen Kennedy framleiða.
Af stiklunum að dæma hefur
þetta tekist merkilega vel en dæmi
hver um sig með því að sækja heim
vefsíðu myndarinnar á tintin.com.
Sruli Recht í
sviðsljósinu
Viðamikil umfjöllun um hönnuð­
inn Sruli Recht birtist í veftímaritinu
Yatzer í vikunni.
Yatzer er virtur vefur sem fjallar
um hönnun, arkitektúr og tísku.
Veftímaritið fjallar um nýja línu
Srulis sem kallast: By the waves, by
the tides en í henni sækir Sruli inn­
blástur í íslenska náttúru og stemn­
ingu.
Myndir Marínós Thorlacius af
línu hans njóta sín vel á vefsíðu
Yatzer.com og birtist fjöldi mynda af
fatnaðinum.
Stokkseyringar boða til Bryggju­
hátíðar í áttunda sinn og verður
fjölbreytt dagskrá frá fimmtudags­
kvöldinu 14. júlí til síðdegis sunnu­
daginn 17. júlí. Á fimmtudaginn
kemur út heyannablaðið Séð og
jarmað sem helgað er Bryggjuhá­
tíðinni.
Hápunktur hátíðarinnar verð­
ur á föstudagskvöldinu þegar fjöl­
skylduskemmtun verður á Stokks­
eyrarbryggju. Eyþór Arnalds,
formaður bæjarráðs Árborgar, set­
ur hátíðina kl. 20. Björgvin Franz
skemmtir. Árni Johnsen stjórnar
bryggjusöng við varðeld, eins og
hann hefur gert á öllum hátíðun­
um. Hljómsveitin Granít frá Vík í
Mýrdal verður með Bryggjuball og
söngkonan Hlín Pétursdóttir frá
Stokkseyri syngur með henni.
Á laugardeginum verða síðan
Stokkseyrarleikar á íþróttavellin­
um við sundlaugina en þá koma
íbúar þorpsins saman, klædd­
ir skrautklæðum hverfa sinna, til
keppni og leikja. Á sunnudeginum
verður síðan hátíð hestamanna
með hópreið og hestamannaleikj­
um.
Samkomuhúsið Gimli á Stokks­
eyri verður 90 ára á þessu ári og er
því fagnað með málverkasýningu
Péturs Behrens og tvennum tón­
leikum í Gimli.
Alla dagana verða söfn og sýn­
ingar á Stokkseyri opin og þjónusta
og afþreying aðgengileg.
Hátíðin hefur sem fyrr undirtitil­
inn Brú til brottfluttra og fjölmenna
brottfluttir á Stokkseyri ásamt Sunn­
lendingum og gestum víðar að.
Það er Hrútavinafélagið Örv­
ar á Suðurlandi sem stendur fyrir
Bryggjuhátíðinni í samvinnuverk­
efni heimaaðila og fleiri vina.
Dagskrá hátíðarinnar í heild og
fréttir af undirbúningi og mannlífi
á Stokkseyri má sjá á stokkseyri.is.
Séð og jarmað Hlín Pétursdóttir, söngkona á Stokkseyri, skoðar hér eintak af Séð og
jarmað. Grétar Zóphoníasson fyrrverandi bæjarstjóri á Stokkseyri fylgist með. Hlín mun
stíga á svið með hljómsveitinni Granít úr Vík í Mýrdal á Bryggjuhátíðinni.
Mikið um að vera á Bryggjuhátíð á Stokkseyri:
Gefa út blaðið Séð og jarmað
Þórður Ingi Jónsson
blaðamaður skrifar