Lögmannablaðið - 01.10.2010, Blaðsíða 9
LÖGMANNABLAÐIÐ – 3 / 2010 > 9
Sigríður Kristinsdóttir hdl. hjá
Regula lögmannsstofu hefur starfað
á Höfn í Hornafirði í 21 ár.
„Ég kom hingað strax eftir útskrift úr
lagadeild árið 1989 en hafði unnið með
náminu hjá sýslumanninum í Reykjavík
og Hafnarfirði. Það var engin staða laus
hjá sýslumanninum á Höfn svo ég
stofnaði lögfræðistofu.“
Var ekki svolítið mál að stofna
lögfræðistofu nýútskrifuð?
„Maður er svo áræðinn þegar maður er
ungur. Ég fékk gamalt skrifborð frá
pabba, ritvél, síma og tölvu. Svo hóf ég
störf. Það var uppgangur á Hornafirði
og ég fékkst aðallega við fasteignasölu
og skjalagerð í upphafi en ég náði mér
síðan í réttindi sem löggiltur fasteigna
sali. Svo tók sveitarfélagið vel á móti
mér og keypti strax þjónustu. Ég var
hins vegar ekki með neitt bakland að
öðru leyti en því að ég átti frænda í
lögmennsku sem ég gat hringt í þegar á
þurfti. Ég var ekki með stofu árin 1990
1994 þegar ég starfaði hjá sýslumann
inum á Höfn en þá hóf ég störf sem
lögmaður á eigin lögmannsstofu. Hana
rak ég þar til við tókum okkur til, þrír
einyrkjar á Höfn, Egilsstöðum og
Húsavík, og stofnuðum lögmanns
stofuna Regula árið 2003.“
Hvernig kom það til að þið
stofnuðuð lögmannsstofu með
starfsstöðvar á þremur stöðum á
landinu?
„Það er einmana að vera einyrki og við
vorum öll komin í þá stöðu að vanta
faglegan stuðning. Árið 2003 urðu
tæknilegar breytingar þannig að við
gátum unnið á sama „server“ og með
sameiginlegt símkerfi, ég hér á Höfn,
Berglind Svavarsdóttir á Húsavík og
Hilmar Gunnlaugsson á Egilsstöðum.“
Breytti þetta miklu?
„Já, mér fannst ég vera komin í nýja
vinnu. Stofan hefur gengið mjög vel og
stækkað en nú eru sex lögmenn
eigendur að Regula og við komin með
starfsstöð í Reykjavík. Öll innheimtumál
fóru til mín þar sem ég var með stærstu
innheimtuna fyrir en svo hafa komið
stærri verkefni til stofunnar sem hefðu
ekki komið til mín sem einyrkja á Höfn.
Það er mikil áskorun.“
Eru verkefni þín annars konar en
lögmanna sem starfa á
höfuðborgarsvæðinu?
„Mín verkefni þróuðust þannig í
upphafi að sinna fasteignasölu og
skjalagerð. Síðan var ég komin með
innheimtudeild og með samninga við
stóra aðila í sveitarfélaginu. Ég held að
þetta séu svipuð verkefni og margir
einyrkjar í Reykjavík sinna.“
Hvaða réttarsviði sinnir þú mest?
„Auk þeirra sem fyrr eru nefnd hefur
sifjarétturinn verið að aukast og aðstoð
í greiðsluerfiðleikum. Ég hef einnig
verið í skiptastjórn og verjenda
störfum.“
Nú búa rúmlega 2000 manns í
sveitarfélaginu Hornafirði.
Hvernig er að vera lögmaður í
svo litlu samfélagi?
„Það er auðvitað meira návígi við þá
sem kaupa þjónustuna en ég ber
Hornfirðingum góða sögu. Þeir gera
greinarmun á mér sem lögmanni og
persónu. Maður má ekki gefa færi á sér
t.d. þegar maður er að skemmta sér og
ég býð ekki upp á umræðu um mál
þegar ég er ekki í vinnunni.“
EI
Meira návígi
í litlu
samfélagi
Sigríður Kristinsdóttir hdl. fannst hún komin í nýtt starf þegar hún stofnaði
Regula ásamt fleiri landsbyggðarlögmönnum.
Umfjöllun