Tímarit hjúkrunarfræðinga - 01.04.2012, Page 34

Tímarit hjúkrunarfræðinga – 2. tbl. 88. árg. 201230
Christer Magnusson, christer@hjukrun.is
TVEIR DOKTORAR SAMA DAGINN
Svo skemmtilega vildi til að 27. janúar sl. vörðu tveir hjúkrunarfræðingar
doktorsritgerðir sínar. Þetta eru þær Ingibjörg Hjaltadóttir og Oddný Gunnarsdóttir.
Við bættust því tveir doktorar í stéttina sama daginn og eru hjúkrunarfræðingar
með doktorsgráðu nú um 30. Í lok mars hittust Ingibjörg og Oddný á kaffihúsi til
þess að halda upp á áfangann.
Oddný og Ingibjörg eru báðar komnar
yfir fimmtugt og búa að einhverju leyti
yfir svipaðri reynslu þó að þær hafi ekki
þekkst fyrr en á síðustu árum. Báðar hafa
þær verið deildarstjórar og opnað nýjar
deildir og báðar kynntust þær snemma
rannsóknum. Doktorsrannsóknir þeirra
fjalla um ólík efni en athyglisvert er að
í báðum rannsóknunum reyndist hægt
að skilgreina atriði sem hafa áhrif á
andlát. Annars vegar er samband milli
endurtekinna koma á bráðamóttöku
og aukinnar dánartíðni og hins vegar
reyndust stöðugleiki heilsufars og færni
í athöfnum daglegs lífs vera mikilvægir
spáþættir fyrir andláti hjá íbúum á
hjúkrunarheimili.