Tölvumál - 01.11.2015, Blaðsíða 33

33
Við nýtum tilbúnar einingar einnig á fjölbreyttan hátt, til dæmis er sama
námskeiðaeining í notkun á vefjum Hilton Nordica Spa, Mjölnis og
Promennt, hver með sínu útliti og mismunandi áherslum.
Framundan eru nýjungar sem notendur okkar hafa helst kallað eftir. Þar
má nefna eflingu myndvinnslu í kerfinu, jafnt skölun og stuðning við
bestu mögulegu þjöppun (með eða án gæðatapi), sem og enn bættan
stuðning við leitarvélabestun og aðgengi fyrir alla. Meðal nýjunga
undanfarin misseri má nefna öfluga vefverslunareiningu, samþættingu
við Bókun.is, öfluga einingu fyrir pantanir á veitingastöðum sem var
þróuð í samvinnu við Saffran og umbætur í aðgengismálum.
AF HVERJU EKKI OPEN SOURCE?
Með eigin kerfi höfum við sniðið viðmótið að þörfum notenda. Við
höfum byggt upp örugga, einfalda en jafnframt öfluga lausn fyrir íslenska
markaðinn sem þjónar honum afspyrnuvel. Reynsla okkar sýnir að í
samanburði við open source lausnir megi þannig halda niðri kostnaði
þegar litið er til lengri tíma. Okkar eigin einingar og viðbætur falla
snuðrulaust að kerfinu og með slíkt umhverfi er aldrei hætta á að
vefmálin lendi í limbói. Við höldum jafnframt þétt utanum alla
öryggisþætti, sem léttir vefstjóranum lífið.
Vefumsjónarkerfi er aldrei betra (en stundum verra) en þjónustan sem er
veitt samhliða því. Áhersla okkar á öfluga þjónustu og reynslu í yfir
áratug hefur leitt til mikillar ánægju þeirra vefstjóra sem hafa valið okkur
til samstarfs, umfram t.d. open source kerfi.
HVAR ER NEYÐAR­
HNAPPURINN FYRIR
NOTENDUR TÖLVUKERFA?
Dr. Marta Guðrún Lárusdóttir, lektor við Háskólann í Reykjavík
Hlutfall Íslendinga, sem nota internetið daglega eða næstum daglega
var 96% árið 2014 skv. gögnum frá Hagstofunni, sem var hæsta hlutfall
í allri Evrópu (Hagtíðindi, 2015). Hugbúnaðarkerfin, sem notuð eru á
internetinu, þurfa því að vera auðveld í notkun fyrir alla aldurshópa. Ef
erfitt er að nota kerfin, gætu notendur hætta að nota þau; það gæti
tekið of langan tíma fyrir þá að ná markmiðum sínum, þeir gætu orðið
ergilegir og upplifun þeirra slæm af notkuninni. Sama gildir um
hugbúnað, sem er hannaður fyrir ákveðna notendahópa. Rannsókn í
Svíþjóð á því hversu vel hugbúnaður styður embættismenn (e. White
collar workers) sýnir að 26,5 mínútur gætu sparast að meðaltali á
hverjum degi, ef hugbúnaðurinn hefði verið án vandamála (Unionen,
2015). Í sömu rannsókn er áætlað að hægt væri að spara 12 milljarða
SEK á ári (182 milljarða ISK), ef öll þessi vandamál væru leyst.
Eitt af lykilatriðum til árangurs í hugbúnaðargerð nútímans er miða
hönnun tölvukerfanna út frá notendum og bjóða þeim að taka þátt í
hugbúnaðargerðinni. Við Íslendingar stöndum mjög framarlega hvað
varðar tæknilega þáttinn við tölvunotkun; við erum fljót að kaupa nýjasta
búnaðinn á markaðnum og tileinka okkur nýjan hugbúnað því samfara.
Undanfarin ár hefur áhersla á upplifun notenda við tölvunotkun aukist
mikið. Til þess að upplifunin verði sem best, er æskilegt að viðskiptavinir
taki þátt í hugbúnaðargerðinni allt frá fyrstu stigum hennar.
Í yfir 15 ár hef ég kennt notendamiðaða hugbúnaðargerð við Háskólann
í Reykjavík og stundað rannsóknir á því sviðið bæði á Íslandi og í
Svíþjóð. Mér finnst hugbúnaðarfólk og nemendur mun jákvæðari
gagnvart auknum samskiptum notenda og hugbúnaðarfólks núna en
fyrir 15 árum. Þá var þetta tiltölulega nýtt fyrir mörgum. Ég hef séð mörg
dæmi um góð samskipti notenda og hugbúnaðarfólks, þar sem
þátttakendur læra hverjir af öðrum. Margar leiðir eru notaðar til þessara
samskipta, eins og blogg síður, spjallrásir, notendarýni yfir kaffibolla og
prófanir gegnum Skype. Hins vegar held ég að hægt sé að auka og
auðvelda þessi samskipti mun meira.
Þegar ég byrjaði að kenna notkun tölvukerfa fyrir um 30 árum var ég
iðulega spurð að því, hvar rauði takkinn væri, sem eyðilegði allt kerfið.
Notendurnir ætluðu ekki að ýta á hann! Kannski þurfa notendur einmitt
hnapp, sem þeir eru hvattir til að ýta á, ef þeir lenda í vandræðum og
vilja tilkynna þau til hugbúnaðarfólksins. Ég er sannfærð um að notendur
lenda oft í vandræðum og töfum, sem hugbúnaðarfólkið heyrir ekki af.
Þetta veldur töfum og kostnaði, sem hugbúnaðarfólkið veit ekki um.
Neyðarhnappur í tölvukerfum, í stíl við öryggishnapp öryggisfyrirtækjanna,
er ein leið til að auðvelda notendum að koma upplifun sinni á framfæri
við hugbúnaðarfólkið.
TILVITNANIR:
1. Hagtíðindi (2015). Tölvu- og netnotkun á Íslandi og í öðrum
Evrópulöndum 2014, Hagtíðindi 100. árg. 1. tbl. 23. janúar 2015,
ISSN: 1670-4584.
2. Unionen (2015). Tjänstemännens IT-miljö 2014 – Lyssna på oss som
ska använda det (Tölvuumhverfi embættismanna 2014 – Hlustaðu á
okkur, sem eigum að nota það). Stokkhólmur: Unionen.