Skólavarðan - 01.06.2009, Blaðsíða 3

3
FORMANNSPISTILL
Formaður og varaformaður KÍ og formenn aðildarfélaga KÍ skiptast á um að skrifa
formannspistla í Skólavörðuna. Félögin á bak við formannspistlana eru: Félag
framhaldsskólakennara (FF), Félag grunnskólakennara (FG), Félag leikskólakennara
(FL), Félag stjórnenda í framhaldsskólum (FS), Félag tónlistarskólakennara (FT),
Skólastjórafélag Íslands (SÍ).
Látum ekki börnin borga brúsann
SKÓLAVARÐAN 4.TBL. 9. ÁRG. 2009
Kennarasamband Íslands varar við þeirri hugmynd að alveg eins sé
hægt að skera niður í skólakerfinu og í annarri starfsemi. Skólinn
er vinnustaður og griðastaður barna okkar. Þegar foreldrar missa
vinnuna, búa við skertar atvinnutekjur eða ráða ekki lengur við
að eiga eða leigja viðunandi húsnæði versnar hagur barna og
unglinga. Skólastarf í landinu og sú þjónusta sem við teljum að
lágmarki nauðsynlega fyrir börn í leik- og grunnskólum, ungmenni
í framhaldsskólum og nemendur í tónlistarskólum er vissulega stór
útgjaldaliður í fjármálum ríkis og sveitarfélaga. Síst má þó álykta
að þar sé hægt að skera niður starfsemi og þjónustu án þess að
það bitni harkalega á nemendum og fjölskyldum þeirra. Raunar
er það svo að sá niðurskurður sem er hafinn, svo sem skertur
opnunartími leikskóla, brottfall viðbótarstunda umfram lögboðin
lágmörk í grunnskólum, sem voru til dæmis notaðar sem heima-
námsstundir eða til þess að skipta stórum námshópum í hluta
kennslunnar, niðurfelling forfallakennslu og skerðing stoðþjónustu
á borð við náms- og starfsráðgjöf, forvarnir og félagsmálastarf
hringir viðvörunarbjöllum í hugum skólamanna jafnt sem annarra
sérfræðinga. Áform rekstraraðila grunnskóla um að reyna að fá
því framgengt að lögboðinn starfstími grunnskólanemenda verði
styttur um tíu daga á ári og yfirlýsingar um að það skipti eiginlega
litlu og varla nokkur skaði af því vekja enn alvarlegri áhyggjur af
andvaraleysi um afleiðingar þess að taka skref aftur á bak og skerða
nám og skólastarf frá því sem talið er ásættanlegt.
Skólinn og starfsemin sem þar fer fram þarf að vera fasti punkturinn
í lífi nemenda. Sveitarfélögin í landinu eru mörg og hafa rekið sín
bú misvel, en gert er gert og nauðsynlegt er að styðja sveitarfélög
sem ekki geta rekið skóla sína með viðunandi hætti til þess verks í
því efnahagslega gjörningaveðri sem nú gengur yfir okkur. KÍ tekur
heilshugar undir með öðrum um að í viðleitni okkar að ná tökum á
fjárhag landsins þarf að fara yfir rekstur og starfsemi allra stofnana
hins opinbera – líka skólanna. Hins vegar kallar þetta óvenjulega
ástand líka á að vissum spurningum um forsendur hagræðingar í
rekstri sé svarað og rætt hvað geti verið skaðlegt og óhagkvæmt
til lengri tíma að skera niður. Slíkar spurningar eiga vissulega
við um skólastarf og menntun en einnig um ýmsa meginþætti í
heilbrigðiskerfinu og félagslegri þjónustu.
Spyrja má í þessu sambandi hvernig skólinn geti haldið áfram
að vera öruggur samastaður barna og ungmenna og bakhjarl fjöl-
skyldna með færri kennurum, verri starfsskilyrðum nemenda og
kennara, styttri árlegum starfstíma, færri valkostum í námi og skertri
stoðþjónustu. Á hinn bóginn er fullljóst að hvorki ríki né sveitar-
félög geta rekið skólastofnanir með halla ár eftir ár heldur hlýtur
að þurfa að færa til milli málaflokka, bæta í sums staðar en draga
annars staðar úr útgjöldum eða minnka tekjustofna tímabundið.
Félagsmenn KÍ eru vel meðvitaðir um vanda íslensks samfélags og
takast á við hann bæði með nemendum sínum og í einkalífi sínu á
hverjum degi.
KÍ skorar á stjórnvöld, jafnt ríki sem sveitarfélög, að taka höndum
saman um að verja skólastarf og menntun í landinu og mun ekki
skorast undan því að leggja þar til krafta sína og þekkingu.
Elna Katrín Jónsdóttir
Elna Katrín Jónsdóttir
Varaformaður KÍ
Getur skólinn haldið áfram að vera öruggur
samastaður barna og ungmenna og bakhjarl
fjölskyldna með færri kennurum, verri starfs-
skilyrðum nemenda og kennara, styttri árlegum
starfstíma, færri valkostum í námi og skertri
stoðþjónustu?