Morgunblaðið - 24.06.2017, Side 14

14 FRÉTTIRInnlent
MORGUNBLAÐIÐ LAUGARDAGUR 24. JÚNÍ 2017
Við vinnum að sölu á
eftirtöldum fyrirtækjum:
• Rótgróið verslunarfyrirtæki í austurbær Reykjavíkur. Vel
rekið fyrirtæki með góða ebitda framlegð, eigin innflut-
ningur og framleiðsla. Stór verslun og dreifing til annarra
aðila. Velta um 500 milljónir.
• Iðnfyrirtæki í smíði úr áli og ryðfríu stáli.
Stærstur hluti starfseminnar er þjónusta við olíufélögin, ýmisskonar smíði
úr áli og þjónustu á stýrikerfum á dælubúnaði olíubíla.
Meginhluti starfseminnar er við fyrirtæki en þó einnig við einstaklinga í
ýmisskonar sér smíði.
Starfsemi fyrirtækisins er í 450fm húsnæði með mikilli lofthæð, fimm
metra háum gegnumkeyrsluhurðum með miklu útiplássi.
• Við leitum að fjárfesti sem hefur áhuga á kaupum á veitingahúsakeðju
í Reykjavík, velta er um 700 milljónir og er reksturinn mjög traustur og
góður. Hér er á ferðinni tækifæri í veitingarekstri sem ekki er mikið háð
ferðamönnum og hefur gengið vel um margra ára skeið
• Tvær af álitlegustu ísbúðum bæjarins eru til sölu hjá okkur.
• Hönnunar og vörumerkjafyrirtæki með smásölurekstur er til sölu hjá
okkur. Velta um 80 milljónir, miklir möguleikar til aukinna umsvifa.
• Smásöluverslun í úthverfi á sviði gourmet þ.e. matvara í hæsta gæða-
flokki. Auðveld kaup, miklir möguleikar.
• Nokkur dæmi fyrir fjárfesta í veitingaþjónustu í 101 Reykjavík.
• Hestavöruverslun í Reykjavík.
Við bendum á heimasíðu okkar www.investis.is þar sem fjárfestar
geta skráð sig og fengið upplýsingar um viðskiptatækifæri í forgangi.
Við erum með kaupendur og fjárfesta að ýmsum gerðum fyrirtækja, við
hvetjum fyrirtækjaeigendur sem eru í söluhugleiðingum til að hafa samband.
Lækjargötu 2, 2. hæð | Sími 546 1100 | investis@investis.is
Alexander Gunnar Kristjánsson
agunnar@mbl.is
Deilur eru uppi í Árneshreppi um fyrirhugaða 55 mega-
watta virkjun í Hvalá í Ófeigsfirði á Ströndum. Aðal-
skipulag hreppsins gerir ráð fyrir virkjuninni og liggja
rannsóknarleyfi þegar fyrir. Á íbúafundi sem haldinn var
fyrr í mánuðinum reyndist töluverður stuðningur við
framkvæmdina, en Hvalárvirkjun endaði næstefst á lista
yfir atriði sem fundargestir töldu brýnustu hagsmunamál
hreppsins, rétt á eftir bættum samgöngum.
Eva Sigurbjörnsdóttir, oddviti Árneshrepps, segir að
virkjuninni sé ætlað að bæta raforkuöryggi Vestfirðinga,
en rafmagnsframleiðsla á Vestfjörðum er einungis brot af
því sem svæðið notar. Vonir standa til að koma megi upp
hringtengingu rafmagns um Vestfirði þannig að rafmagn
slái ekki út af öllu svæðinu þótt tiltekin raflína fari í
sundur. „Ef rafmagn bilar í Dölunum fer það kannski af
öllum Vestfjörðum,“ segir Eva, en ekki sé hægt að slá út
bilaða kaflanum. Þá þurfi að keyra varaaflstöð sem kynt
er með dísilolíu, en slíkt er bæði dýrt og óumhverfisvænt.
Eva segir fleiri tækifæri felast í virkjuninni. Þegar rann-
sóknir hefjist verði lagður vegur upp á heiðina. Þá opnist
svæði sem aldrei hafi verið aðgengilegt. „Ég tel að ferða-
þjónustusvæðið í sveitinni muni stækka og opna alveg
nýjar víddir norður á við.“
Efasemdir um hvatann
Ekki eru þó allir jafnhrifnir af þessum áformum. Nú
um helgina fer fram málfundur um virkjanamál í sveitinni
þar sem fulltrúar helstu hagsmunaaðila, landeigenda,
orkufyrirtækja og sveitarstjórnar flytja erindi, auk íbúa.
Að fundinum standa íbúar og vinir sveitarinnar sem eru
ósáttir við þá kynningu sem málið hefur fengið. „Okkur
langaði að opna á meiri umræðu og fá allar staðreyndir
fram,“ segir Pétur Húni Björnsson, vinur sveitarinnar, en
hann hefur miklar efasemdir um virkjanaáformin.
Fyrirhuguð virkjun er á forræði Vesturverks, sem er
að mestu í eigu HS Orku. HS Orka er síðan í eigu Magma
Energy hins sænska. Pétur hefur efasemdir um þá hvata
sem liggja að baki virkjuninni. Upphaflega hafi hug-
myndin verið að byggja litla virkjun til að þjónusta svæð-
ið, en eftir að Vesturverk lenti í eigu HS Orku hafi virkj-
unaráform verið blásin upp og nú sé gert ráð fyrir 55 MW
virkjun. „Maður veltir fyrir sér, er þetta aðilinn sem
ákvað að virkja hér fyrir einhverja milljarða til að búa til
hringtengingu rafmagns á Vestfjörðum eða á að senda
rafmagnið beint suður og nota í einhverja stóriðju, t.d. á
Grundartanga þar sem vitað er að vantar rafmagn?“ Þar
fyrir utan séu sum vandamál sem virkjuninni sé ætlað að
leysa einfaldlega ekki til staðar lengur. Dreifingaröryggi
sé ekki mikið vandamál lengur enda varaaflstöðvar til
staðar.
Deilt um virkjanaáform í
Árneshreppi á Ströndum
 Vesturverk áformar 55 MW virkjun í Hvalá
Morgunblaðið/Sigurður Bogi
Óbeisluð Hvalá er vatnsmesta á Vestfjarða, en hún
rennur í Ófeigsfjörð. Til stendur að virkja ána.
BAKSVIÐ
Baldur Arnarson
baldura@mbl.is
Bæjarstjórar á höfuðborgarsvæðinu
og formaður borgarráðs í Reykjavík
útiloka ekki lækkun fasteignaskatta
við gerð fjárhagsáætlunar 2018.
Samkvæmt nýju fasteignamati
Þjóðskrár Íslands hækkar heildarmat
fasteigna um 13,8% milli ára. Á höfuð-
borgarsvæðinu hækkaði það um
17,5% í sérbýli, um 15,4% í fjölbýli og
um 10,6% í atvinnuhúsnæði.
Fram kom í Morgunblaðinu í gær
að Norðurþing hygðist bregðast við
42% hækkun fasteignamats á Húsa-
vík með því að lækka fasteignaskatt.
Af því tilefni leitaði Morgunblaðið
til forystumanna á höfuðborgarsvæð-
inu. Ekki náðist í Dag B. Eggertsson
borgarstjóra og varð S. Björn Blön-
dal, formaður borgarráðs, til svara
fyrir borgina.
Hann sagði Reykjavík vera með
hlutfallslega lægstu fasteignaskattana
á íbúðarhúsnæði á Íslandi.
„Verðið er hins vegar auðvitað hátt.
Þetta er dýrasta svæðið. Við höfum
athugað hvaða áhrif það hefði að
breyta álagningu. Við höfum fyrst og
fremst skoðað íbúðarhúsnæði.“
Rétti tíminn er núna
Spurður um svigrúm borgarinnar
til slíkrar lækkunar segir Björn að ef
það eigi „einhvern tímann að gera
þetta sé það hugsanlega núna“. „Ég
minni á að árið 2011 fór þáverandi
meirihluti Besta flokks og Samfylk-
ingar þessa leið. Við höfum verið vak-
andi fyrir þessu allan tímann.“
Ármann Kr. Ólafsson, bæjarstjóri
Kópavogs, segir skattana verða
ákveðna við gerð fjárhagsáætlunar.
„Við höfum alltaf lækkað álagspró-
sentuna á íbúðarhúsnæði, þannig að
hækkunin verði að meðaltali aldrei
meiri en forsendurnar sem við erum
að vinna með í fjárhagsáætlun, sem
byggja á þjóðhagsspá hverju sinni.“
Ármann segir aðspurður að bærinn
hafi lækkað fasteignaskatta á atvinnu-
húsnæði á kjörtímabilinu. Hann
treysti sér ekki til að segja til um
hvort skatturinn lækki meira.
Álögur á Nesinu séu lágar
Ásgerður Halldórsdóttir, bæjar-
stjóri Seltjarnarness, segir bæjar-
stjórn skoða allar álögur á bæjarbúa
við gerð fjárhagsáætlunar hvers árs.
„Sú vinna fer fram á haustmánuð-
um og þá verður þetta skoðað og met-
ið. Ég hef ávallt haft þá afstöðu að
leita allra leiða til að halda álögum á
bæjarbúa sem lægstum um leið og
veitt sé mjög góð þjónusta. Við erum
nú með lægsta álagningarstuðulinn á
höfuðborgarsvæðinu. Ég mun skoða
allar forsendur við álagningu á fast-
eignaskatti með bæjarstjórn strax í
haust við gerð fjárhagsáætlunar með
það í huga, eins og hingað til, að auka
ekki álögur á bæjarbúa og minnka
ekki þjónustustigið,“ sagði hún.
Haraldur Sverrisson, bæjarstjóri
Mosfellsbæjar, segir bæinn hafa
lækkað álagningarhlutföll fasteigna-
skatta í tengslum við fjárhagsáætlun
2017.
„Var það gert til að koma til móts
við þá hækkun sem orðið hafði á fast-
eignamati. Lækkunin gekk út á að
íbúaeigendur greiddu sömu upphæð í
fasteignaskatta á árinu 2017 að raun-
gildi og árið 2016 og hefur það gengið
eftir. Nýverið var birt nýtt mat sem
mun gilda fyrir árið 2018. Það hefur
ekki verið farið yfir það í smáatriðum í
Mosfellsbæ. Þó er ljóst að það felur í
sér töluverða hækkun fasteignamats á
húsnæði í bænum. Vinna við fjárhags-
áætlun fyrir árið 2018 er að hefjast og
þetta er eitt af þeim atriðum sem taka
þarf afstöðu til við gerð hennar. Það er
ekki ólíklegt að einhverjar breytingar
verði gerðar á álagningarhlutföllum í
tengslum við hækkun fasteignamats,
þótt engar ákvarðanir hafi verið tekn-
ar í því sambandi eðli máls sam-
kvæmt,“ segir Haraldur.
Dregið verði úr álagningunni
Haraldur L. Haraldsson, bæjar-
stjóri Hafnarfjarðar, segir bæinn vera
að fara yfir þessi mál.
„Ég geri ráð fyrir að við munum
láta tekjur af fasteignagjöldum
hækka í samræmi við hækkun á vísi-
tölu neysluverðs og að því muni álagn-
ingarprósentan lækka. Fasteignamat-
ið hefur enda hækkað umtalsvert
meira en vísitalan milli ára. Afstaða
mín er í samræmi við þetta og að það
eigi að lækka álagningaprósentuna.“
Gunnar Einarsson, bæjarstjóri
Garðabæjar, segir bæinn skoða álagn-
ingu skatta á hverju ári við gerð fjár-
hagsáætlunar, „með því hugarfari að
reyna að hafa álögur á íbúa sem
lægsta. Við höfum lækkað fasteigna-
skatt á íbúðarhúsnæði frá 0,26% árið
2013 í 0,23% árið 2017. Þannig höfum
við reynt að halda í við hækkun fast-
eignamats, þ.e. að íbúar greiði svipaða
krónutölu milli ára. Í sumum tilfellum
hefur það dugað en á öðrum stöðum
ekki þar sem matið hefur hækkað
verulega. Þetta verður skoðað vel nú í
haust með það fyrir augum að lækka
álagninguna.“
Hafi lítil áhrif á markaðinn
Ari Skúlason, sérfræðingur hjá
Landsbankanum, telur lækkun fast-
eignaskatts á íbúðarhúsnæði ekki
munu hafa teljandi áhrif á þróun
íbúðarverðs. Hann bendir á að fast-
eignamatið hafi hækkað mikið í fyrra,
og gjöldin þar með. Það hafi ekki haft
merkjanleg áhrif á markaðinn. Að
óbreyttu sé í kortunum veruleg hækk-
un fasteignagjalda.
Ari telur lækkun fasteignagjalda á
atvinnuhúsnæði geta haft meiri áhrif.
Lækkun fasteignagjalda geti haft
áhrif á rekstur og skráð gengi hjá
stóru fasteignafélögunum.
Skoða lækkun fasteignaskatts
 Bæjarstjórar á höfuðborgarsvæðinu hyggjast kanna svigrúm til lækkunar við gerð fjárhagsáætlunar
 Sérfræðingur hjá Landsbankanum telur lækkun fasteignagjalda hafa lítil áhrif á þróun íbúðaverðs
Morgunblaðið/Árni Sæberg
Hallgrímskirkja Fasteignaverð hefur hækkað mikið að undanförnu. Um leið hækka skattar á fasteignir.
Álagður fasteignaskattur 2017
A-flokkur
Íbúðarhúsnæði
B-flokkur
Stofnanir
C-flokkur
Atvinnuhúsnæði og
annað húsnæði
Reykjavík 0,200% 1,320% 1,650%
Kópavogur 0,255% 1,320% 1,620%
Seltjarnarnes 0,200% 1,320% 1,188%
Garðabær 0,230% 1,320% 1,650%
Hafnarfjörður 0,310% 1,320% 1,650%
Mosfellsbær 0,253% 1,320% 1,650%
Hámarksskattprósenta á íbúðarhúsnæði er 0,5% x 0,25% álag = 0,625%. Föst prósenta á stofnanir 1,32%.
Hámarksskattprósenta á atvinnuhúsnæði er 1,32% x 0,25% álag = 1,65%.