Breiðfirðingur - 01.04.1988, Page 53

BREIÐFIRÐINGUR
51
valdir Ástvaldur Magnússon, Björgúlfur Sigurðsson og
Ólafur Jóhannesson. Viðhorf öll voru þá breytt og allt eða
flest, sem áður hafði verið ákveðið, var talið úr sögunni.
Nokkur áhugi var þó fyrir því að taka málið upp að nýju og
þá með breyttu skipulagi. Kom fram tillaga, sem var
samþykkt, að hefja framkvæmdir við ritun og útgáfu Hér-
aðssögu Breiðfirðinga, eða Sögu byggðanna við Breiðafjörð
og að leggja framkvæmdir við Héraðssögu Dalasýslu endan-
lega á hilluna. Nefndin vann að skipulagi hinnar nýju
ákvörðunar um Héraðssögu Breiðafjarðar og gerði áætlun
um, að hún yrði í eftirfarandi níu aðalþáttum:
1. Breiðfirskar höfðingjaættir.
2. Sæfarar.
3. Frelsishreyfingar og stjórnmál.
4. Merkisklerkar.
5. Saga Flateyjar.
6. Jarðfræði og náttúra.
7. Búskaparhættir í Breiðafjarðareyjum.
8. Sögur og sagnir.
9. Breiðfirsk skáld.
Ekki verður með sanni sagt, að þessar hugmyndir hafi
orðið að veruleika. Að vísu hefur málið verið rætt fram og
aftur og Bergsveinn Skúlason ritaði Um búskaparhætti í
Breiðafjarðareyjum beinlínis fyrir hvatningu nefndarinnar.
Að öðru leyti heyrir allt, sem rætt hefur verið og ritað um
útgáfu og ritun Héraðssögu Dalasýslu og sögu Breiðafjarð-
arbyggða, framtíðinni til. Hvort og hvenær það kemst í
framkvæmd og hvort það verður fyrir frumkvæði Breiðfirð-
ingafélagsins í Reykjavík eða ekki leiðir tíminn einn í ljós.