Breiðfirðingur - 01.04.1988, Side 119

BREIÐFIRÐINGUR
117
hendur. Ég átti lífeyrissjóð hjá félaginu, sem ég átti að fá
borgaðan út í einu lagi þar sem ég var að fara alfarinn úr
landinu. Þrjá mánuði höfðu þeir nú til að endurskoða bækur
mínar. Reyndist það allt vera í góðu lagi. Svo fékk ég sjóð-
inn greiddan áður en ég fór.
Nú þá var ekki annað fyrir hendi en kveðja þetta góða
fólk, sem við höfðum þekkt í mörg ár og notið vináttu þess.
Tryggingafélagið gaf mér fallega gjöf er ég kom upp á
skrifstofu til að kveðja félaga mína. Var það 14 karata gull-
pennasett með nafni mínu grafið á. - Borghildur átti margt
frændfólk í Los Angeles og sumt af því bjó langt hvert frá
öðru. Tvær frænkur hennar buðu eins mörgu og þær gátu
náð í og komum við þar öll saman í ljómandi fallegum garði
við hús þeirra. - Síðasta boðið, er við fórum í var hjá
íslenskri konu, er gifst hafði amerískum hermanni hér á
stríðsárunum. Bjuggu þau í bæ nálægt Los Angeles. Þau
voru mjög vel stæð og áttu stóreignir. Þau höfðu byggt sér
hús og í því var baðstofa í íslenskum stíl með skarsúð. Þar
voru saman komnir margir íslendingar. Var okkur fært þar
að gjöf forkunnarfagurt siifurfat.
Þegar við vorum tilbúin til brottferðar vorum við keyrð út
á alþjóðaflugvöllinn í Los Angeles. Ég hafði pantað far og
við komum nokkuð snemma af því að við höfðum svo mik-
inn farangur. Þegar við komum inn í afgreiðsluna var okkur
tilkynnt að önnur vél væri tilbúin að fara og væri nóg pláss í
henni. Eftir skamma stund vorum við komin á loft. Þetta var
þægileg risaþota og var ekki hálffull. Þegar til New York
kom, var flogið í marga hringi áður en leyfi kom til að lenda.
Mig minnir að flugvöllurinn héti þá La Guardia en fengi svo
seinna nafnið Kennidyflugvöllur. Við dvöldum tvær nætur í
New York.
Ég hefi áður nefnt Guðmund Kristjánsson meðan ég var í
Chicago. Eftir að hafa leitað að nafni hans í símaskrá New
Yorkborgar fann ég það og hringdi til hans. Kom hann á
hótelið til okkar og var gaman að ræða við hann, margt hafði
á dagana drifið þessi 20 ár síðan við sáumst síðast.