Breiðfirðingur - 01.04.1988, Side 148

146
BREIÐFIRÐINGUR
hádegi er við fórum heim í mat. Lét ég hann inn í fjós svo
hann yrði ekki eins saddur er ég legði af stað.
Um kvöldið komum við heim dauðþreytt því þurrkur
hafði verið um daginn og mikið tekið inn af heyi. Á þeim
árum var Leifur Þorleifsson frændi minn ákaflega duglegur
maður og skemmtilegt að vinna með honum. Ég hlakkaði
samt til að koma heim til foreldra minna og systkina og
hugði nú gott til að setjast á Óspak og ríða honum heim. Ég
kvaddi fólkið og allir þökkuðu mér fyrir samveruna. Guðrún
Pétursdóttir, gamla vinnukonan, kom með mér í fjósið.
Kýrnar voru að koma heim til mjalta. Ég opnaði fjósið en sá
engan hest þar inni. Mér brá illa í brún. Óspakur var
horfinn. Hvað gat hafa orðið af honum? Hver hafði hleypt
honum út? Við Guðrún fórum aftur inn í bæ og hófst nú
mikil rekistefna. Hver hafði opnað fyrir honum? Enginn var
heima nema Dóróthea húsfreyja og stelpa, senr var þar til
snúninga. Leifur gekk á hana og spurði hvort hún hefði
hleypt hestinum út. Hún þorði ekki annað en að meðganga.
Hún ætlaði að hafa gaman af því að ég kæmist ekki heim um
kvöldið. Þetta var búið og gert.
Leifur vildi lána mér hest en hann ætlaði að koma með
mér út að heiði. Við gætum athugað stóðið á leiðinni. Vel
gat verið að Óspakur hefði stansað hjá hrossunum. Við
Leifur riðum af stað út allan Flóa. Veðrið var yndislegt þetta
hásumarkvöld.
Fegurðin ríkti. Staðarsveit var glæsileg í kvöldkyrrðinni.
Þegar við komum út undir Bjarnarfoss sáum við stóran
hrossahóp fyrir neðan urðina. Ofurlítill vonarneisti vaknaði
í brjósti mínu. Ef til vill var vinur minn þarna í stóðinu. Jú,
ekki bar á öðru, þarna var hann og sómdi sér ekki illa innan
um folaldsmerar, graðfola og alls konar hrosspening. Þá var
stóra spurningin, hvernig tækist mér að ná honum? Þetta gat
orðið erfitt. Við Leifur rákum stóðið upp að urðinni. Ég sá
að Óspakur þekkti mig. Hann horfði á mig sínum stóru
augum en ekki var álitlegt að ná honum mitt í þessu villta
líferni. Nokkrir hestar fóru upp í urðina þar á meðal Óspak-