Morgunblaðið - 26.03.2019, Blaðsíða 19

19
MORGUNBLAÐIÐ ÞRIÐJUDAGUR 26. MARS 2019
Innlifun Að fylgjast með handboltaleik er góð skemmtun. Það upplifðu þessi kátu börn sem horfðu á leik Vals og Akureyrar og tjáðu tilfinningarnar sem leikurinn vakti hvert með sínum hætti.
Eggert
Loftslagsmálin eru
stóra málið á okkar
tímum. Áður en ég
varð ráðherra hafði ég
lengi kallað eftir því að
íslensk stjórnvöld
settu fram fjármagn-
aða aðgerðaáætlun í
loftslagsmálum. Eitt af
fyrstu verkefnum mín-
um þegar ég kom í um-
hverfis- og auðlinda-
ráðuneytið var að láta
vinna slíka áætlun. Hún var kynnt
sameiginlega af sjö ráðherrum síð-
astliðið haust. Fram komu fjölmarg-
ar umsagnir um áætlunina með góð-
um ábendingum sem nýtast vel við
gerð annarrar útgáfu hennar sem
gefin verður út síðar á árinu.
Stjórnvöld vinna nú markvisst og
ötullega að loftslagsmálum. Starfs-
hópur skipaður fulltrúum fjögurra
ráðuneyta, undir forystu Sigurðar
Inga Friðleifssonar hjá
Orkusetri, hefur unnið
að útfærslu á öðrum
meginþætti aðgerða-
áætlunarinnar: Orku-
skiptum í samgöngum.
Hópurinn hefur unnið
greiningu á stöðu inn-
viða vegna orkuskipta
og fyrstu verkefnin
sem byggð eru á vinnu
hans verða sett af stað
nú á næstu vikum.
Landgræðslunni og
Skógræktinni var falið
að útfæra í samstarfi
við umhverfis- og auðlindaráðu-
neytið hinn meginþátt áætlunar-
innar, kolefnisbindingu, og nú í vor
verður sú vinna einnig kynnt.
Margar aðgerðir í vinnslu
Almenningssamgöngur og breytt-
ar ferðavenjur skipta miklu máli í
loftslagsmálum. Í febrúar kynnti
samgöngu- og sveitarstjórnar-
ráðherra grunn að fyrstu heildar-
stefnu ríkisins um almennings-
samgöngur fyrir allt landið og ríkið
hefur samþykkt að veita 800 millj-
ónir króna í undirbúning Borgar-
línu.
Hvað einstaka aðgerðir í áætl-
uninni varðar á sér margvísleg vinna
nú stað. Kolefnisgjald hefur sem
dæmi verið hækkað í áföngum síðan
ríkisstjórnin tók við, vinna er hafin
við breytingar á landsskipulags-
stefnu með áherslu á loftslagsmál í
skipulagi og reglugerð hefur verið
sett varðandi hleðslu rafbíla við ný-
byggt atvinnu- og íbúðarhúsnæði.
Þar með höfum við tryggt að gert sé
ráð fyrir hleðslu við allt nýbyggt
húsnæði á landinu. Vinna stendur
yfir vegna svartolíu og undirritaður
hefur verið samningur um viðamikla
umhverfisfræðslu í skólum með
áherslu á loftslagsbreytingar. Vinna
við stofnun Loftslagssjóðs er enn
fremur í fullum gangi og samstarf
hefur verið tekið upp við Rannís
vegna hans.
Eins og kveðið er á um í aðgerða-
áætluninni skal Stjórnarráðið setja
sér loftslagsstefnu og verið er að
leggja lokahönd á gerð hennar.
Gripið verður til margvíslegra að-
gerða til að draga úr losun og starf-
semi stjórnarráðsins kolefnisjöfnuð.
Loftslagsmálin í öndvegi
Fjölmörg önnur verkefni sem
varða loftslagsmál eru auk þess í
vinnslu án þess að vera undir hatti
aðgerðaáætlunar í loftslagsmálum.
Starf Loftslagsráðs er komið á fullt
og síðastliðinn föstudag kynnti ég í
ríkisstjórn frumvarp um breytingar
á loftslagslögum, þar sem m.a. er
lagt til að skylda allar stofnanir
ríkisins og fyrirtæki í meirihlutaeigu
þess til að setja sér loftslagsstefnu
og draga úr losun.
Síðastliðna mánuði hefur enn
fremur verið unnið að því að koma á
fót Samstarfsvettvangi stjórnvalda
og atvinnulífs um loftslagsmál og
grænar lausnir og gert er ráð fyrir
formlegri stofnun hans innan
skamms.
Með núverandi ríkisstjórn hafa
loftslagsmálin loks fengið þann sess
sem þeir ber. Viðhorf til málaflokks-
ins hafa auk þess breyst mikið á
stuttum tíma, bæði hér á Íslandi og
erlendis. Það er einstakt að verða
vitni að þeirri fjöldahreyfingu sem
farin er af stað og breiðist nú út um
heimsbyggðina, þar sem ungt fólk
krefst stóraukinna aðgerða í lofts-
lagsmálum. Nýir tímar eru runnir
upp.
Eftir Guðmund
Inga Guðbrandsson »Með núverandi ríkis-
stjórn hafa loftslags-
málin loks fengið þann
sess sem þeir ber. Við-
horf til málaflokksins
hafa auk þess breyst
mikið á stuttum tíma.
Guðmundur Ingi
Guðbrandsson
Höfundur er umhverfis-
og auðlindaráðherra.
Markvisst unnið að loftslagsmálum
Á síðustu vikum höf-
um við í þingflokki
Sjálfstæðisflokksins
ferðast vítt og breitt
um landið, haldið fundi
og heimsótt fyrirtæki.
Fundaherferðin fékk
nafnið #áréttrileið. Við
höfum verið að hitta
fólk á heimavelli og
ræða þau mál sem
skipta fólkið mestu.
Við erum langt kom-
in í yfirferð okkar um landið og ferð-
in hefur tekist einstaklega vel. Alls
munum við heimsækja yfir 50 staði á
landinu. Þetta er einstakt tækifæri
fyrir okkur þingmenn til að eiga í
beinum og milliliðalausum sam-
skiptum við kjósendur og vonandi
líka gott tækifæri fyrir
kjósendur að koma sín-
um hugðarefnum á
framfæri við þingmenn
og ráðherra. Hefð er
fyrir því að þingmenn
noti kjördæmaviku til
að heimsækja fyrirtæki
og halda fundi í sínu
kjördæmi, en óþekkt er
að þingflokkurinn allur
fari saman í fundaferð
eins og þessa.
Opið spjall þar sem
allir fá notið sín
Á fundum okkar höfum við lagt
áherslu á persónuleg samtöl þing-
manna við fundargesti sem leiðir af
sér fjölbreyttar og skemmtilegar
umræður þar sem allir fá tækifæri
til að koma sínum skoðunum, álitum
og hugrenningum á framfæri. Í heild
vil ég segja að fundargestir hafi ver-
ið jákvæðir og finni vel fyrir því
hversu vel hafi gengið hjá íslensku
þjóðinni á síðustu misserum. Það
virðist nefnilega stundum gleymast í
dægurumræðunni hversu ótrúlega
gott við Íslendingar höfum það. En
auðvitað er af nægu að taka þegar
umræðan snýr að því hvað er hægt
að gera enn betur.
Helstu málin – samgöngur
alls staðar á dagskrá
Samgöngumál eru alls staðar á
landinu til umræðu, á höfuðborgar-
svæðinu eru íbúar orðnir lang-
þreyttir á umferðaröngþveiti, svif-
ryksmengun og skorti á öflugri
almenningssamgöngum. Á lands-
byggðinni snúa samgöngumálin
frekar að öryggi, fækkun einbreiðra
brúa, jarðgöngum og malbikun vega.
Atvinnumálin eru meira rædd á
landsbyggðinni, sérstaklega þar sem
atvinnulífið er tiltölulega fábrotið.
Ferðaþjónustan hefur svo sann-
arlega breytt miklu og alveg ljóst að
herferðin Ísland allt árið hefur skil-
að sínu. En kjaraviðræður og yfir-
vofandi verkföll hræða alla og óhætt
er að segja að hræðslan við afleið-
ingar harðra kjaradeilna er mikil.
Raforku- og fjarskiptamál eru risa
byggðamál og hreint út sagt ótrú-
legt að raforkuöryggi er ekki alltaf
til staðar og skortur á raforku haml-
ar atvinnuuppbyggingu. Heilbrigð-
ismál brenna heldur meira á lands-
byggðinni og þá snýr það helst að
aðgengi sem oft á tíðum er erfitt. En
umræðan hefur farið vítt og breitt
og einnig mikill áhugi á að ræða al-
þjóðamál, umhverfismál og efna-
hagsmál í stórum dráttum.
Það er allavega ljóst að við þing-
menn höfum haft bæði gagn og
gaman af þeim heimsóknum sem við
höfum átt hingað til, enda hefur
okkur alls staðar verið vel tekið.
Takk fyrir okkur! Ég hlakka til að
klára hringferðina en Vestfirðir og
Vestmannaeyjar verða okkar síð-
asta stopp.
Eftir Bryndísi
Haraldsdóttur » Við höfum haft bæði
gagn og gaman af
þeim heimsóknum sem
við höfum átt hingað til,
enda hefur okkur alls
staðar verið vel tekið.
Takk fyrir okkur!
Bryndís
Haraldsdóttir
Höfundur er þingmaður.
bryndish@althingi.is
Á réttri leið