Morgunblaðið - 03.08.2019, Blaðsíða 25

góður maður. Þótt ég vissi þá að
ég ætti góðan afa, skildi ég fyrir
löngu hvað hún átti við. Traustur,
heiðarlegur, hjálpsamur og
hjartahlýr. Allt eru þetta mann-
kostir sem þú hafðir og eiginleik-
ar sem ég mun reyna að ala upp í
syni mínum. Mikið vildi ég að
hann hefði fengið að kynnast þér.
Elsku afi, takk fyrir stundirn-
ar sem við áttum saman, ég mun
alltaf búa að þeim.
Þín sonardóttir,
Sigrún Harpa Þórarinsdóttir.
Elsku afi.
Á dögum eins og þessum er
ekki annað hægt en að horfa yfir
góðu minningarnar af þér og tím-
ana okkar saman; uppi í sum-
arbústaðnum ykkar, heima hjá
ykkur eða bara hvar sem var.
Þegar ég lít yfir allar þessar
minningar sem ég hef af þér finn
ég fyrir miklum söknuði en brosi
samt með sjálfum mér vegna
þess að svo virðist sem allar
þeirra séu góðar.
Ég man eftir því þegar við
strákarnir fengum að verja helgi
hjá afa Pétri og ömmu Sigrúnu
og hvað við hlökkuðum alltaf til
þess. Þá spiluðum við oft við þig á
daginn og á kvöldin sátum við öll í
rólegheitunum, horfðum á mynd
og borðuðum sælgæti. Einnig
man ég eftir skiptunum sem ég
keyrði með þér, heim frá ykkur
eða til ykkar, og þú spurðir mig
út í götuheiti, fjöll, staði og bara
allt mögulegt og mér leið alltaf
eins og það væri ekkert sem þú
vissir ekki, engin spurning sem
þú hefðir ekki svar við. Það eru
einmitt svona minningar sem ég
á af þér sem alltaf virtust bara
minningar en eru nú orðnar að
eðalsteinum. Það sama á við um
allar ferðirnar upp í sumarbústað
og matarboðin til þín og ömmu og
nú er ég ævinlega þakklátur fyrir
þessar minningar því þær munu
halda þér með okkur áfram þó
svo þú sért farinn.
Þú barðist drengilega við sjúk-
dóminn þinn þó svo hann hafi að
lokum borið sigur af hólmi, en því
miður eru ekki alltaf sanngjarnar
leikreglur í lífinu. Það var hræði-
legt að sjá hvað hann gerði við
þig en nú er ekkert hægt að gera
við því annað en að vera þakklátir
fyrir tímann þinn hér með okkur.
Nú fyllast hjörtu ættingja og vina
þinna af sorg en, eins og stundum
er sagt, er sorg bara ást sem
misst hefur heimili sitt. Hún er
líklegast of mikil til að komast
fyrir í hjörtum okkar svo restin
mun taka sér bólfestu í minning-
um um þig og visku sem þú hefur
miðlað til okkar allra.
Þínir,
Hákon, Pétur og Haukur.
Elsku besti afi minn. Það er
erfitt að lýsa því með orðum
hversu mikið ég sakna þín. Þess
vegna vil ég heldur skrifa nokkur
orð um það hve þakklát ég er fyr-
ir að hafa átt þig sem afa.
Ég hefði aldrei getað óskað
mér betri afa og ömmu en þín og
Sigrúnar ömmu. Margar af mín-
um allra bestu og dýrmætustu
minningum eru frá samveru-
stundum með ykkur. Þær ótelj-
andi stundir sem við áttum sam-
an í sumarbústaðnum ykkar,
Hreiðrinu, standa upp úr. Að
vera þar með ykkur ömmu var
einfaldlega það besta sem ég
vissi. Þú hafðir alltaf eitthvað fyr-
ir stafni. Oftar en ekki varstu að
sýsla eitthvað fyrir okkur krakk-
ana, hvort sem það var að gróð-
ursetja tré til heiðurs hverju
barnabarni eða smíða fyrir okkur
dúkkuhús.
Þú varst engum líkur, elsku
afi. Þú gast allt, varst alltaf til
staðar og vildir allt fyrir okkur
barnabörnin þín gera. Minningar
mínar um þig mun ég geyma í
hjarta mínu alla ævi. Takk fyrir
allt elsku afi.
Hverfur margt
huganum förlast sýn
þó er bjart
þegar ég minnist þín.
Allt er geymt
allt er á vísum stað
engu gleymt,
ekkert er fullþakkað.
(Oddný Kristjánsdóttir í Ferjunesi)
Þín afastelpa alltaf,
Elín Ástrós.
Kæri mágur og vinur okkar,
Pétur.
Á þessari stundu eru svo
margar fallegar og sterkar minn-
ingar sem leita á hugann að erfitt
er að henda reiður á þeim eða
skilja til fullnustu að þú ert að ei-
lífu horfinn frá okkur. Ég gleymi
því aldrei þegar þú komst á Ford
Mustang að sækja Sigrúnu og
fórst með hana á ykkar fyrsta
rúnt. Þið urðuð síðan hjón og nú
eru liðin 48 ár þar sem þú, elsku
mágur minn, hefur verið einn af
mínum bestu vinum og stoð og
stytta. Þú stóðst ávallt með mér
þegar erfiðleikar steðjuðu að eða
þegar leysa þurfti úr torveldum
málum. Þú leiðbeindir mér eins
og þú værir faðir minn, þú sást
um samninga ef þess þurfti og við
dönsuðum saman þú og ég, við
héldum tískusýningar og fífluð-
umst saman á þann hátt sem við
ein kunnum. Gleðistundir okkar
voru endalausar og voru ekki
síðri eftir að ég gekk í hjónaband
og við systur og makar nutum
lífsins á þann veg að aldrei bar
skugga á.
Það er einstakt og í raun
magnað þegar litið er til baka á
þessum erfiðu tímamótum hvað
það hefur verið gaman hjá okkur
öllum í gegnum tíðina. Það sem
við brölluðum saman er efni í rit-
safn, en elsku mágur minn og
svili, það sem kemur fyrst upp í
hugann þegar við hugsum um þig
er góðmennska þín, hjartahlýja,
sem og þolinmæði gagnvart þeim
gæðum en jafnframt áskorunum
sem lífið hefur boðið okkur upp á.
Stundirnar okkar saman í Sví-
þjóð þar sem við spiluðum golf á
daginn og nutum þess að spila á
spil á kvöldin dögum og vikum
saman eru ógleymanlegar og ein-
stakar. Núna, þegar allt er
breytt, þá áttum við okkur á því
hvað sjúkdómurinn er að lokum
dró þig til dauða er lúmskur og í
raun ósýnilegur. Í fávisku okkar
og erli dagsins héldum við, fjöl-
skylda og vinir, að þú værir bara
örlítið utan við þig en seinna
skildum við að aðrar og erfiðari
orsakir voru fyrir því að okkar
trausti og nákvæmi vinur var
ekki lengur sá klettur er við átt-
um að venjast.
Takk elsku vinur okkar fyrir
allar okkar ógleymanlegu sam-
verustundir heima og erlendis.
Við söknum þín óendanlega og
geymum minningu um þig í
hjörtum okkar. Minning um ein-
stakan förunaut mun lifa á meðal
okkar sem þekktum þig um
ókomna framtíð.
Að eiga vin er vandmeðfarið,
að eiga vin er dýrmæt gjöf.
Vin, sem hlustar, huggar, styður,
hughreystir og gefur von.
Vin sem biður bænir þínar,
brosandi þér gefur ráð.
Eflir þig í hversdagsleika
til að drýgja nýja dáð.
(Ingibjörg Sigurðardóttir)
Lára (Lalla) mágkona,
Jón G. Sandholt, börn og
barnabörn.
Hann Pétur vinur minn hefur
kvatt þennan heim.
Þegar góður vinur kveður rifj-
ast upp ótal minningar um langa
vináttu sem engan skugga bar á.
Ljúflingur í samskiptum og
snyrtipinni í umgengni.
Vinátta okkar hefur verið
óslitin í 30 ár og fjölskyldur okk-
ar bundust einnig vináttubönd-
um.
Okkar kynnu hófust er við
gengum báðir í Oddfellowregl-
una og vorum í sömu stúku og
störfuðum báðir í skemmtinefnd
á þeim tíma og þannig kynntust
eiginkonur okkar líka og urðu
góðar vinkonur.
Ferðalögin með honum og Sig-
rúnu eru uppspretta óteljandi
góðra minninga sem gott var að
rifja upp á góðum stundum.
En fyrir tíu árum fór sjúkdóm-
ur Péturs að taka völdin hægt og
bítandi. Þá fækkaði spilakvöld-
unum þar sem einbeitingin hvarf,
fótboltaleikjunum í sjónvarpinu
fækkaði þar sem einbeitingin og
kunnáttan á fjarstýringuna
hvarf.
Góðar minningar eru um spila-
kvöldin í sumarbústaðnum þar
sem spilaður var kani fram á
nætur og oft sagt djarft á spilin
en hægt og rólega hvarf hæfileik-
inn til að spila.
Það var erfitt að horfa á góðan
vin sökkva hægt í óminnið og
verða að fá hjálp við alla einföld-
ustu hluti lífsins.
Síðustu árin bjó Pétur á Ísa-
fold og fékk þar góða umönnun
og gott var að koma þar og eiga
stund með vini sínum.
Við hjónin sendum Sigrúnu og
fjölskyldunni okkar innilegustu
samúðarkveðjur og megi góður
guð vaka yfir þeim.
Ingvar Jón Ingvarsson
og Gréta Ágústsdóttir.
Pétur var elstur okkar systkina,
hann var vandaður og traustur
maður sem við minnumst með virð-
ingu, hlýju og þakklæti. Það var
sama hvaða bón, hugmynd eða
vandamál við systkinin bárum upp
við Pétur bróður og það var sama
hve óraunhæft erindið var, hann
brást alltaf við með jákvæði og yf-
irvegun. Hann kunni að hlusta,
greina og beina. Í stað þess að
svara því strax til að hugmyndir
okkar eða vandamál væru með öllu
út úr kú, sem oft gat verið raunin,
þá hafði hann lag á því að beina
hugmyndinni eða vandamálinu inn
á vitrænni og raunhæfari brautir,
án þess að við áttuðum okkur al-
mennilega á því. Hann var snilling-
ur í að greina og benda á mögu-
legar lausnir og lagði sig fram um
að leiðbeina okkur skynsamlega.
Það var ekki síst vegna þessara eig-
inleika Péturs að við systkinin leit-
uðum til hans með mörg okkar
vandamál eða hugrenningar.
Pétur var allt það sem einkennir
góðan bróður. Hann var mikill
frumkvöðull og smitaði hann okkur
af athafnasemi sinni. Hann var allt-
af tilbúinn að styðja okkur og
hvetja okkur áfram í því við tókum
okkur fyrir hendur. Pétur sagði
aldrei nei, það var alltaf „ekkert
mál“.
Takk fyrir að vera okkur góð
fyrirmynd í lífinu. Við komum til
með að búa að þinni visku um alla
ævi.
Við eigum eftir að sakna mat-
arboðanna, veiðiferðanna, spila-
kvöldanna, skíðaferðanna og allra
þeirra skemmtilegu samveru-
stunda sem við áttum með honum
og Sigrúnu. Pétur var einstaklega
ljúfur og hafði skemmtilegan húm-
or.
Efst í huga okkar er þakklæti
fyrir allt það sem þú varst okkur og
fyrir alla umhyggjuna sem þú
sýndir okkur, beðinn eða óbeðinn.
Takk fyrir allar okkar ljúfu sam-
verustundir. Þín verður ákaft sakn-
að.
Með þér er genginn einstakur
maður sem á vart sinn líka.
Hugur okkar er hjá ykkur elsku
Sigrún, Doddi, Hjördís, Bryndís og
fjölskyldur ykkar.
Sóley,
Guðrún Rósalind (Rósý),
Jóhann (Jói).
MINNINGAR 25
MORGUNBLAÐIÐ LAUGARDAGUR 3. ÁGÚST 2019
HJARTAVERND
Minningarkort
535 1800
www.hjarta.is
Sími · 567 9110 · utfarir@utfarir.is · www.utfarir.is
Stofnað 1990
Traust fjölskyldufyrirtæki í áratugi
Okkar ástkæra
MARGRÉT FRIÐRIKSDÓTTIR,
áður Eyravegi 14, Selfossi,
lést á hjúkrunarheimilinu Ljósheimum
Selfossi þriðjudaginn 23. júlí.
Hún verður jarðsungin frá Selfosskirkju
miðvikudaginn 7. ágúst klukkan 14.
Sesselja Sólveig Bjarnad. Jón Sveinbergsson
Sigurður Bjarnason Sigríður Sveinsdóttir
Harpa Bjarnadóttir Valur Helgason
Friðrik Bjarnason Guðrún Helga Ívarsdóttir
Kristín Hanna Bjarnadóttir
og fjölskyldur
Ástkær eiginmaður minn,
SVAVAR ÞÓR SIGURÐSSON
bóndi,
Birningsstöðum í Ljósavatnsskarði,
sem lést 26. júlí, verður jarðsunginn frá
Þorgeirskirkju við Ljósavatn þriðjudaginn 6.
ágúst og hefst athöfnin klukkan 14.
Þeim sem vilja minnast hans er bent á Skógarbrekku á Húsavík.
Fyrir hönd aðstandenda,
Þórhalla Bragadóttir
Eiginmaður minn, faðir, tengdafaðir, afi
og langafi,
HÖRÐUR GUÐMUNDSSON,
Holtsgötu 19,
Hafnarfirði,
lést á hjartadeild Landspítalans 26. júlí.
Útförin verður gerð frá Fríkirkjunni í Hafnarfirði fimmtudaginn 8.
ágúst klukkan 15.
Blóm og kransar eru vinsamlegast afþökkuð en þeim sem vildu
minnast hans er bent á Minningarsjóð Fríkirkjunnar í Hafnarfirði,
bankareikningur 0544-14-800108 (kt. 510303-3429) og hjá
Blómabúðinni Burkna.
Jóhanna Gunnlaugsdóttir
Gunnlaugur Harðarson
Guðrún Harðardóttir Pétur Einarsson
Jóhanna Harðardóttir Stefán Sigurðsson
og fjölskyldur
Okkar ástkæra eiginkona, móðir,
tengdamóðir, amma, og langamma,
ODDNÝ SIGURRÓS GUNNARSDÓTTIR
Rósa í Hvammi,
húsfreyja að Hvammi í Skaftártungu,
lést mánudaginn 29. júlí á hjúkrunar-
heimilinu Klausturhólum. Útför hennar fer fram frá Grafarkirkju í
Skaftártungu laugardaginn 10. ágúst klukkan 13. Þeim sem vilja
minnast hennar er bent á að láta hjúkrunarheimilið Klausturhóla
Kirkjubæjarklaustri njóta þess.
Oddsteinn R. Kristjánsson
Gunnar Kr. Oddsteinsson Sigurbjörg Kr. Óskarsdóttir
Inga Björt H. Oddsteinsd. Brandur Jón Guðjónsson
Kristbjörg Elín Oddsteinsd. Tryggvi Agnarsson
Páll Símon Oddsteinsson Jónína Jóhannesdóttir
barnabörn og barnabörn
Ástkær faðir okkar, tengdafaðir, afi og
langafi,
GUÐNI GÚSTAFSSON,
Víkurbraut 10, Vorhúsum,
Grindavík,
lést á líknardeild Landspítalans í Kópavogi 27. júlí.
Útförin fer fram frá Grindavíkurkirkju föstudaginn 9. ágúst
klukkan 14.
Ingi Torfi Sigurðsson Helga Eysteinsdóttir
Brynjólfur V. Sigurðsson Loida Lapuz Sigurdsson
Guðbjörg Ólína Guðnadóttir
Anna Lára Guðnadóttir Baldvin Orri Þorkelsson
barnabörn og langafabörn
Frænka okkar,
JÓRUNN BJÖRGVINSDÓTTIR,
lést á dvalarheimilinu Hornbrekku sunnudaginn 21. júlí.
Útför hennar hefur farið fram í kyrrþey að ósk hinnar látnu.
Innilegar þakkir fær starfsfólkið í Hornbrekku fyrir góða og hlýja
umönnun.
Frændfólkið
Minningarvefur á mbl.is
Minningar
og andlát
Vefur þar sem er sameinað efni sem snýr að
andlátum og útförum. Þar eru birtar andláts-,
útfarar- og þakkartilkynningar sem eru að-
gengilegar öllum en auk þess geta áskrifendur
lesið minningargreinar á vefnum.
  
 


 
 þjónustuaðila sem aðstoða þegar andlát ber

  




 
ætlaðar aðstandendum við fráfall ástvina.
www.mbl.is/andlát