Bændablaðið - 23.08.2018, Síða 12

Bændablaðið | Fimmtudagur 23. ágúst 201812
FRÉTTIR
Menntaskólinn að Laugarvatni:
145 nemendur í
skólanum í vetur
Alls verða 145 nemendur í
Menntaskólanum að Laugarvatni í
vetur í þriggja ára kerfi skólans en
það er svipaður fjöldi og var lengi
vel í fjögurra ára kerfinu.
„Skólinn er í stöðugri þróun.
Við erum áfram með bekkjakerfi
en það losnar mikið um það kerfi
á lokaári nemenda, þriðja árinu,
og er það ár meira í líkingu við
áfangakerfi þar sem nemendur geta
valið áfanga mun meir en var áður.
Áfangar fyrstu tveggja áranna eru
alfarið bundnir á brautum þar sem
bekkjakerfið er í fullu gildi þau
námsárin og nokkrir áfangar eru
svo bundnir á þriðja árinu þar sem
línur margra námsgreina eru nokkuð
langar og þarf góðan undirbúning
í þeim fyrir áframhaldandi nám í
háskólum og sérskólum hérlendis
sem erlendis,“ segir Halldór Páll
Halldórsson skólameistari.
Kynjafræði skyldugrein
á fyrsta ári
„Í nýju kerfi skólans er kynjafræði
skyldugrein á fyrsta ári á
báðum brautum í nýja kerfinu,
á félags- og hugvísindabraut og
náttúruvísindabraut, en var áður
eingöngu skylda á félagsfræðibraut
á fjórða ári. Eins er bundinn áfangi
sem heitir „Lokaverkefni“ á þriðja
árinu í nýja kerfinu hvar allir þriðja
árs nemendur velja sig niður á
verkefni og skila nokkurs konar
„mini“ bakkalár ritgerð en þó geta
skilin verið með afar fjölbreyttum
hætti. „Sem fyrr er íþróttalíf,
kórastarf og félagslíf afar öflugt í
ML. Hér myndast ævilöng vinátta
samferðamanna og er það mikils
virði. Það er lífsstíll að vera „ML-
ingur,“ bætir Halldór Páll brosandi
við. /MHH
Staðan í sauðfjárræktinni er greinilega mjög alvarleg. Þó að umræður hafi verið öflugar og áhugaverðar þá virtust
sumir fundarmenn ekki geta horft á það sem fram fór. Myndir / BR
Fundur í Víðihlíð:
Ráðamenn taka púlsinn
á sauðfjárbændum
Fjölmennur fundur sauðfjárbænda
á Norðurlandi vestra fór fram
í Víðihlíð miðvikudaginn 15.
ágúst. Á fundinn mættu Kristján
Þór Júlíusson, landbúnaðar- og
sjávarútvegsráðherra, Haraldur
Benediktsson, sem veitti sam ráðs-
hópi um endurskoðun bú vöru-
samninga formennsku ásamt Unni
Brá Konráðsdóttur, fyrrverandi
forseta Alþingis og nýkjörins
formanns samninga nefndar um
endurskoðun sauð fjár samningsins.
Á fundinum fóru Kristján
Þór og Haraldur yfir skýrslu
samráðshópsins og útlistuðu
atriði skýrslunnar og tillögur
samráðshópsins. Líflegar umræður
sköpuðust á fundinum og komu
fundarmenn fram með athugasemdir
gagnvart skýrslunni, sem og
málefnum sauðfjárræktarinnar er
varða afurðaverð.
Vilja ekki að sauðfjársamningur
sé grunnur að byggðastefnu
Meðal þess sem kom fram í máli
fundarmanna var gagnrýni á þann
veg að það eigi ekki að vera hlutverk
sauðfjársamnings að halda uppi
byggðastefnu í landinu. Kallað var
eftir öðrum aðgerðum til að koma
slíku til vegar.
Málefni afurðastöðva
ofarlega á baugi
Fundarmönnum var tíðrætt um
málefni afurðastöðva og m.a.
talaði Jón Kristófer Sigmarsson
um að verðmyndun til bænda hefði
gjörbreyst á undanförnum árum.
Þær gætu ekki tekið við nýjum
viðskiptavinum og þar með væri
frjálst flæði ekki til staðar, hendur
manna væru hreinlega bundnar.
Fram kom í máli Haraldar og
Kristjáns Þórs að varasamt væri að
pólitíkin væri að skipta sér af innri
málefnum sauðfjárræktarinnar,
og vísaði Haraldur þar til
landbúnaðarsögu Nýja-Sjálands.
Þar hafi landbúnaðarkerfið verið
margbrotið og pólitíkin ákveðið
að sópa út öllum pólitískum
stuðningskerfum á einu bretti.
Kristján Þór tók undir með Haraldi
og sagði að stjórnmálamenn ættu
ekki að blanda sér í hagsmunaátök
sauðfjárbændanna sjálfra. Bændur
eigi sjálfir að taka á málum sem snúa
að afurðastöðvunum.
„Þegar bóndinn, framleiðandinn,
er búinn að selja fyrirtæki framleiðslu
sína þá þurfi bóndinn að reyna að
selja vöruna sem hann á ekki lengur.
Þetta er í mínum huga eins og að
trillu- eða togarasjómaðurinn veiði
fiskinn, fari í land og fari svo að
reyna að selja fiskinn sem hann er
nýbúinn að leggja inn í frystihús.
Þetta finnst mér sérstakt að upplifa,“
sagði Kristján Þór Júlíusson í
ræðustól.
Útflutningsskylda möguleg lausn
Meðal þess sem kom fram í
fyrirspurnum fundarmanna til
ráðherra var hvort að endurvekja
ætti útflutningsskylduna. Kristján
Þór sagðist ekki vilja loka á slíkt.
Hann segir þó að það sé erfitt að
koma henni í gegnum þingið. Hann
segist ekki vera sannfærður um að
útflutningsskylda sé draumalausn
fyrir sauðfjárbændur.
Jóhannes Ríkharðsson, bóndi á
Brúnastöðum, talaði um mikilvægi
þess að tryggja það að afurðastöðvar
flyttu út þær afurðir sem gengju af
umfram innanlandsmarkað. Slíkt
þurfi að tryggja með lagasetningu
eða öðrum leiðum. Þannig náist
afurðaverð upp á við. /BR
Framsögumenn á fundinum voru Kristján Þór Júlíusson, landbúnaðar- og
sjávarútvegsráðherra og Haraldur Benediktsson, alþingismaður og bóndi.
Sigríður Ólafsdóttir frá Víðidalstungu var fundarstjóri í Víðihlíð.
Meðal þeirra sem tóku til máls
var Jóhann Ríkharðsson, bóndi á
Brúnastöðum.
Fulltrúar bænda og ríkisvalds:
Setjast að samningaborði
Um miðjan ágúst varð fullskipað
í samninganefnd vegna endur-
skoðunar sauðfjár samnings.
Fyrsti fundur var haldinn í byrjun
vikunnar og ráðgert er að hittast
aftur á næstu dögum.
Fulltrúi landbúnaðarráðherra
í nefndinni er Unnur Brá
Konráðsdóttir, fyrrverandi þingkona
og forseti Alþingis. Aðrir fulltrúar
ríkisvaldsins eru þeir Þórhallur
Arason, sem situr í nefndinni
fyrir hönd fjármálaráðherra,
og Arnar Freyr Einarsson,
sérfræðingur í atvinnuvega- og
nýsköpunarráðuneytinu.
Áður höfðu bændur tilnefnt sitt
fólk í samninganefndina en frestur
til þess rann út 1. ágúst. Fulltrúar
þeirra eru Sindri Sigurgeirsson,
formaður BÍ, Oddný Steina
Valsdóttir, formaður Landssamtaka
sauðfjárbænda og Einar Ófeigur
Björnsson, stjórnarmaður í BÍ.
Fyrsti fundur samninganefndar
var haldinn mánudaginn
20. ágúst í atvinnuvega- og
nýsköpunarráðuneytinu.
„Fyrsti fundur gekk vel. Við
leggjum áherslu á að koma þeim
bráðaaðgerðum sem hafa verið
kynntar og ræddar til framkvæmda
sem fyrst. Það er mjög mikilvægt.“
segir Sindri Sigurgeirsson, formaður
BÍ og fulltrúi í samninganefndinni..
/TB/BR
Heyútflutningur til Noregs:
Búast við fyrsta skipi
um mánaðamótin
Eins og áður hefur
verið fjallað um
er unnið að því að
koma á koppinn
heysölu frá Íslandi
til Noregs í kjölfar
uppskerubrests sem
þar hefur orðið í
sumar.
Norska matvæla-
stofnunin, Mattilsynet,
gerði á dögunum
breytingar á skilyrðum
til innflutnings á þá
vegu að nú má selja
hey frá þeim bæjum
sem hafa verið lausir
við riðu og garnaveiki
síðustu 10 árin.
Áður fyrr var talað
um að varnarhólf
bæjarins hafi þurft að vera hreint í 10
ár en eftir endurskoðun eru tækifæri
gefin fyrir fleiri að selja hey.
Eins og önnur viðskipti innan
EES-svæðisins
Viðskipti með hey eru meðhöndluð
á sama hátt og önnur viðskipti innan
Evrópska efnahagssvæðisins. Áður
var talað um viðskipti við Ísland sem
„þriðja landi“ líkt og Bandaríkin eða
Kanada.
Áhætta við að flytja inn hey frá
Íslandi er talin miðlungs eða lág á
öllu landinu að því gefnu að riða
eða garnaveiki hafi ekki greinst á
viðkomandi bæ síðustu 10 ár. Enn
minni áhætta er svo talin vera á
innflutningi frá bæjum þar sem
búfjáráburður hefur ekki verið
notaður síðustu tvö árin.
Gengur vel að safna saman heyi
Í fyrstu er gert ráð fyrir að skip
leggist að bryggju á Akureyri og
Sauðárkróki. Benedikt Hjaltason
segir að útflutningurinn sé alltaf
að færast nær því að verða að
raunveruleika, en huga þurfi að ótal
atriðum.
„Það er verið að vinna í því
að útvega skip og við vonumst
til að það komi til landsins
rétt eftir mánaðamótin, fyrst á
Sauðárkrók og svo á Akureyri í
kjölfarið,“ segir Benedikt.
Hann segir að söfnun á rúllum
hafi gengið vel og nú þegar sé
búið að fá vilyrði fyrir 8.000
rúllum á Austurlandi, 6.800
í Þingeyjarsýslu og rúmlega
30.000 á Eyjafjarðarsvæðinu.
Ingólfur Helgason hefur
umsjón með heysölunni í
Skagafirði. Hann tekur undir
með Benedikt um að málin
séu að þróast í góðan farveg.
Umfangið muni ráðast af því
hvernig gengur með fyrstu
farmana. Búið sé að safna
u.þ.b. 15.000 rúllum saman í
Skagafirði og nágrenni og unnið
verði að því næstu daga að koma
þeim að höfninni.
„Ekkert hefur verið ákveðið
ennþá um fleiri viðkomustaði en
áhugi er fyrir því að að fara inn á
Hólmavík og Hvammstanga. Þau
mál muni ráðast af því hvernig
gengur en áhugi og framboð af
heyi er á báðum stöðum,“ segir
Ingólfur. /BR
Heyi rúllað við Ketubjörg á Skaga. Mynd / HKr.
Halldór Páll Halldórsson, skóla-
meistari Menntaskólans á Laugar-
vatni, sem segir lífsstíl að vera „ML-
ingur“. Mynd / Magnús Hlynur Hreiðarsson
Samninganefnd bænda er samsett
af fulltrúum BÍ og LS.