Morgunblaðið - 24.03.2020, Blaðsíða 27

ÍÞRÓTTIR 27
MORGUNBLAÐIÐ ÞRIÐJUDAGUR 24. MARS 2020
Stundum áttar maður sig
ekki á því hvað maður átti fyrr
en maður hefur tapað því. Auð-
velt er að falla í þá gryfju að
taka hlutum sem sjálfsögðum,
sérstaklega þegar maður hefur
alla ævi haft óheftan aðgang að
einhverju.
Þannig líður mér og ef-
laust fullt af öðru fólki með fót-
bolta og aðrar íþróttir. Það er
leiðinlegt að geta ekki legið uppi
í sófa og fylgst með liðinu sínu í
enska boltanum eða mætt á
völlinn að hvetja hverfisliðið
áfram. Það var sjálfsagt að halla
sér aftur, helgi eftir helgi, og
horfa á uppáhaldsliðið spila.
Að sjálfsögðu eru hlutir í
samfélaginu í dag sem skipta
miklu meira máli en íþróttir, en
þær skipta máli. Ég held með
liði í enska boltanum sem er í
toppsæti B-deildarinnar og hef-
ur ekki verið í ensku úrvalsdeild-
inni í sextán ár. Í þau 28 ár sem
ég hef lifað hefur liðið verið í
efstu deild í tólf. Gleðin sem
tæki við ef liðið færi loksins upp
í deild þeirra bestu væri ólýs-
anleg.
Þegar við höfum sigrast
á þessari veiru og lífið er orðið
eðlilegt á ný skulum við njóta
þess sem aldrei fyrr að horfa á
liðin sem við höldum með. Ekki
taka því sem sjálfsögðum hlut.
Fögnum hverju marki meira en
nokkru sinni fyrr og lítum á
björtu hliðarnar í tapi. Fögnum
því að leikurinn sé kominn af
stað á ný.
Hvenær það verður veit
enginn, en með jákvæðnina að
vopni og glæsilegu fólki sem
vinnur dag og nótt í heilbrigðis-
þjónustunni komumst við í
gegnum þetta saman. Svo skul-
um við ekki gleyma því að fagna
sérstaklega vel þegar Leeds fer
loksins upp og landsliðin okkar
tryggja sér sæti á stórmótum.
BAKVÖRÐUR
Jóhann Ingi
Hafþórsson
johanningi@mbl.is
HANDBOLTI
Bjarni Helgason
bjarnih@mbl.is
„Þetta hefur í raun alltaf verið
hluti af mínum plönum að fara til
Eyja þegar að ég myndi snúa heim
úr atvinnumennskunni og ég er
virkilega ánægð með að vera búin
að klára þetta,“ sagði Birna Berg
Haraldsdóttir, landsliðskona í
handknattleik, í samtali við
Morgunblaðið í gær.
Örvhenta stórskyttan, sem er 26
ára gömul, skrifaði undir tveggja
ára samning við ÍBV í gær en hún
mun snúa aftur til Vestmannaeyja
í sumar. Birna kemur til ÍBV frá
þýska 1. deildarfélaginu Neckar-
sulmer þar sem hún hefur verið í
stóru hlutverki á leiktíðinni.
Hún á að baki farsælan feril
sem atvinnumaður frá árinu 2013
með Sävehof í Svíþjóð, Glassverket
í Noregi, Aarhus United í Dan-
mörku og loks Neckarsulmer í
Þýskalandi. Hún hefur nú ákveðið
að kalla þetta gott og mun hún
ganga til liðs við ÍBV þegar samn-
ingur hennar við þýska félagið
rennur út í lok júní.
„Í sannleika sagt er ég búin að
vera fram og til baka með það
hvort ég eigi að vera koma heim
yfir höfuð. Ég er enn þá ung og
mér finnst ég eiga nóg eftir. Það
voru nokkrir möguleikar í stöð-
unni, meðal annars að spila áfram
úti í Þýskalandi, og þá voru einnig
íslensk lið sem settu sig í samband
við mig en ÍBV lét mig vita af
áhuga sínum fyrir tveimur árum
síðan. Þá er kærastinn minn, Claes
Engelbrektsson, handboltaþjálfari
og ÍBV gat boðið honum starf inn-
an félagsins. Þetta hentaði okkur
því mjög vel á þessum tímapunkti.
Ég spilaði eitt tímabil með ÍBV í
úrvalsdeild kvenna í knattspyrnu
og mér hefur alla tíð liðið hrika-
lega vel í Eyjum. Þetta er frábær
staður og valið, þegar uppi var
staðið, var þess vegna auðvelt.“
Birna hefur verið atvinnumaður
í sjö ár en hún var aðeins 19 ára
gömul þegar hún gerðist atvinnu-
maður. Hún segist hafa lært mikið
á tíma sínum úti og að hún komi
heim sem mun sterkari ein-
staklingur en þegar hún fór fyrst
út.
Vill vinna bikara
„Ég var bara 19 ára þegar að ég
fór fyrst út og eftir á að hyggja
var ég engan veginn tilbúin til
þess að standa á eigin fótum.
Draumurinn var alltaf að verða at-
vinnumaður og það var í raun ekk-
ert sem stoppaði mig þarna. Ég
hef unnið með ótrúlega mismun-
andi fólki á þessum sjö árum og
haft bæði góða og slæma þjálfara.
Ég skil mjög sátt við minn at-
vinnumannaferil. Ég byrjaði í
Sävehöf sem var besta liðið í Sví-
þjóð á þessum tímapunkti. Ég tap-
aði ekki einum deildarleik á þrem-
ur árum í Svíþjóð og fékk
dýrmæta reynslu í Meistaradeild-
inni líka. Ég fór svo til Noregs til
Glassverket og varð strax lyk-
ilmaður í liðinu. Glassverket er það
lið sem hjálpaði mér einna mest
með sjálfa mig og ég lærði mikið á
þessum tíma. Frá Noregi fór ég
svo til Danmerkur og þar kom ég
vel inn í liðið. Ég var markahæsti
leikmaður liðsins á mínu fyrsta
tímabili en ég meiðist svo á mínu
öðru tímabili og er frá keppni í
einhverja níu mánuði. Handboltinn
í Þýskalandi og hjá Neckarsulmer
hentaði mér svo vel þannig að ég
lít stolt til baka.“
Stórskyttan viðurkennir að hún
sé ekki sami leikmaðurinn í dag og
hún var þegar hún fór út en hún
ætlar sér stóra hluti með ÍBV á
næstu árum.
„Ég skal alveg viðurkenna það
að hnén á mér eru ekki eins og
þegar ég var átján ára. Ég er búin
að fara í fjórar aðgerðir síðan þá,
tvær á krossbandi og tvær á lið-
þófa. Æfingaálagið í Þýskalandi er
gríðarlega mikið og þar er oft og
tíðum æft vitlaust að mínu mati.
Ég tel þess vegna að það henti
mér mjög vel að ganga til liðs við
ÍBV á þessum tímapunkti þar sem
allar styrktaræfingar sem dæmi
eru mjög einstaklingsmiðaðar. Það
er mikið uppbyggingarstarf í gangi
hjá félaginu um þessar mundir en
ég ætla rétta að vona að ég og
Sandra Erlingsdóttir getum komið
inn með eitthvað púður inn í þetta.
Mig langar að koma heim og vinna
titla og gera það með góðu fólki.
Ég og Sunna Jónsdóttir, fyrirliði
liðsins, þekkjumst vel og við
bjuggum báðar í Noregi og Sví-
þjóð á sama tíma. Hún er stór
partur af þeirri ákvörðun að ég
ákvað að koma heim og þá langaði
mig alltaf, alveg frá því að ég
dvaldi í Eyjum 2011, að snúa aftur
til Vestmannaeyja enda algjör
draumastaður,“ bætti landsliðs-
konan við.
Mér hefur alltaf liðið
hrikalega vel í Eyjum
 Birna Berg samdi við ÍBV  Stefndi alltaf þangað eftir atvinnumennskuna
Morgunblaðið/Árni Sæberg
Ánægð Birna Berg Haraldsdóttir segir að það henti sér mjög vel að fara til
ÍBV, ekki síst vegna einstaklingsmiðaðra styrktaræfinga þar.
ÓLYMPÍULEIKAR
Bjarni Helgason
bjarnih@mbl.is
„Ég tel líkurnar á því að Ólympíu-
leikarnir í Tókýó 2020 fari fram á
réttum tíma vera mjög dvínandi,“
sagði Lárus Blöndal, forseti ÍSÍ, í
samtali við Morgunblaðið í gær.
Margir íþróttamenn hafa stigið
fram að undanförnu og kallað eftir
því að leikunum verði aflýst vegna
kórónuveirunnar. Alþjóðaólympíu-
nefndin, IOC, gaf í fyrrakvöld út í
fyrsta sinn að frestun kæmi til
greina en sagði að ákvörðun um slíkt
yrði ekki tekin fyrr en eftir mánuð.
Þá hefur Ólympíusamband Kan-
ada greint frá því að það ætli sér
ekki að senda íþróttamenn á leikana
ef þeir hefjist 24. júlí eins og til
stendur og bæði Ástralía og Pólland
hafa skorað á Alþjóðaólympíunefnd-
ina að fresta leikunum.
Dick Pound, reyndasti meðlimur
IOC, sagði í viðtali við USA Today í
gærkvöld að í raun væri búið að
ákveða að fresta leikunum þó það
hefði ekki verið tilkynnt opinberlega.
Krefjandi og erfiðar aðstæður
„Mér finnst afar ólíklegt að leik-
arnir muni fara fram ef margir af
þeim íþróttamönnum sem eru með
keppnisrétt á leikunum mæta ekki.
Eins og staðan er núna finnst mér
líklegra en ekki að leikunum verði
frestað og ég hef ekki trú á öðru en
að menn hafi skilning á þeirri
ákvörðun. Faraldurinn hefur ekki
náð hámarki í Bandaríkjunum og
þau eru á eftir Evrópu þar sem há-
punkti faraldursins hefur enn ekki
verið náð. Menn hljóta að skilja að
þetta eru mjög krefjandi og erfiðar
aðstæður fyrir íþróttafólkið sem á í
stökustu vandræðum með að æfa,
sér í lagi þar sem útgöngubann
gildir,“ sagði Lárus.
Í síðustu viku sendi ÍSÍ frá sér til-
kynningu eftir fund alþjóðasér-
sambandanna með Thomasi Bach,
forseta Alþjóða ólympíunefndar-
innar, IOC. Á fundinum biðlaði Bach
meðal annars til allra hagsmunaaðila
að vera ábyrgir og leita leiða til að
koma í veg fyrir útbreiðslu kórónu-
veirunnar. Á fundinum kom einnig
fram að IOC og skipuleggjendur Ól-
ympíuleikanna stefndu að því að
halda leikana á tilsettum tíma og að
ekki væri þörf á neinum róttækum
ákvörðunum um framhald leikanna á
þessum tímapunkti.
ÍSÍ ekki tekið neina afstöðu
„Það virðist vera einhver misskiln-
ingur í gangi um að ÍSÍ styðji það að
leikarnir fari fram á tilsettum tíma.
Engin slík umræða fór fram á þess-
um fundi og ekkert var ákveðið í
þeim efnum á þessum fundi al-
þjóðasérsambandanna með IOC.
Thomas Bach talaði um að það yrðu
engar stórar ákvarðanir teknar um
frestun leikanna á þessum tíma-
punkti. Þetta var fyrst og fremst
upplýsingafundur þar sem samþykkt
var að hreyfingin myndi vinna gegn
útbreiðslu veirunnar og að stofna
ekki heilsu íþróttafólksins í hættu og
það var í raun það eina sem var sam-
þykkt. Staðan yrði svo bara skoðuð,
dag frá degi, en ÍSÍ hefur ekki tekið
neina sérstaka afstöðu um það hvar
við stöndum varðandi frestun,“ sagði
Lárus.
Endurskoða afstöðuna
Shinzo Abe, forsætisráðherra Jap-
ans, steig fram í síðustu viku og
sagði að ekki kæmi til greina að
fresta leikunum. Japanir virðast hins
vegar vera tilbúnir að endurskoða
stöðuna eftir að íþróttamenn og ýmis
sérsambönd hafa skorað á Alþjóðaól-
ympíunefndina og mótshaldara að
fresta leikunum.
„Ég skil alveg að hagsmunir for-
sætisráðherra Japan tengist því að
leikarnir fari fram á réttum tíma.
Það kom meðal annars fram á fund-
inum með Bach í síðustu viku að
þegar það var í umræðunni að fresta
leikunum hefði sú umræða haft veru-
lega neikvæð áhrif á hlutabréfa-
markaðinn í Japan. Þetta ástand hef-
ur samt mest áhrif á keppendurna
sem eru að reyna að komast á leik-
ana. Sjálfur hef ég ekki fengið nein
persónuleg símtöl en auðvitað er ís-
lenskt íþróttafólk í miklu sambandi
við skrifstofu ÍSÍ.
Það er ekki auðvelt að sinna æf-
ingum þegar allt er lokað og við
höfum reynt að finna leiðir fyrir fólk
til að halda sér í keppnisformi. Það
er útgöngubann víðs vegar í Evrópu
sem dæmi og menn hafa miklar
áhyggjur af því að fólk sé ekki í
neinni aðstöðu til þess að æfa al-
mennilega fyrir leikana sjálfa,“ sagði
forseti ÍSÍ.
Gætu skarast við aðra viðburði
Margir hafa kallað eftir því að
leikunum verði frestað í eitt til tvö ár
en á dögunum greindu Japanir frá
því að þeir væru tilbúnir að fresta
leikunum fram á haust 2020.
„Ég lít ekki á sjálfan mig sem ein-
hvern sérfræðing í þessum málum
en það sem getur gerst, ef leikunum
verður frestað, og hefur áhrif á
ákvörðunartöku um frestun, er að
þeir munu þá mögulega skarast við
aðra stóra viðburði eins og t.d heims-
meistaramót í fótbolta og þannig
yrðu áhrifin mikil og víðtæk. Það er
ansi þétt dagskrá íþróttaviðburða
næstu sumrin og það er kannski það
sem menn horfa mest til. Ég vil ekki
segja hvað sé heppilegast að gera en
augljóslega væri best að fresta leik-
unum. Ef sú verður raunin þarf svo
bara að koma í ljós hvort um verður
að ræða frestun í nokkra mánuði, ár
eða tvö,“ sagði Lárus Blöndal í sam-
tali við Morgunblaðið.
Morgunblaðið/Kristinn Magnússon
Forseti Lárus Blöndal telur líklegt
að Ólympíuleikunum verði frestað.
Augljóslega væri best að fresta
 Lárus Blöndal forseti ÍSÍ telur líkurnar á því að Ólympíuleikarnir í Tókýó 2020 fari fram á réttum
tíma vera mjög dvínandi  Fundurinn með Bach var fyrst og fremst upplýsingafundur