Ægir - 2019, Blaðsíða 30

30
leifi EA eru að fást við. Eftir netarallið
hefja þeir tilraunir annað árið í röð með
svokallaða sjávarspendýrafælu á netun-
um.
„Í fyrra átti þetta aðallega að koma í
veg fyrir að hnísan færi í netin. Í þess-
um græjum voru einhver varnaðar- eða
hræðsluhljóð frá hnísu en þau virtust
ekki alveg virka rétt því við fengum jafn
mikið af henni eða fleiri í netin þar sem
við vorum með fælurnar. Hvalirnir voru
eiginlega alltaf við fæluna, þetta voru
allt tarfar og við vorum að velta því fyr-
ir okkur hvort þetta væru einhver
frygðarhljóð frá hnísunni. Eða hvort þeir
væru eins vitlausir og við og ætluðu að
leika einhverjar hetjur og bjarga hnísu-
kúnni úr vanda!“
Gylfi segir að notkun á svona fælum
sé krafa sem erlendar vottunarstöðvar
séu farnar að setja og því sé þrýstingur-
inn á notkun þeirra ekki kominn frá Haf-
rannsóknastofnun en hún stendur að
baki rannsóknum á notkun þeirra.
„Erlendu vottunarstöðvarnar eru
með öðrum orðum farnar að stilla því
þannig upp að ef menn noti ekki svona
búnað þá fáist ekki vottun á fiskafurð-
irnar og þar með taki kaupendur ekki
frá okkur fiskinn. Fyrst vildum við fá þá
til að koma hingað og prófa búnaðinn.
Þeir sögðu að þess þyrfti ekki, þetta
virkaði 100%. En það er semsé ekki alveg
raunin en sjálfsagt að prófa sig áfram
með þetta. Reyndar hefur verið óvenju-
lítið af hnísu á slóðinni, að minnsta kosti
fram að þessu, en við erum reyndar
búnir að fá þrjár í morgun. Við étum
bara af þeim kjötið. Það er alveg sæl-
gæti.“
Saltar fisk í Grímsey
Gylfi er með sæmilegan kvóta á bátnum,
„miðað við svona bátpung, yfir þúsund
þorskígildi. Ég hef því haldið mig að
veiðum megnið af árinu. Maður hefur
verið að stoppa svona hálfan annan
mánuð til tvo yfir sumarið. Þá er bátur-
inn tekinn í skveringu og við í áhöfninni
tökum okkur frí. Ég er annars að öllu
jöfnu með netin fyrir norðan, hef aðeins
skroppið í Breiðafjörðinn ef á hefur þurft
að halda, en ætla að halda mig á heima-
miðum núna ef mögulegt er. Ég er að
verka saltfisk núna í Grímsey, hefðbund-
inn flattan fisk og er með fjóra starfs-
menn í verkuninni. Það skiptir auðvitað
máli að það sé verkaður fiskur heima í
Grímsey. Afkoman í saltfiskverkuninni
hefur líka heldur lagast með hagstæðara
gengi krónunnar,“ segir Gylfi sem varð
sjötugur í fyrra og hefur því mikla
reynslu af útgerð og fiskverkun. Hann
var í afmælisveislu sinni spurður hve-
nær hann ætlaði að hætta útgerðinni.
„Ætli ég hætti nokkuð fyrr en um næstu
aldamót. Maður er kannski svona illa
forritaður að maður getur ekki hætt að
vinna. En jú auðvitað kemur einhvern
tímann að því að maður hættir þessu.“
■ Auk áhafnarinnar á Þorleifi eru um borð fulltrúar Hafrannsóknastofnunar meðan á rallinu stendur en verkefnið er liður í
fiskistofnarannsóknum hennar.