Tölvumál - 01.01.2016, Blaðsíða 29

29
Mynd 1 – „blæðing“ frá þráðlausum netum á hæðum fyrir ofan og neðan.
Á mynd 1 er sýnt hvernig merki þráðlausra beina getur borist á milli
hæða þegar 2,4 GHz tíðnisviðið er notað. Gert var ráð fyrir því í líkaninu
að deyfingin gegnum gólfplöturnar væri 30 dB en heimilisbeinar geta
samt sem áður verið það sterkir að merki þeirra berst bæði gegnum
gólf og loft og myndin sýnir hvernig merki frá fyrstu og þriðju hæð berst
til annarrar hæðar.
Í öllum tilvikum er gert ráð fyrir að beinarnir séu í eins metra hæð og hafi
engar hindranir í kringum sig. Styrkleikurinn er stilltur eins og algengt er
í beinunum og það dugar til að merkið komi á nokkrum styrk í gegn,
eins og guli og græni litur myndarinnar sýnir. Æskilegt er að svo sé ekki
til að minnka líkur á rásasamslætti.
Stóri flekkurinn hægra megin við miðjuna sýnir hvað myndi gerast ef
beinir á fyrstu hæð væri stilltur á mun meira afl en leyfilegt er á Íslandi.
Hann gæti nánast einnig þjónað íbúðinni fyrir ofan. Það eru því talsverðar
líkur til að við slíkar aðstæður fari rásir að lenda saman milli óskyldra
aðila enda segir líkanið að talsvert sé um það.
Með sameiginlegu þráðlausu neti væri hægt að hafa stjórn á
sendistyrknum en jafnframt veita greiða þjónustu til íbúanna.
Mynd 2 – ás gegnum hæðina vísar til staðsetningar nýju aðgangsstaðanna.
Á mynd 2 er sýnt hvernig ímynduð lína fer þvert gegnum allar íbúðirnar
á hverri hæð og það er á þessum ás sem nýir aðgangsstaðir væru
staðsettir til að sinna húsinu. Gert er ráð fyrir að vera eingöngu með
útsendingu á 5 GHz bandinu en þó slíkt sé ekki algjörlega raunhæft eins
og tæknin er í dag er viðbúið að innan ekki langs tíma verði allur
notendabúnaður með 5 GHz tíðnibandi og í kjölfarið verður engin þörf á
að nota 2,4 GHz bandið.
Þar með verður rásaskipulag auðveldara og mun auðveldara að hafa
háan hraða og svigrúm til að auka hann enn frekar þegar tæknin þróast.
Að auki kemur á daginn að með lausn sem þessari væri hægt að draga
verulega úr sendiaflinu frá því sem venja er í dag. Aðgangsstaðirnir eru
í 2,5 metra hæð í líkaninu, neðan á loftunum. Það var aðeins á einum
stað á hverri hæð þar sem auka þurfti aflið í hámark til að ná alveg um
húsnæðið. Allar stillingar í dæmunum hér á eftir miðast við 5 GHz rásir
með 40 MHz bandbreidd og þriggja svokallaðra „spatial“ strauma, sem
er fræðilega allt að 450 Mbit/sek. samkvæmt n­staðli en 600 Mbit/sek.
samkvæmt ac­staðli. Líkanið sýnir að seinna mætti uppfæra
bandbreiddina í 80 MHz án vandamála vegna rásanotkunar.
Mynd 2 sýnir hvernig aðgangsstaðirnir eru staðsettir í íbúðunum. Hverri
íbúð dugar einn aðgangsstaður fyrir dreifinguna en vegna
burðarveggjanna er staðsetning þeirra oft á tíðum fínstillingaratriði en
forhönnunin leyfir að sjá jafnóðum hvernig til tekst. Í einni íbúð, á fyrstu
hæð lengst til hægri, er nauðsynlegt að setja tvo aðgangsstaði til að ná
til allra herbergja.
DREIFING FRÁ NÝJA KERFINU
Mynd 3 – heildarmynd af dreifingunni frá sameiginlega þráðlausa netinu.
Mynd 3 sýnir útbreiðsluna þegar búið er að „kveikja“ á öllum
aðgangsstöðunum með nýja fyrirkomulaginu. Græni liturinn ber það
með sér að dreifing um húsnæðið er í flestum tilfellum mjög góð. Einu
svæðin sem eru í skugga er hluti stigaganganna.
Mynd 4 – „blæðing“ milli hæða í nýja kerfinu.
Mynd 4 sýnir síðan hvernig merki berast frá fyrstu og þriðju hæð
gegnum loft og gólf til annarrar hæðar og ólíkt því sem gerðist á mynd
1 eru áhrifin afar lítil og styrkur alltaf það lágur, samanber gráa litinn, að
ekki verða truflanir milli rása.
Mynd 5 – útsendingasvið frá stökum beinum á 2,4 GHz.
Mynd 6 – útsendingasvið frá aðgangsstöðum í nýja kerfinu á 5 GHz.
Myndir 5 og 6 eru samanburður á því hvernig útbreiðslan myndi eiga sér
stað þar sem hefðbundinn beinir er notaður með 2,4 GHz og svo
hvernig útbreiðslan væri með sameiginlegu kerfi á 5 GHz.
Á mynd 5 sést að merkið frá íbúðinni til vinstri berst á góðum styrk yfir
stigaganginn og langt inn í næstu íbúð. Á móti kemur að eitt
herbergjanna í íbúðinni með beininum er í skugga, það er þriðja rýmið
frá vinstri, neðst, en í líkaninu er gert ráð fyrir að beinirinn sé staðsettur í
stofunni.
Mynd 6 sýnir breytinguna. Aðgangsstaður í nýja kerfinu væri staðsettur
í loftinu í skálanum og næði inn í öll herbergin en ekkert út á stigaganginn
og nánast ekkert í næstu íbúð. Í líkaninu er aflið aðeins tíundi hluti þess
sem væri í tilfellinu á undan.