Hinsegin dagar í Reykjavík - aug 2013, Qupperneq 27

27
Okkar stríð er
friðsamlegt
Kasha Jacqueline Nabagesera í viðtali við Jón Kjartan Ágústsson
Kasha Jacqueline Nabagesera er baráttukona fyrir réttindum hinsegin fólks í Úganda og stofnandi mannréttindasamtakanna
Freedom and Roam sem berjast fyrir réttindum lesbía, tvíkynhneigðra og trans-kvenna þar í landi. Kasha er ein þeirra örfáu
sem hafa komið opinberlega fram sem hinsegin einstaklingar í Úganda, þar sem samkynhneigð hegðun er refsiverð. Vegna
þessa verður hún daglega fyrir áreiti og hótunum. Úganska þingið og ríkisstjórn landsins hafa á síðustu árum beitt sér fyrir
lagafrumvarpi sem kveður á um dauðarefsingu við samkynhneigðri hegðun. Því hefur Kasha ásamt samtökunum Freedom and
Roam höfðað mál gegn úganska ríkinu og fréttablöðum sem hafa birt hatursfullan áróður. Hún hefur hvatt alþjóðasamfélagið
til að beita þrýstingi gegn lagafrumvarpi úganska þingsins og hún hefur kynnt málstað hinsegin fólks í Úganda á alþjóðavettvangi.
Kasha kom til Íslands í vor á vegum Íslandsdeildar Amnesty International og nokkurra samtaka hinsegin fólks hér á landi.
Viðtalið var tekið 26. apríl á bókasafni Samtakanna '78. Fyrst var Kasha spurð að því hve gömul hún hefði verið þegar hún hóf
baráttu sína.