19. júní - 19.06.2018, Blaðsíða 26

24 | 19. júní 2018
Upp frá þessu stigu hóparnir
fram hver af öðrum í lok nóvember og
byrjun desember. 330 konur í vísindum
deildu 106 sögum ásamt yfirlýsingu 30.
nóvember. Konur í réttarvörslukerfinu
birtu 45 reynslusögur ásamt yfirlýs-
ingu undir myllumerkinu #þögninrofin
7. desember. Sama dag sendu 265
konur í tækni-, upplýsinga- og hug-
búnaðariðnaði frá sér yfirlýsingu og
54 sögur auk þess sem fjölmiðlar birtu
yfirlýsingu frá KÍTÓN, félagi kvenna
í tónlist, sem 333 konur skrifuðu
undir og með fylgdu 25 sögur. Þann
11. desember stigu þrír hópar fram.
Fjölmiðlakonur sendu frá sér yfirlýsingu
undir myllumerkinu #fimmtavaldið
sem var undirrituð af 258 konum og
innihélt 72 sögur. Konur í flugstétt
sendu frá sér yfirlýsingu með 28
sögum undir myllumerkinu #lending
sem 600 konur höfðu skrifað undir
og 354 konur í læknastétt stigu fram
með yfirlýsingu og 10 sögum undir
myllumerkinu #ekkiþagnarskylda. 737
konur í menntageiranum sendu frá sér
34 sögur ásamt yfirlýsingu 15. desember
og 627 konur í heilbrigðisgeiranum
sendu frá sér yfirlýsingu og 53 sögur
sama dag. Tæplega tvöhundruð
konur í iðngreinum birtu átta sögur
og yfirlýsingu þann 22. desember og
konur í verkalýðshreyfingunni sendu
forystu allra heildarsamtaka launafólks
á landinu bréf um miðjan desember þar
sem þær kröfðust aðgerða. Íþróttakonur
komu fram 11. janúar 2018 undir
myllumerkinu #jöfnumleikinn en 462
nú verandi og fyrrverandi íþróttakonur
skrif uðu undir yfirlýsinguna sem innihélt
62 reynslusögur. Konur í prestastétt
sendu frá sér áskorun 15. janúar sem
65 kvenprestar höfðu skrifað undir og
fylgdi henni á sjöunda tug frásagna. 25.
janúar birtu konur af erlendum uppruna
34 sögur sem safnast höfðu í lokuðum
hópi þeirra. 660 voru í hópnum en aðeins
97 undirrituðu yfirlýsinguna vegna ótta
um öryggi sitt.
Enn fleiri hópar urðu til sem
ekki hafa birt yfirlýsingar opinberlega
ennþá en eru vettvangur stuðnings og
samstöðu fyrir konur og flestir hóparnir
sem hafa sent frá sér yfirlýsingar og
sögur eru enn virkir sem stuðningssvæði
þar sem konur geta deilt reynslu sinni og
spurt ráða.
Fleiri hópar sem ekki voru tengdir
starfsgreinum eins og #MeToo sögur af
djamminu og #MeToo fjölskyldutengsl
eru til og rauf síðarnefndi hópurinn
þögnina á áhrifaríkan hátt þann 23.
apríl með yfirlýsingu undirritaðri af 143
konum sem fylgdu 53 frásagnir undir
yfirskriftinni „Fyrir luktum dyrum“ og
myllumerkinu #aldreiaftur. Þá var í mars
stofnaður hópur undir myllumerkinu
#karlmennskan þar sem karlmenn voru
hvattir til að deila sögum sem snúa
að staðalímyndum þeirra og hvernig
karlmennskan hefur þvælst fyrir þeim í
gegnum tíðina.
M
yn
d
: F
ili
p
J
ed
ra
sz
ak
/
sh
u
tt
er
st
o
ck
.c
o
m