Læknablaðið - 01.11.2021, Page 55

L ÆKNABL AÐIÐ 2021/107 559
Yrsa Löve
06:45 Ligg vakandi, klukkan að nálgast
sjö og enn er myrkur. Verð alltaf jafn
svekkt yfir vetrarmyrkrinu en reyni að
sannfæra sjálfa mig um að myrkrið sé
hlýtt og mjúkt, enda ekkert annað að gera
í stöðunni næstu mánuðina. Fer fram úr
og sinni lágmarksviðhaldi á sjálfri mér
enda bíða bæði hundur og barn eftir
þjónustu. Eldri börnin sjá um sig sjálf,
enda eru víst „fyrstu 20 árin verst”. Fleyg
orð frá stjúpa.
07:00 Vek hvolpinn og fer með hann út
í garð að pissa. Veðrið er gott, meira að
segja roði í austri sem gefur fyrirheit um
sól í dag. Hver hefði trúað því? Ég hélt að
það yrði það erfiðasta við hvolpastand að
rífa sig út næstum því á náttfötunum með
hund að pissa löngu áður en löglegt er,
en þetta eru vanmetin forréttindi. Að fá
að anda að sér fersku súrefni splunkunýs
dags á undan öllum öðrum. Nema auðvit­
að hinum hundaeigendunum.
07:15 Inn að vekja örverpið. Þessi hvolp­
ur er besta vekjaraklukka sem ég hef átt.
Skelli hvolpinum í rúmið til sonarins
sem vaknar með bros á vör þegar hann
er sleiktur úr draumalandinu. Tek til
morgunmat og nesti meðan prinsinn kem­
ur sér á fætur. Skellum í okkur Cheeriosi
og svo út.
Sem betur fer er lítil umferð. Þetta er
eiginlega alltaf svona á mánudögum og
föstudögum. Eru svona margir í fríi þá?
08:20 Komin í vinnuna. Fer yfir
sjúklingalistann og les yfir tilvísanir
þeirra sem koma í dag. Allir nýir
nema einn. Svo mikið þægilegt að fá
góðar tilvísanir og gerir alla tíma mun
effektívari. Í dag eru sjúklingar með slæmt
frjókornaofnæmi sem ég þarf að koma
í afnæmismeðferð í vetur, einn greinist
með bráðaofnæmi fyrir sólblómafræjum.
Ég geri húðpróf og spírometríur hjá
nokkrum. Einn er með slæman krón­
ískan sinusitis með astma og annar
erf iða urticaríu sem endar mögulega á
líftæknilyfi. Skrifa öll læknabréf sjálf og
sendi rafrænt jafnóðum á heilsugæslur
viðkomandi. Klárlega langpraktískasta
sumarstarf mitt í læknadeild þegar ég
vann sem læknaritari, enda keppnisfær á
lyklaborðinu.
11:00 Unnur Steina rekur inn nefið, við
ræðum tilfelli, svo ómetanlegt að vinna
svona hlið við hlið enda gerum við mikið
af því að ráðfæra okkur hvor við aðra sem
og við aðra kollega hér. Hér er konsúlt
fjölmargra sérgreina alltaf í seilingarfjar­
lægð. Sagði einhver að stofulæknar ynnu
einir úti í horni?
14:00 Klára móttökuna, hef ekki gefið
mér tíma fyrir kaffi eða matartíma enda á
leið með hvolpinn til læknis.
15:00 Mætt með hundinn til
hundatannlæknis, vígtönn særir góminn.
Mælt með að fjarlægja tvær í þeirri
von að fullorðinsvígtennurnar komi
rétt upp. Annars eru tannréttingar
framundan. Þetta verður dýrasti hundur
Íslandssögunnar. Tölvuvasagæludýrin
á 10. áratug síðustu aldar voru klárlega
ódýrari í rekstri.
16:00 Ekki seinna vænna að borða há­
degismat. Kisi er feginn að fá smá athygli
enda ekkert verið eltur af hvolpinum í
dag. Örverpið er alsælt að fá að vera af­
skiptalaus í tölvunni með vinunum. Tek
mig til í göngu.
17:00 Hitti nokkrar eðalvinkonur og
hunda við Búrfellsgjá, göngum á Búrfell.
Það er ennþá sól, svei mér þá ef þetta
er ekki bara fimmti sumardagurinn í
ár. Tökum okkur góðan tíma í blíðunni
og spjöllum, helst sem minnst um heil­
brigðiskerfið samt, þótt flestar séum við
heilbrigðisstarfsmenn. Það er mikið hlegið
enda sumt sagt þar sem ekki verður sett á
prent. Engar búbblur samt, kannski eins
gott, enda við flestar akandi.
19:30 Legg af stað heim. Það eru nokkur
„missed calls“ á símanum frá börnunum
og „hvað er í matinn?“ SMS sem breytast
í örvæntingarfull „verður matur?“ Kem
heim og metnaðarfull föstudagspizzugerð
breytist í Flateyjarpizzupöntun.
Notalegt kvöld, Gísli Marteinn mættur
aftur á skjáinn, hundurinn sofandi eftir
erfiðið og börnin öll heima. Ég elska samt
ekkert haustið, ég er sumartýpa. En þetta
var góður dagur. Er sofnuð um ellefu, al­
veg slétt sama um hvort Þórólfur leyfi sölu
vínveitinga til kl 22 eða 02.
Dagur í lífi ofnæmislæknis
Yrsa Löve í Læknasetrinu.
Dagmar Guðmundsdóttir tók myndina.