Fréttablaðið - 14.12.2022, Page 26

ALLT FYRIR
JÓLIN Í EINNI FERÐ
Olga Lilja og Aðalheiður Magnúsdóttir, eigandi Ásmundarsalar, hittust á
Jómfrúnni í vor og byrjuðu að plana jólasýninguna. FRÉTTABLAÐIÐ/SIGTRYGGUR
Á Jólasýningunni í Ásmundarsal má finna fjölbreytt verk eftir 32 samtíma-
listamenn og ljósmyndara á öllum aldri. FRÉTTABLAÐIÐ/SIGTRYGGUR ARI
Á Jólasýningunni í Ásmundar­
sal er ungum og upprennandi
listamönnum teflt saman við
eldri og rótgrónari. Olga Lilja
Ólafsdóttir sýningarstjóri segir
myndlist vera jólagjöfina í ár.
tsh@frettabladid.is
Jólasýningin í Ásmundarsal er hald­
in í fimmta sinn í ár og er orðin að
föstum lið í aðventunni fyrir marga
Íslendinga. Í þetta sinn er sýningin
með nýju sniði því færri listamenn
taka þátt en oft áður.
„Okkur langaði svolítið að halda
í þessa gömlu hefð en fara samt ein­
hverjar óhefðbundnar og skemmti­
legar, nýjar leiðir. Í fyrra þá held ég
að listamennirnir hafi verið um 180
talsins og okkur langaði núna í ár að
hafa annan háttinn á, þannig að við
völdum 32 samtímalistamenn og
ljósmyndara og náðum þá að fylgja
þeim eftir í um hálft ár meðan á öllu
undirbúningsferlinu stóð,“ segir
Olga Lilja Ólafsdóttir sýningarstjóri.
Sama leiðarstefið
Olga Lilja segir að sýningin í ár sé ef
til vill aðeins meira sýningarstýrð
en áður þótt leiðarstef sýninganna
sé alltaf það sama.
„Hugmyndin kemur raunar frá því
þegar Listvinasalurinn var hérna á
sjötta áratug síðustu aldar, þá voru
haldnar sýningar með sama sniði.
Þá var verið að tefla ungum og upp­
rennandi listamönnum og rótgrón­
ari listamönnum saman. Það hefur
haldist sem leiðarstef hjá okkur. Þótt
hópurinn sé minni þá erum við með
listamann eins og Klemens Hann­
igan sem var að útskrifast með BA í
myndlist í vor og líka listakonu eins
og Guðnýju Rósu Ingimarsdóttur
sem hefur starfað sem myndlistar­
maður til margra ára og hefur haldið
yfirlitssýningu á Kjarvalsstöðum,
sem dæmi.“
Að sögn Olgu Lilju voru sýning­
arnar sem Listvinasalurinn hélt á
6. áratugnum einnig sölusýningar
þar sem margir af þekktustu lista­
mönnum þess tíma sýndu verk sín,
svo sem Kristján Davíðsson, Jóhann­
es Kjarval og fleiri.
Hittust á Jómfrúnni
Hvernig var undirbúningsferli sýn-
ingarinnar?
„Ég og Aðalheiður Magnúsdóttir,
sem er eigandi Ásmundarsalar,
hittumst í vor á Jómfrúnni, sem er
svolítið viðeigandi, til þess að plana
jólasýningu. Þá ákváðum við hvert
konseptið yrði og í framhaldinu
var farið í það að teikna upp lista og
vinna með listamönnunum.“
Ein stærsta breytingin frá fyrri
jólasýningum er sú að nú unnu
listamennirnir verk sérstaklega fyrir
sýninguna í stað þess að koma með
fullmótuð verk til sýningarstjóra.
Olga segist samstarfið við lista­
mennina hafa verið til fyrirmyndar.
„Maður er rosalega þakklátur
og meyr fyrir þennan metnað sem
listamennirnir hafa lagt í sýning­
una. Það er búið að vera ótrúlega
skemmtilegt að fylgja þeim eftir og
vinna með þeim, þetta eru allir sem
einn algjörlega frábærir listamenn.“
Pósthús í Gryfjunni
Í fyrri jólasýningum hefur Gryfj­
unni í Ásmundarsal verið breytt í
prentverkstæði þar sem listamenn
hafa fengið að spreyta sig á því að
búa til prentlistaverk á staðnum.
Í ár var þó hafður annar háttur á
og hefur Gryfjunni verið breytt í
gamaldags pósthús.
„Við fórum í mjög skemmtilegt
samstarf við Póstinn og erum búin
að útbúa eftirmynd af pósthúsi eins
og þau voru hérna á árum áður. Ég
var svo heppin að geta farið í fjár­
sjóðsleit hjá Póstinum og fundið
ýmsa muni sem gera rýmið trú­
verðugt og síðan fengum við til
liðs við okkur nokkra listamenn og
ljósmyndara sem útbjuggu sérstak­
lega kort fyrir sýninguna. Þannig að
fólk getur komið í Gryfjuna, skrifað
jólakort og póstlagt þau,“ segir Olga
Lilja.
Þá verða einnig ljósmyndarar á
staðnum um helgar sem bjóðast til
að taka myndir af gestum sem þeir
geta svo sett í jólakortin.
„Þannig að ekki er nóg með að þú
getir sent póstkort heldur getur þú
líka sent mynd af þér eins og fólk
gerði hér áður fyrr. Við erum svo­
lítið að endurvekja þessa gömlu
jólahefð,“ segir Olga Lilja.
Vegleg sýningarskrá
Sýningarskrá jólasýningarinnar í
ár er þó ekki bara einfaldur verka­
listi eins og áður hefur verið heldur
er um að ræða veglegt bókverk með
viðtölum við listamennina, sýning­
artextum og myndum af verkunum.
„Okkur langaði á sama tíma og
við minnkuðum hópinn í ár að
veita dýpri innsýn í hugarheim
listamannanna. Maður hefur orðið
þeirrar gæfu aðnjótandi að fara í
fullt af vinnustofuheimsóknum
hjá listamönnum og það veitir svo
skemmtilega innsýn í hugarheim
listamannsins, þannig að okkur
langaði svolítið að opna þennan
heim fyrir listunnendum sem
kannski alla jafna hafa ekki greitt
aðgengi að vinnustofum lista­
manna,“ segir Olga Lilja.
Hún bætir því við að í afgreiðslu­
borðinu í sýningarrýminu megi
einnig finna ýmsa áhugaverða muni
sem tengjast á einn eða annan hátt
vinnuferli listamannanna.
Myndlist í jólagjöf
Jólasýningin var opnuð þann 3.
desember síðastliðinn og segist
Olga Lilja þegar hafa orðið vör við
mikinn áhuga hjá fólki.
„Það er búið að vera mjög mikill
áhugi og gaman að segja frá því að
almennt finnst mér að fólk sé að
taka rosalega vel í þessu breytingu,
sé rosalega þakklátt fyrir að það
sé verið að gera þetta með aðeins
öðru sniði í ár þannig að hvert og
eitt verk fái meira að njóta sín,“
segir hún.
Er myndlist jólagjöfin í ár?
„Engin spurning. Ég er nú þegar
búin að kaupa tvö verk af sýning­
unni sem ég ætla að gefa í jólagjöf.“
Jólasý ningin í Ásmundarsal
stendur opin þar til á Þorláksmessu
og samhliða sýningunni verða
haldnir ýmsir viðburðir og uppá­
komur.
„Svo er gaman að segja frá því að
einn af listamönnunum, Styrmir
Örn Guðmundsson, verður með
tónleika í sýningarrýminu 21. des­
ember. Hann mun fljúga hingað frá
Berlín þar sem hann býr og starfar
með stáltrommu í ferðatöskunni og
mun spila jólalög á stáltrommuna
fyrir áhugasama,“ segir Olga Lilja. n
Jólasýning með nýju sniði
Maður er rosalega
þakklátur og meyr
fyrir þennan metnað
sem listamennirnir
hafa lagt í sýninguna.
Hendrikka
Waage hefur
vakið athygli
undanfarin ár
fyrir málverk sín
af konum með
eitt eyra.
MYND/AÐSEND
tsh@frettabladid.is
Listakonan Hendrik ka Waage
stendur fyrir listaverkauppboði á
nýju málverki og rennur allur ágóði
til styrktarsjóðsins Góðvildar.
Hendrikka hefur á undanförnum
árum málað verk þar sem gefur að
líta konur með eitt eyra sem hafa
vakið mikla athygli. Hugmyndin
að þessum listaverkum Hendrikku
endurspeglar hraða nútímans með
gríðarlegu magni upplýsinga úr
öllum áttum og að sögn hennar eru
skilaboðin „þú þarft ekki að hlusta
eða trúa öllu sem þér er sagt“.
Nýjasta verk Hendrikku ber tit­
ilinn Serenity og er mynd af fimm
konum málað með akrýl og olíu.
Allur ágóði af sölu listaverksins fer
til Góðvildar og verður notaður
til þess að senda jólasveina ásamt
gjöfum til langveikra og fatlaðra
barna á höfuðborgarsvæðinu.
Þetta er annað árið sem Góðvild
gefur slíka gjöf og í tilkynningu
kemur fram að í fyrra hafi verið
mikil ánægja meðal barnanna
með jólasveinana sem fóru í skóla,
frístundaheimili, hvíldarheimili
og víðar.
Hend r ik k a seg ir verkef nið
standa henni mjög nærri en frændi
Hendrikku er fjölfatlaður og í fyrra
þegar hún tók eftir verkefni Góð­
vildar hugleiddi hún að vera með
að ári. Verk Hendrikku verður til
sýnis í Gallery List, Skipholti 50,
en verkið verður boðið upp á Face­
book­síðu Góðvildar og stendur
uppboðið til sunnudagsins 18.
desember klukkan 21.00. n
Málverkauppboð Hendrikku Waage
22 Menning 14. desember 2022 MIÐVIKUDAGURFRÉTTABLAÐIÐMENNING FRÉTTABLAÐIÐ 14. desember 2022 MIÐVIKUDAGUR