Víkurfréttir - 17.08.2022, Blaðsíða 10

Fékk hlaupabakteríuna
frá móður sinni
Ellert Björn Ómarsson vinnur sem arkitekt en honum finnst fátt skemmtilegra en að hlaupa í frí-
stundum sínum. Ellert æfði fótbolta og kraftlyftingar áður en hann fór að æfa hlaup markvisst undir
leiðsögn Arnars Péturssonar, hlaupara og hlaupaþjálfara. Hann byrjaði upphaflega að fara út að
skokka vegna þess að hann hafði lítinn tíma til að stunda íþróttir samhliða skóla. Þá segir Ellert að
áhugi hans á hlaupaíþróttinni hafi kviknað eftir að mamma hans, Guðbjörg Jónsdóttir, hafi smitað
hann af „hlaupabakteríunni“.
Ellert stundaði grunnnám í arki-
tektúr í Listaháskóla Íslands en hélt
svo út til Stokkhólms í meistaranám
og útskrifaðist nú í júní. Hann vinnur
nú sem arkitekt hjá Trípólí arki-
tektum og segir það frábært að hafa
fengið vinnu strax eftir að hafa lokið
framhaldsnáminu en hann starfaði
einnig hjá Trípólí eftir grunnámið.
Ellert byrjaði að hlaupa árið 2016
til að hreinsa hugann eftir langa
skóladaga. „Árið 2016 byrjaði ég
eitthvað smá að hlaupa. Þá var ég
í Listaháskólanum og ég hafði svo
lítinn tíma af því það var svo mikið
að gera í skólanum og þetta var svo
góð hreyfing að fara út að skokka og
hreinsa hugann eftir að hafa verið í
skólanum allan daginn,“ segir hann.
„Hef bara ekki stoppað síðan“
Þá segir Ellert það vera móður
sinni að þakka að hann hafi farið
að hlaupa af fullum krafti. „Móðir
mín, sem hefur nú hjálpað mörgum
á Suðurnesjum að byrja að hlaupa,
ákvað að skrá sig í Berlínarmara-
þonið áramótin 2018–2019. Það er
svona „lottery“ hvort maður komist
inn. Hún spyr mig hvort hún ætti
ekki að skrá okkur bæði, ég vissi
svo sem ekki hverju ég var að segja
já við en sagði samt sem áður: „Jú,
jú. Gerðu það bara.“ Nema hvað, svo
komumst við inn en hún hafði áður
reynt að komast inn án árangurs,“
segir Ellert og bætir við: „Ég hugsaði
með mér: „Ef ég er að fara að hlaupa
maraþon, þá er kannski betra að æfa
eitthvað fyrir það.“ Ég bjó í bænum á
þessum tíma og byrjaði að æfa með
hlaupahópnum Valur skokk sem var
frábær reynsla og eignaðist ég marga
góða vini þar. Markmiðið var að æfa
fyrir Berlínarmaraþonið sem var
í september 2019 og hef ég í raun
bara ekki stoppað síðan.“ Aðspurður
hvernig það sé að deila áhugamáli
með móður sinni segir hann: „Það er
mjög skemmtilegt! Upprunalega var
planið að fylgja mömmu í Berlínarm-
araþoninu en svo komst ég að því að
ég gæti hlaupið hraðar og setti mig
þá í samband við Arnar Pétursson
sem setti upp sérhæft prógram fyrir
mig til að undirbúa mig fyrir Berlín.
Það gekk mjög vel og hef ég notið að-
stoð hans fyrir stærri keppnir síðan
þá. Þó að keppnishraðinn hjá okkur
mömmu sé ekki sá sami þá tökum
við nú alveg rólegt skokk saman og
spjöllum. Hún er líka einn af mínum
helstu stuðningsmönnum og lætur
sig ekki vanta á hliðarlínuna til að
hvetja mig áfram.“
Ekkert jafnast á við hlaup
eftir erfiðan dag
Auk þess að hlaupa og vinna sem
arkitekt tekur Ellert að sér smíða-
verkefni á sumrin en hann er einnig
menntaður smiður. Í sumar hefur
hann hlaupið í kringum 60–80 kíló-
metra á viku. „Ég væri að hlaupa
fleiri kílómetra en í sumar er ég
búinn að vera á fullu að smíða. Það
er líkamleg vinna og maður þarf
að taka það inn í hlaupabókhaldið.
Það er ekki það sama og vera í skrif-
stofuvinnu og að vera að smíða
allan daginn,“ segir Ellert. Hann
segir ekkert jafnast á við að fara út
að hlaupa eftir langan og erfiðan
dag. „Líkamlega heldur þetta mér í
formi en andlega þá eru hlaupin mitt
„therapy“. Ef það var erfiður dagur í
vinnunni eða ef það er mikið búið
að vera í gangi í hausnum á mér þá
jafnast ekkert á við að fara út að
hlaupa í náttúrunni. Það gefur mér
innri ró að fara út og fá að „pústa“
aðeins,“ segir hann.
Aðspurður hver besta minning
hans frá hlaupi sé segir hann: „Það
eru einhvern veginn þessi stóru
hlaup sem maður hefur tekið þátt í
sem eru manni alltaf minnisstæð. Í
Berlín 2019, eftir 41 kílómetra eða
þegar það er einn kílómetri eftir, þá
er hlaupið í gegnum Brandenborgar-
hliðið. Þetta er sögulegt hlið og það
var töfrandi stund að hlaupa þar í
gegn. Svo stendur Laugavegurinn
2020 líka upp úr, að koma í mark í
Húsadal var alveg geggjuð tilfinning.“
Hleypur til styrktar Krafts
Ellert mun hlaupa 42,2 km í Reykja-
víkurmaraþoni Íslandsbanka sem
er haldið næstu helgi. Hann ætlar
að hlaupa til styrktar Krafts, stuðn-
ingsfélags fyrir ungt fólk sem hefur
greinst með krabbamein og aðstand-
endur, en hann hefur hlaupið fyrir fé-
lagið síðan 2017. „Sigfinnur Pálsson,
frændi minn og jafnaldri, lést úr
krabbameini árið 2010. Í framhaldi
af því hefur fleira fólk í kringum mig
greinst og hefur fengið frábæra að-
stoð frá Krafti. Mér finnst starf fé-
lagsins og skilaboðin líka bara vera
svo flott: „Lífið er núna.“ Það gleður
mig að geta hjálpað öðrum með því
að gera það sem ég elska. Að hlaupa.
Ég hleyp fyrir Sigfinn frænda og alla
þá sem hafa, eru og munu nokkurn
tímann þurfa að berjast við krabba-
mein,“ segir Ellert.
„Ég er búinn að vera með hugann
við þetta [maraþonið] í vetur og var
að æfa úti í Stokkhólmi. Það er ynd-
islegt að vera þar, margar skemmti-
legar hlaupaleiðir og mikið skóglendi.
Undirbúningurinn hefur gengið mjög
vel og ég er virkilega spenntur fyrir
helginni. Það verður gaman að fá að
taka þátt í Reykjavíkurmaraþoninu
eftir þriggja ára hlé,“ segir Ellert.
Thelma Hrund Hermannsdóttir
thelma@vf.is
Í Berlín 2019,
eftir 41 kílómetra
eða þegar það er einn
kílómetri eftir, þá er
hlaupið í gegnum
Brandenborgarhliðið.
Þetta er sögulegt
hlið og það var
töfrandi stund að
hlaupa þar í gegn . . .
Ellert við Gosstöðvarnar í Meradölum 2022.
Úr einkasafni
Með mömmu í markinu á Reykjavíkurmaraþoninu 2019 (hálf-maraþon).
Úr einkasafni
Ellert, með íslenska fánann á brjóstinu, hleypur í gegnum
í Brandenborgarhliðið í Berlinarmaraþoninu 2019.
Mynd tekin af skipuleggjundum hlaupsins
10 // vÍkurFrÉttir á suðurNEsJuM