Bændablaðið - 06.10.2022, Blaðsíða 1

Kæru gestir.
Það er okkur sem stöndum að sýningunni Íslenskur
landbúnaður 2022 sönn ánægja að bjóða ykkur velkomin.
Landbúnaðarsýningin sem haldin var í Höllinni 2018 sló öll
aðsóknarmet. Þangað streymdi fólk alls staðar að af landinu
sem sannar að íslenskur landbúnaður á djúpar rætur í
þjóðarsálinni. Og eitt er víst að íslenskur landbúnaður nýtur
enn meiri stuðnings meðal þjóðarinnar á tímum þar sem geisa
plágur og stríð. Það er ekki aðeins að hér séu framleiddar
landbúnaðarafurðir sem eru lausar við mengun úr jarðvegi
og óhóflegar sýklavarnir heldur er það mikilsvert öryggisins
vegna að hafa öflugan innlendan landbúnað.
Undirritaður er handviss um að sýningin í ár mun vekja mikla
athygli og gagnast landbúnaðinum á ýmsa vegu. Landbúnaður
spannar allt landið og er afar mikilvægur í samfélaginu.
Sjálfur held ég að greinin muni eflast í framtíðinni því að
ungt fólk sækir í fjölbreytnina. Íslenskur landbúnaður er
síður en svo einhæfur og getur byggt á sínu góða orðspori
sem felst í hreinum og hollum framleiðsluvörum. Þá ber að
hafa í huga að stöðugt opnast nýir markaðir fyrir heilnæmar
landbúnaðarvörur. Neytandinn er betur upplýstur um innihald
og uppruna matvöru í krafti alnetsins. Sá fróðleikur styrkir
íslenskan landbúnað.
Sýningin Íslenskur landbúnaður 2022 endurspeglar íslenskan
landbúnað dagsins. Þar verður mikið af stórum og litlum
tækjum bæði á úti- og innisvæði. Þarna verða allir helstu
vélasalar landsins og þjónustufyrirtæki landbúnaðarins. Þá
eru fyrirtæki sem tengjast ferðaþjónustu og húsbyggingum
ýmiss konar áberandi. Rekstrarvörur verða kynntar og ekki síst
framleiðsla bænda. Matvæla- og afurðafyrirtæki kynna einnig
sínar fjölbreyttu og gómsætu afurðir svo fátt eitt sé nefnt.
Að lokum er við hæfi að minna á að bændur eru vörslumenn
landsins. Við eigum stórt og á margan hátt ósnert land. Slík
gæði fara ekki fram hjá erlendum aðilum er búa við aðkrepptar
byggðir og mengun hvers kyns. Þegar horft er til landsins okkar
góða þá koma upp í hugann kveðjuorð Gunnars á Hlíðarenda
í Gunnarshólma:
Sá eg ei fyrr svo fagran jarðargróða,
fénaður dreifir sér um græna haga,
við bleikan akur rósin blikar rjóða.
Hér vil ég una ævi minnar daga
Alla sem guð mér sendir.
Frá útisvæði Landbúnaðarsýningarinnar á Selfossi árið 1978. Mynd / Héraðsskjalasafn Árnesinga
Sýningarskrá
Stórsýning í Laugardalshöllinni
Ólafur M. Jóhannesson, framkvæmdastjóri sýningarinnar Íslenskur
landbúnaður 2022.
2022