Arkitektúr og skipulag - 01.12.1988, Qupperneq 82

í upphafi árs hóf Hafsteinn Ólafsson að byggja tilraunahús
norðaustan við rannsóknarstofuskála Rannsóknastofnunar
byggingariðnaðarins. Húsið er að því leyti nýjung að aðskilin
eru veðurhjúpur og innri hólfun hússins þannig að óupphitað
rými myndast allt í kringum húsið. Húsið er því eins og Haf-
steinn kallar það „tvöfalt hús“.
Starfsmenn Rb hafa fylgst með þessari byggingu stig af stigi
á byggingartíma þess. Byggingaraðferðin er tæknilega séð
rökrétt enda með henni sameinaðir kostir loftræstrar út-
veggjaklæðningar og þörf nútímamannsins fyrir glerskála við
hús sitt sem virðist vera algeng í dag.
Ljóst er að húsgerðin hefur ýmsa kosti fram yfir venjuleg
hefðbundin timburhús. í fyrsta lagi sparast að mestu smíði
glugga og frágangur þeirra í húsgrind sem er vandmeðfarinn
og oft misheppnaður. Auk þess sem húsið er að utan klætt
með viðhaldsléttu efni. Þetta tvennt, auk þess að eðli upp-
byggingarinnar er þannig að lítil hætta ætti að vera á vatnslek-
um, skapar húsinu nokkra sérstöðu.
Þegar byrjað var að kynda innra húsið varð ytra rýmið eðli-
lega mjög rakt. En þegar settar voru þaktúður hvarf móðan
eins og dögg fyrir sólu. Þótt búist hafi verið við þessum áhrif-
um loftræstingarinnar var þó sjón sögu ríkari hvað þetta varð-
ar.
Húsið við Rb er frumraun Hafsteins með þessa húsgerð.
Auðvitað lærist margt við slíka tilraun í fullum mælikvarða
sem nýtist við sams konar viðfangsefni í framtíðinni. Hér er
einkum átt við ýmis smáatriði eða deililausnir og nýting rýmis-
ins innan veðurhjúpsins er aðeins heft af andagift þess hönn-
uðar sem það skipuleggur.
Gerðar voru mælingar í húsinu á raka- og hitastigi frá því
um miðjan mars og fram í apríl. Húsið var á þeim tíma hitað
með tveimur rafmagnsofnum. Meðalhiti inni fjögur mælitíma-
bil sveiflaðist milli 18 og 23°C og rakastigið milli 26 og 29%
HR. Allan þann tíma hélst ytra rýmið algjörlega rakafrítt og
þurrt.
Að öllu samanlögðu er þó hvað mestur kostur við þessa
húsagerð sá að verkframkvæmdin sjálf er einföld og ætti að
draga úr algengum byggingargöllum sem rekja má til flókinna
verkþátta og mistaka á byggingartíma." ■
Hafsteinn Ólafsson, byggingam.
ARKITEKTÚR OG SKIPULAG