Tímarit lögfræðinga - 01.08.2024, Blaðsíða 9

155
Andri Fannar Bergþórsson
um leið og upplýsingarnar eru birtar opinberlega, en hugsanlega
áður en markaðurinn hefur náð að bregðast við þessum jákvæðu
upplýsingum. Framkvæmdastjórinn nær þá að kaupa hlutabréfin
áður en hlutabréfaverðið hefur hækkað vegna nýju upplýsinganna
en samt sem áður eftir að upplýsingarnar hafa verið birtar
opinberlega og teljast því ekki lengur innherjaupplýsingar. Jafnvel
þótt upplýsingarnar sem framkvæmdastjórinn bjó yfir þegar
viðskiptin fóru fram teljist ekki lengur innherjaupplýsingar
má segja að hann hafi notfært sér upplýsingarnar með því að
vera á undan öðrum á markaði að bregðast við þegar þær voru
gerðar opinberar. Því eru ákveðin rök fyrir því að fella háttsemi
framkvæmdastjórans undir innherjasvik.
Markmiðið með þessari grein er að svara því hvort og
þá hvenær hægt sé að fremja innherjasvik eftir að innherja­
upplýsingar hafa verið gerðar opinberar. Það felur í sér annars
vegar að greina kjarna innherjasvika og hins vegar að svara
því hvenær innherjaupplýsingar eru opinberar í skilningi
Markaðssvikareglugerðar Evrópusambandsins (ESB) frá 20143
(MAR) og teljast því ekki lengur innherjaupplýsingar.
Umfjölluninni er skipt upp með þeim hætti að í öðrum
kafla er vikið að kjarna innherjasvika samkvæmt 1. mgr. 8. gr.
MAR, sem felur í sér að notfæra sér yfirburði sem fást með
innherjaupplýsingum á kostnað þriðja aðila. Í þriðja kafla er leitast
við að svara því hvenær innherjaupplýsingar eru opinberar í
skilningi MAR og hætta þar með að teljast innherjaupplýsingar. Í
fjórða kafla er vikið að aðalálitaefni greinarinnar, sem er það hvort
það teljist vera innherjasvik í skilningi MAR að vera á undan
öðrum þegar innherjaupplýsingar hafa verið birtar opinberlega.
Tekin eru fyrir tvö dæmi til að fara yfir takmarkatilvikin í þessu
sambandi. Niðurstaðan er sú að í vissum tilvikum er mögulegt
að fremja innherjasvik eftir að innherjaupplýsingar hafa verið
gerðar opinberar.
3 Reglugerð Evrópuþingsins og ráðsins (ESB) um markaðssvik nr.
596/2014 var birt í Stjórnartíðindum EB 12. júní 2014, felld inn í EES­
samninginn með ákvörðun sameiginlegu EES­nefndarinnar 25. október
2019 nr. 259/2019 og birt í EES­viðbæti Stjórnartíðinda 12. janúar 2023.
Reglugerðin var síðan tekin upp í íslenskan rétt með setningu laga nr.
60/2021 um aðgerðir gegn markaðssvikum.