Tímarit lögfræðinga - 01.08.2024, Blaðsíða 118

264
Frávik og skýringar á tilboðum
hliðsjón af framangreindum meginreglum verður þessi krafa
útboðsgagna ekki skilin á annan hátt en að boðin lyf hafi þurft
að hafa markaðsleyfi sem miðaðist við þrjár gjafir. Hafi kærði
haft annað í huga bar honum að taka það skýrt fram og orða
skilyrðin með öðrum hætti strax frá upphafi.
Af úrskurðinum leiðir að kaupendum ber að orða kröfur sínar
með nákvæmum hætti strax í upphafi við útgáfu útboðsgagna.
Samkvæmt 1. mgr. 49. gr. loi. skulu tæknilýsingar vera í
útboðsgögnum. Með tæknilýsingu er átt við lýsingu á andlagi
innkaupa þar sem kaupandi skilgreinir þarfir sínar með
greinargóðum hætti. Í tæknilýsingu skulu koma fram lýsingar
á gæðum og eiginleikum þess sem kaupa á inn. Í 3. mgr. 49. gr.
loi. er kveðið á um að tæknilýsingar skuli veita fyrirtækjum
jöfn tækifæri og megi ekki leiða til ómálefnalegra hindrana á
samkeppni við opinber innkaup. Þannig er markmið reglna
um tæknilýsingar að koma í veg fyrir hugsanlega mismunun
fyrirtækja bæði á milli ríkja og innan þess ríkis sem innkaup fara
fram í. Í 5. mgr. ákvæðisins kemur því fram að tæknilýsingar skuli
ekki vísa til sérstakrar gerðar, framleiðanda, sérstakrar vinnslu,
vörumerkja, einkaleyfa, tegundar, uppruna eða framleiðslu með
þeim afleiðingum að fyrirtækjum sé mismunað eða ákveðin
fyrirtæki útilokuð frá þátttöku í innkaupunum, enda helgist
slík tilvísun ekki beint af efni samnings. Í sérstökum tilvikum
er tilvísun til þessara þátta heimil þegar lýsing á efni samnings
er ekki möguleg með öðrum hætti, en slíkri tilvísun verður að
fylgja orðalagið „eða jafngildur“ eða sambærilegt orðalag.
Í ákvæðum 69. – 72. í lögunum er svo fjallað um þær kröfur
sem heimilt er að gera í útboðsgögnum til bjóðenda. Þannig getur
kaupandi sett tiltekin skilyrði fyrir þátttöku bjóðanda í útboði
en skilyrðin geta einungis lotið að kröfum til starfsréttinda,
fjárhagsstöðu eða tæknilegrar og faglegrar getu. Mikilvægt er
að greint sé á milli þessara skilyrða sem sett eru fyrir þátttöku
bjóðanda og svo þeirra krafna sem gerðar eru til þess sem kaupa
á inn í útboðsgögnum. Sé það ekki gert getur það dregið úr vægi
mats á tilboðum bjóðenda.