Tímarit lögfræðinga - 01.08.2024, Blaðsíða 86

232
Aðildarhæfi deilda eða eininga innan félaga
varðar skort á reglum um boðvald en einnig á grundvelli umráða
yfir eignum. Hægt er að bæta frekari málavöxtum við dæmið.
Undir rekstri málsins fyrir héraði fer aðalfundur ÍR fram. Á
fundinum er ný stjórn Deildarinnar kosin og er fyrsta verk
hennar að ráðstafa nær öllum fjármunum af bankareikningum
Deildarinnar yfir á bankareikninga sem eru í umráðum
aðalstjórnar ÍR. Rökin fyrir þessu er að nýta eigi fjármunina
til reksturs félagsins í heild til hagsbóta fyrir allar deildir og
iðkendur ólíkra íþróttagreina. Héraðsdómari tekur álitaefni
varðandi aðildarhæfi Deildarinnar til umfjöllunar af sjálfsdáðum
og kemst að þeirri niðurstöðu að Deildin sé ekki félag en sé
engu að síður aðili sem geti átt réttindi og borið skyldur. Byggist
sú niðurstaða á því að ekki séu sérstakar reglur um boðvald
stjórnareininga innan ÍR yfir Deildinni í samþykktum ÍR og þá
hafi Deildin samkvæmt ársreikningi yfir umtalsverðum eignum að
ráða, sem í raun telji meirihluta heildareigna ÍR. Héraðsdómari
fellst á málatilbúnað A og dæmir Deildina til greiðslu kröfu á
grundvelli vanefnda á samningsskuldbindingum. Deildin áfrýjar
málinu til Landsréttar. Við meðferð málsins fyrir Landsrétti vekur
lögmaður Deildarinnar athygli dómsins á breyttum aðstæðum
Deildarinnar hvað varðar umráð yfir fjármunum.
Fyrir liggur að aðilar geta misst rétthæfi sitt undir meðferð
mála fyrir dómi og eru dæmi um slík tilvik í dómaframkvæmd.110
Fyrir Landsrétti stendur að taka afstöðu til þess hvort aðili sem
talinn var geta átt réttindi eða borið skyldur af héraðsdómi teljist
nú hafa glatað rétthæfi sínu sökum þess að hann hafi ekki umráð
yfir nægilegum fjármunum til þess að fullnægja megi dómkröfu
á hendur honum. Ef Landsréttur fylgir nálgun Hæstaréttar í
H 9. nóvember 2022 (18/2022) (Körfuknattleiksdeild ÍR) má leiða
líkum að því að Landsréttur leggi til grundvallar upplýsingar úr
ársreikningi ÍR, þar sem fram kemur að Deildin hafi yfir að ráða
umtalsverðum fjármunum, sem í raun nemi meirihluta þeirra
eigna hins almenna félags ÍR. Þetta renni stoðum undir að Deildin
njóti fjárhagslegs sjálfstæðis. Þar sem ekki eru sérstök ákvæði
110 Sjá t.d. H 18. febrúar 2011 (83/2011) (Sebastes ehf.), sem vísað er til í kafla
3.1.