Tímarit lögfræðinga - 01.08.2024, Page 93

239
Arnljótur Ástvaldsson
5.3.3 Áhrif dóms Hæstaréttar í (dóma)framkvæmd
Í þessum undirkafla verður fjallað stuttlega um það hvaða áhrif
dómur Hæstaréttar hefur nú þegar haft á dómaframkvæmd lægri
dómstiga, og eins um hvaða áhrif (ef einhver) nálgun Hæstaréttar
kann að hafa í framkvæmd, þ.e. í tengslum við hvernig félög
haga innra skipulagi sínu.
5.3.3.1 Áhrif í dómaframkvæmd
Landsréttur hefur a.m.k. í tveimur málum lagt nálgun Hæsta­
réttar í máli H 9. nóvember 2022 (18/2022) (Körfuknattleiksdeild
ÍR) til grundvallar niðurstöðu um aðildarhæfi deilda innan
almennra félaga, nánar tiltekið í L 11. nóvember 2022 (513/2021)
(Knattspyrnufélag Reykjavíkur) og L 17. nóvember 2023 (233/2022)
(Knattspyrnudeild Ungmennafélagsins Víkings).
Í máli L 11. nóvember 2022 (513/2021) (Knattspyrnufélag
Reykjavíkur) háttaði svo til að körfuknattleiksmaður hafði gert
samning við körfuknattleiksdeild Knattspyrnufélags Reykjavíkur
en stefndi síðan fyrir dóm Knattspyrnufélagi Reykjavíkur (ekki
körfuknattleiksdeildinni) til greiðslu launanna. Félagið krafðist
sýknu, m.a. á grundvelli aðildarskorts. Málum var þannig
öðruvísi farið en í H 9. nóvember 2022 (18/2022) (Körfuknattleiksdeild
ÍR), þar sem einungis körfuknattleiksdeildinni hafði verið stefnt.
Landsréttur vísaði til þess að samkvæmt lögum Knattspyrnufélags
Reykjavíkur færi aðalfundur félagsins með æðsta vald í öllum
málefnum félagsins en að á milli aðalfunda færi aðalstjórn
þess með æðsta valdið, þ.m.t. hvað fjármál félagsins varðaði.
Þá bæri aðalstjórnin endanlega ábyrgð á fjármálum deilda. Á
þessum grundvelli og með vísan til niðurstöðu Hæstaréttar í H 9.
nóvember 2022 (18/2022) (Körfuknattleiksdeild ÍR) taldi Landsréttur
að Knattspyrnufélagi Reykjavíkur hefði verið réttilega stefnt til
varnar í málinu. Var félagið dæmt til greiðslu vangoldinna launa,
ásamt dráttarvöxtum.
Í máli L 17. nóvember 2023 (233/2022) (Knattspyrnudeild
Ungmennafélagsins Víkings) krafðist knattspyrnuþjálfari bóta frá
knattspyrnudeild almenns félags vegna uppsagnar sem hann
taldi ólögmæta. Landsréttur leysti úr álitaefni um aðildarhæfi
deildarinnar í málinu með því að fylgja nálgun Hæstaréttar