Golf á Íslandi - 01.12.2008, Blaðsíða 44

44 GOLF Á ÍSLANDI • www.golf.is
Erfiður en áhugaverður öldungur
Hesketh er elsti golfvöllurinn í Southport, stofnaður
1885. Hann er að hálfu leyti strandvöllur og að hálfu
leyti skógarvöllur eða parkland eins og Bretar kynna
hann. Hesketh liggur við vel varðveitt og verndað
náttúrusvæði þangað sem sjávarfuglar og fleiri villt
dýr sækja í og gleðja augu og náttúruunnenda í
heimsókn sinni.
Hesketh er einn af þeim völlum sem eru notaðir fyrir
úrtökumót fyrir Opna breska mótið þegar það fer
fram á Royal Birkdale. Fleiri stór mót áhugamanna,
kvenna, karla– og öldunga eru reglulega haldin á
Hesketh.
Einn frægasti kylfingur Breta frá upphafi vega,
Henry Cotto,n átti um tíma vallarmetið á Hesketh en
árið 1932 lék hann þennan erfiða völl á 68 höggum
átján holurnar. Til að undirstrika hvað sagan er rík á
Hesketh eins og reyndar mörgum gömlum golfvöll-
um í Bretlandi þá áttu hinir ensku Bentley bræður,
Harry og Arnold, þátt í henni með framgöngu sinni á
golfvellinum. Árið 1936 leiddi Arnold Englendinga til
sigurs á alþjóðlegu golfmóti sem haldið var samhliða
Olympíuleikunum í Berlín þar sem sjálfur Hitler gaf
verðlaunin. Með verðlaunum Arnolds fékk hann líka
forláta furutré sem hann gaf klúbbnum og það var
sett niður fyrir framan klúbbhúsið og stendur þar
enn!
Völlurinn er eins og fyrr segir strand- og „inland“-
völlur. Fyrstu tvær holurnar eru með strandívafi en
svo færist völlurinn frá sandhólunum yfir á „inland“-
svæðið þar sem tré og vötn spila stærra hlutverk frá
3. til 13. brautar. Bestu brautirnar eru 14. og 18. og
holurnar á milli eru frekar erfiðar en líka flottar. Sú
fjórtánda liggur meðfram klúbbhúsinu. Mikilvægt
er að staðsetja sig hægra megin á brautinni en
stórar glompur eru fyrir framan flötina sem ekki er
gott að lenda í. Flötin er mjó og hallar aftur á bak.
Fimmtánda brautin er líka mjög skemmtileg, með
blint upphafshögg og erfitt innáhögg. Sextánda er
fín par 3 og sautjánda er í mikilli hundslöpp og gefur
möguleika á fugli. Átjánda brautin er flott lokahola,
par 5.
Við Íslendingarnir vorum mjög ánægðir með völlinn
sem er mjög krefjandi og fjölbreyttur. Klúbbhúsið
er vinalegt með sérlega góðri þjónustu og sama má
segja um golfverslunina.
Eins og fram kemur hér í textanum að ofan er hægt að rekja
skemmtilegt sögubrot til Hesketh golfklúbbsins í Southport í
Englandi. Arnold Bentley, félagi í klúbbnum tók þátt í alþjóðlegu
sýningargolfmóti samhliða Olympíuleikunum í Berlín 1936.
Hitler gaf glæsilegan verðlaunagrip, stóran silfurplatta með
steinum úr skíra gulli og sagðist myndi afhenda hann sjálfur ef
þýskt par myndi vinna mótið en fyrirkomulagið var 72 holu para-
keppni, höggleikur, samanlagt skor beggja leikmanna taldi. Með
Bentley sem var frá Lancashire lék Tommy Thirsk frá Yourkshire.
Mótið fór fram í bænum Baden Baden í Þýskalandi.
Sagan segir að fyrir lokahringinn í Baden Baden hafi þýska
golfparið verið í efsta sæti, þremur höggum á undan Englend-
ingunum. Ribbentrop, þáverandi utanríkisráðherra Þýskalands
kom skilaboðum til Hitlers um að sigurinn væri nánast í höfn
en þriðji hringurinn var leikinn um morguninn. Lokahringurinn
eftir hádegi. Þegar í ljós kom að þeir ensku höfðu sigrað brunaði
Ribbentrop í bíl sínum til að láta Hitler vita sem var kominn
til Baden Baden. Foringinn brást hinn versti við, varð að sögn
breskra blaða brjálaður og skipaði bílstjóra sínum að aka sér
beint aftur til Berlínar. Hann ætlaði ekki að afhenda Englending-
um sigurlaunin. Það gerði Karl nokkur Henkel.
Verðlaunagripurinn var í Englandi fyrstu árin en var færður síðar
í húsakynni elsta golfklúbbs í heimi, „Golfers Club“ í St. Andrews,
Mekka golfsins.
Hitler heim í fússi
14. flötin og hrjóstrugt umhverfi. Klúbbhúsið við hlið brautarinn.
G O L F vellir í Nv-Englandi: