Hinsegin dagar í Reykjavík - 01.07.2024, Side 54

Á kortinu má sjá staði og lesa frásagnir af tilveru hinsegin fólks í Reykjavík á nokkrum tímabilum í sögunni.
Frásagnirnar gefa örlitla innsýn inn í það sýnilega og ósýnilega rými sem hinsegin fólk hefur skapað sér í
borgarumhverfinu í gegnum tíðina. Molarnir sem birtast hér eru vonandi einungis þeir fyrstu í stærri kortlagningu
sem verður aðgengileg á netinu með tíð og tíma – með fleiri og fjölbreyttari sögum úr hinsegin rýminu.
Garðastræti 2 (Samtökin ‘78)
„Staðurinn þar sem margir hittu Guðna Baldursson fyrst
lét ekki mikið yfir sér, gluggalaust kjallaraherbergi í
Garðastræti 2, en í hugum þeirra sem komu þangað
var það samt bjartasta herbergið í bænum, griðastaður
fullur af björtum vonum og baráttuþreki. Þetta var
fyrsta húsnæði Samtakanna 78 og þar tók Guðni á
móti félögum með alúð og vinsemd og baráttuandinn
var ekki síst honum að þakka.”
Úr minningargrein Böðvars Björnssonar um Guðna Baldursson,
fyrsta formann Samtakanna ‘78, á vef samtakanna 2017.
Hótel Vík og Íslensk-lesbíska (við Ingólfstorg)
„Fundarherbergi Íslensk-lesbíska [Hótel Vík árið 1986]
var stundum notað undir fundi stjórnmálasamtakanna
og einhverjar óprúttnar lesbíur gerðu sér það að leik að
láta liggja frammi lesbísk klámblöð sem höfðu borist
félaginu frá Bandaríkjunum meira í gamni en alvöru.
„Það voru einhverjar kvennalistakonur ósáttar við
þetta en ég svaraði bara sem svo að þær hefðu innst
inni bara gaman af því að fletta þessum blöðum,” segir
Stella Hauksdóttir, einn stofnenda Íslensk-lesbíska.”
Úr grein Þóru Kristínar Ásgeirsdóttur, Þrjátíu ára stríðið, í
afmælisriti Samtakanna ‘78 frá 2008.
Hinsegin sögukort