Hinsegin dagar í Reykjavík - 01.07.2024, Page 55

Lærði skólinn
„Skelfing þykir mér vænt um Geir. Hann er líka allra laglegasti piltur
og virðist vera vel viti borinn. Hann er unnustan mín. Ég kyssi hann
og læt dátt að honum, hreint eins og hann væri ungmey. Hann hefur
líka leitt okkur Gísla saman. Hann er líka unnusta Gísla. (Ég þori
samt ekki að ábyrgjast það). Við gengum oft með unnustum vorum,
og með því vér áttum báðir sömu unnustu þá urðum vér að ganga
saman.“
Um ástir menntaskólapilta, úr dagbókum Ólafs Davíðssonar frá 1882.
Amtmannsstígur 5
„Verzlun þeirra óx og dafnaði frá fyrsta vísi við Amtmannsstíginn, og
þær stöllur fylgdust að ævilangt, alla tíð búsettar við stíginn sinn í
Þingholtunum. Frú Guðrún [Jónasson] lézt fyrir skömmu, svo að stutt
varð milli þeirra, en Þingholtin sýnu fátækari, er báðar hinar merku
konur eru á braut horfnar, tregaðar af fjölmörgum bæjarmönnum
en þó einkum fósturbörnum, sem þær tóku að sér og önnuðust með
móðurlegri umhyggju.“
Úr minningargrein Lárusar Sigurbjörnssonar um Gunnþórunni Halldórsdóttur
í Morgunblaðinu 1958, af vefnum huldukonur.is.
Laugavegur 22
„Ýmis nýmæli fylgja staðnum [við opnun haustið 1989]. Þar á meðal
eru lítil VIP-plastkort með íslenska fánanum, bleikum þríhyrningi
og áletruninni Gay 22 sem er ætlað að veita hinsegin viðskiptavinum
forgang. Hundrað kort eru gefin út og seljast nær öll. „Já, rúsínan var
svo sett í pylsuendann með skiltinu „Gay 22“ fyrir ofan innganginn.
Það var algjört breikþrú.””
Ingi Rafn Hauksson fyrrum rekstrarstjóri á 22 í grein Hilmars Hildar Magnúsar,
Drottningar á djamminu, í afmælisriti Samtakanna ‘78 frá 2008.
Lindargata 49
„En þegar neyðin er stærst er hjálpin næst. Sjúkdómurinn [AIDS] kom
á tengslum milli talsmanna Samtakanna og ýmissa embættismanna.
Til að mynda gekk Ólafur Ólafsson landlæknir í það verk að greiða
fyrir húsnæðismálum Samtakanna ‘78. Því lyktaði þannig að Davíð
Oddsson borgarstjóri lét félagið hafa Lindargötu 49, sextíu fermetra
bárujárnshús, til afnota árið 1987.”
Úr grein Þóru Kristínar Ásgeirsdóttur, Þrjátíu ára stríðið, í afmælisriti
Samtakanna ‘78 frá 2008.