Ský - 01.04.2007, Síða 48

48 sk‡
Kvikmyndaskóli Íslands
Böðvar Þór Unnarsson hóf nám í Kvikmyndaskóla Íslands í fyrra,
samhliða því sem hann var að ljúka námi í fornleifafræði við Háskóla
Íslands: „Það var búið að gerjast með mér í nokkurn tíma að fara út í
kvikmyndagerð. Ég hef mikinn áhuga á heimildarmyndum og áhuga
á að segja sögur. Til að komast nær þessum áhugamálum mínum
var tilvalið að mínu mati að fara í nám í kvikmyndagerð og ég var
ekkert að bíða með það þótt ég ætti eftir að vinna lokaritgerð mína
í fornleifafræðinni.“
Böðvar hafði ekki mikið gert að því að kvikmynda áður en hann
hóf nám í Kvikmyndaskólanum: „Ég var dálítið að fikta við það
þegar ég var strákur en ekki síðustu árin. Segja má að áhuginn á
kvikmyndagerð hafi gerjast meðfram náminu í fornleifafræði. Ég sá
að vöntun var á því að fornleifafræði væri sinnt í gegnum þennan
miðil og sú staðreynd er angi af því að ég tók ákvörðun um að sækja
nám í Kvikmyndaskólanum.Ég var í fyrra í tvöföldu námi en er núna
aðeins í kvikmyndanáminu.“
Böðvar vann í sumar við fornleifagröft í Öræfasveit og var með
myndavélina með sér: „Ætlunin var að ná sér í æfingu meðfram starf-
inu, en það vannst nú ekki mikill tími til þess, enda í fullri vinnu við
að grafa og erfitt að mynda í leiðinni. Ég mætti samt góðum skilningi
og fékk að taka fram myndavélina af og til og mynda það sem við
vorum að gera. Um leið var ég að finna út hverjir væru möguleikarnir
á að gera heimildarmyndir um fornleifagröft.“
Böðvar segir fjölbreyttan hóp nemenda í skólanum: „Í mínum
bekk koma nemendur úr mörgum áttum og eftir að hafa farið í
grunninn á alhliða kvikmyndagerð í upphafi, höfum við fundið
okkur þær greinar í kvikmyndagerð sem áhuginn er mestur á og
störfum saman og hvert í sínu lagi. Við erum núna að læra um leik-
stjórn auk þess sem lokaverkefnin eru í undirbúningi.“
Böðvar er að lokum spurður hvort hann hafi gert upp hug sinn
hvort hann ætli að starfa sem kvikmyndagerðarmaður eða fornleifa-
fræðingur: „Ég er alveg búinn að gera það upp við mig að starfa að
kvikmyndagerð, svo framarlega sem áætlanir mínar standast. Ég fann
mig fljótt í faginu eftir að ég hóf námið og áhuginn hefur aukist.
Það hefur ekki reynst erfitt fyrir þá sem hafa útskrifast að fá vinnu
við kvikmyndagerð og ég ætla að reyna fyrir mér á þessum markaði
þegar ég hef útskrifast. Ég er allavega ekki í augnablikinu að hugsa
um framhaldsnám, en útiloka það ekki enda veit maður aldrei hvað
framtíðin ber í skauti sér.“
Böðvar Þór Unnarsson, nemandi við Kvikmyndaskóla Íslands:
Úr forleifafræði í kvikmyndagerð
Böðvar Þór Unnarsson: „Ég fann mig fljótt í faginu eftir að ég hóf námið og áhuginn hefur aukist.“