Morgunblaðið - 27.10.2002, Page 12

12 B SUNNUDAGUR 27. OKTÓBER 2002 MORGUNBLAÐIÐ
bílar
VOLKSWAGEN kynnti fjölmiðlum
nýlega fyrsta jeppann sem fyrirtæk-
ið framleiðir, Touareg, í hlíðum
Pýreneafjalla. Þangað var ferðinni
heitið til að prófa bílinn jafnt í mann-
gerðum torfærubrautum og á hrað-
brautum Spánar, en VW hefur ein-
mitt lagt áherslu í kynningu sinni á
þá hlið bílsins sem lýtur að meintum,
jafngóðum eiginleikum hans í tor-
færum og á malbiki. Hekla hf. hefur
fengið fyrsta bílinn til landsins og
verður hann frumsýndur hérlendis
1. nóvember nk. Hekla verður þar
með fyrsta Volkswagen-umboðið í
heiminum til að kynna Touareg.
Jeppinn verður þó aðeins í þrjár vik-
ur hérlendis en hann er væntanleg-
ur á almennan markað hér á næsta
ári.
Touareg, sem fær nafn sitt frá
þjóðflokki hirðingja og flökkufólks í
norðanverðri Afríku, var sýndur í
fyrsta sinn á bílasýningunni í París í
síðasta mánuði. Touareg er stór bíll,
4,75 metrar á lengd, en þó einungis
fimm manna og með lægra þaki og
sportlegra útliti en margir keppi-
nautarnir. VW fer þá leið að hafa bíl-
inn ekki á sjálfstæðri stálgrind en
með nýstárlegu drifkerfi og frábæru
fjöðrunarkerfi tekst VW að sameina
kosti torfærubílsins og götubílsins
eins og að var stefnt.
V6 bensín og V10 dísil
Frá flugvellinum í Barcelona voru
blaðamenn frá Danmörku, Spáni og
Íslandi, fluttir með þyrlum upp til
fjalla. Þar hafði VW leigt landskika
og útbúið skemmtilega og krefjandi
torfærubraut. Þar reyndi sérstak-
lega á fjöðrunarkerfi bílsins því hlið-
arhallinn var allt upp í 45° á vissum
hlutum brautarinnar, sem er nærri
eðlisfræðilegum þolmörkum bif-
reiða.
Til prófunar var Touareg með V6
bensínvél, 220 hestafla og með 305
Nm togi frá 3.200 snúningum á mín-
útu. Vélin er skyld 3,2 lítra vélinni í
lúxusbílnum Phaeton og Golf R32 en
var engu að síður sérhönnuð til nota
í jeppa. Vélin hentar bílnum; er afl-
mikil og hljóðlát en gefur um leið
sportlegt hljóð frá sér við mikla inn-
gjöf.
Flaggskipið í línunni er með V10
dísilvél með forþjöppu og pumpu-
innsprautun, sem er svar VW við
samrásarinnsprautun, og sprautar
dísilolíu inn á strokkahólfin undir
allt að 2.050 bara þrýstingi. Þetta er
gríðarlega aflmikil og óvenjuleg vél,
sú togmesta í flokki jeppa í heim-
inum. Hestaflafjöldinn er 313 en
togið er hvorki meira né minna en
750 Nm strax við 2.000 snúninga á
mínútu. Þetta gríðarmikla tog fleyt-
ir bílnum yfir örgustu torfærur
áreynslulaust og bíllinn getur dregið
á eftir sér kerru með hemlakerfi
með allt að 3,5 tonna þyngd. Það
magnaða við þessa vél, fyrir utan
allt aflið og hröðunina, er hve hljóð-
lát hún er. Einu hljóðin sem angra
er vindgnauð frá stórum hliðar-
speglunum þegar ekið er á yfir 100
km hraða.
Bíllinn verður boðinn með fleiri
vélum. Á næsta ári kemur hann með
2,5 lítra, fimm strokka dísilvél með
forþjöppu, (174 hestafla), og V8
bensínvél, 310 hestafla. Jafnframt
kom fram á blaðamannafundi að
ekki er útilokað að Touareg verði
boðinn með W12 bensínvél.
V6-bíllinn kemur á gormafjöðrun
og er fáanlegur með loftpúðafjöðrun
en V10-bíllinn er með loftpúðafjöðr-
un í staðalbúnaði.
V6-bíllinn fór létt í gegnum krefj-
andi brautina og þar nýttist augljós-
lega mun minni þyngd hans. Bíllinn
er ákaflega notendavænn strax og
sest er inn í hann og auðveldur í
akstri. Staðalbúnaður í bílunum er
svokallað „upphill system“, brekku-
bremsa, sem heldur bílnum kyrrum
jafnvel í 45° halla án þess að stigið sé
á hemil eða eldsneytisgjöf. Þessi
búnaður er bæði í beinskiptum og
sjálfskiptum bílum. Sömuleiðis er
Touareg með svokallað „downhill
system“ sem hægir á bílnum þegar
farið er niður bratta brekku án þess
að stíga þurfi á hemla. Svipað kerfi
er að finna í Land Rover.
Athygli vöktu sérstakar þéttingar
við allar dyr bílsins. Hlutverk þeirra
er að varna því að vatn komist inn í
hann þegar farið er yfir vatn.
Breytileg mismunadrifslæsing
Touareg hefur verið fimm ár í
hönnun sem er langur tími þegar lit-
ið er á þróunartíma nýrra bíla. VW
þurfti að byrja með hreint borð.
Samstarf var með VW og Porsche,
sem nýlega kynnti sína jeppaútgáfu,
Cayenne, á bílasýningunni í París.
Bílarnir eru með sama undirvagni
en þó gerólíkir, jafnt í útliti sem
uppsetningu á undirvagni. Meðan
Touareg dreifir aflinu jafnt milli öxla
við allan venjulegan akstur á vegum,
er afldreifingin í Cayenne meira í
takt við sportlega ímynd Porsche,
þ.e. 62% drif til afturöxuls og 38% til
framöxuls.
Prófunarbílarnir voru allir með
sex þrepa sjálfskiptingu með hand-
skiptivali, (Tiptronic), en Touareg
verður líka boðinn með sex þrepa
sjálfskiptingu án Tiptronic og einnig
með sex gíra handskiptum kassa.
Gírkassarnir eru með úttökum fyrir
mismunadrif. Í Touareg er ný kyn-
slóð fjórhjóladrifskerfis sem er al-
gerlega rafeindastýrt. Þetta er bún-
aður sem er ekki allajafna fyrir
augunum á mönnum en önnur skyn-
færi verða hans áþreifanlega vör.
Þegar t.d. farið var yfir skorninga,
hóla og hæðir á torfærubrautinni
heyrðist skruðningur frá undirvagn-
inum; ekki ósvipað hljóð og þegar
stigið er af afli á ABS-hemla. Hljóðið
kemur frá mismunadriflæsingu í
miðri drifrásinni, sem er fyrir aftan
gírkassann. Mismunadrifið sjálft
flytur drifafl sjálfvirkt til öxlanna
eftir þörfum og læsir þeim eftir
þörfum hverju sinni, allt upp í 100%
læsingu. Þetta er nýjung í bílaheim-
inum og ætti að nýtast þeim sér-
staklega vel sem nota bílinn við
krefjandi aðstæður. Við vissar að-
stæður, svo sem ef framhjól spólar í
aurbleytu, flytur kerfið allt að 100%
af drifaflinu til afturöxulsins, þar
sem gripið er meira. En að auki er
hægt að læsa afturdrifinu 100%
handvirkt og yfirtaka þar með sjálf-
virknina. Drifkerfið kallar VW sí-
tengt 4XMotion og það snarvirkaði í
torfærubrautinni í hlíðum Pýrenea.
Veghæð frá 16—30 cm
Eins og fyrr greinir er V6-bíllinn
með hefðbundinni stálgormafjöðrun
sem gefur honum mýkt í götuakstri
og talsverða getu utanvegar. Veg-
hæðin er 23,7 cm. Hægt er að fá V6
bílinn einnig með loftpúðafjöðrun
sem aukabúnað. V10-bíllinn á hinn
bóginn er með loftpúðafjöðrun sem
staðalbúnað. Ökumaður getur stillt
búnaðinn á margvíslega vegu með
snúningsrofa við hlið ökumannssæt-
is. Hægt er að stilla veghæð bílsins
frá því að vera 16 cm, sem hentar vel
þegar verið er að hlaða bílinn, upp í
það að vera 30 cm, sem er kjörið við
erfiðustu aðstæður utanvega. Kerfið
er að vissu marki sjálfvirkt en einnig
getur ökumaður ráðið stillingunni að
nokkru leyti. Við venjulegan akstur
er veghæðin 21,5 cm en fer niður í 19
cm um leið og 125 km/klst hraða er
náð. Við 180 km/klst á hraðbrautum
lækkar veghæðin sjálfvirkt niður í
18 cm sem er kjörið við slíkar að-
stæður vegna minni loftmótstöðu og
þar með minni eyðslu, og meiri stöð-
ugleika bílsins.
Engin varadekk
Varadekk er ekki staðalbúnaður
með Touareg. Þess í stað fylgir lofts-
langa með bílnum með loftpúða-
fjöðruninni sem tengd er við loft-
dælubúnaðinn sem öðru jöfnu dælir
lofti inn á loftpúðana. Þetta er bún-
aður sem hentar íslenskum jeppa-
mönnum sem gjarnan hleypa lofti úr
dekkjum til að fá meira flot í snjó.
Lítil rafmagnsloftdæla fylgir síðan
bílnum með stálgormafjöðruninni.
V10-bíllinn er líka úlfur í sauð-
argæru – sannkallaður hraðbrautar-
vagn en um leið virkilega duglegur í
torfærum. Bíllinn vegur rúm 2,5
tonn en upptakið er eins og í aflmikl-
um fólksbíl, 7,8 sekúndur úr kyrr-
stöðu í 100 km/klst og hámarkshrað-
inn 225 km/klst. Kældir diskahemlar
eru á öllum hjólum og eyðslan er að
jafnaði 12,2 lítrar á hverja 100 km.
VW ráðgerir að selja 65 þúsund
Touareg á ári og ná strax 8–9%
markaðshlutdeild í heiminum í þess-
um flokki bíla. Þar af er gert ráð fyr-
ir sölu á 33.000 bílum í Bandaríkj-
unum og 30.000 í Evrópu, eða 15%
markaðshlutdeild. Bíllinn kemur á
markað hérlendis næsta vor. V6 bíll-
inn mun kosta um 5,5 milljónir kr.
en V10 bíllinn um 8 milljónir kr.
Bíllinn er hinn glæsilegasti að innan og um leið hátæknivæddur. Meðal aukabúnaðar er rafstýring á dráttarkúlunni. Meðal búnaðar er breytileg mismunadrifslæsing.
VW Touareg – lúxusjeppi í sérflokki
Touareg er fáanlegur með V6-bensínvél eða V10-dísilvél.
Veghæðina er hægt að stilla frá 16 cm upp í 30 cm með loftpúðafjöðruninni.
REYNSLUAKSTUR
VW Touareg
Guðjón Guðmundsson
gugu@mbl.is