Fréttablaðið - 24.12.2007, Qupperneq 32

32 24. desember 2007 MÁNUDAGUR
Á vaktinni á aðfangadagskvöld
Ekki eru allir svo lánsamir að verja aðfangadagskvöldi í faðmi fjölskyldunnar. Stór hópur fólks í þjóðfélaginu innir af hendi störf sem
krefjast þess að unnið sé á þessu kvöldi sem í huga flestra er það hátíðlegasta ár hvert. Störf þessa fólks tryggja okkur hinum öryggi yfir
hátíðarnar og að jólin komi einnig til þeirra sem enga eiga að. Margir þeirra sem eru að störfum í kvöld hafa valið sér það sjálfir og í
sumum tilvikum er vinnan jafn órjúfanlegur hluti hátíðarhaldanna og jólaölið, steikin og brúnuðu kartöflurnar fyrir okkur hin.
LAUGASKJÓL Sigrún Jónsdóttir sjúkraliði verður á vakt í kvöld í Laugaskjóli, sambýli fyrir eldra fólk með minnissjúkdóma sem
er rekið af Skjóli, og segir það leggjast vel í sig. „Um leið og maður tekur þessa ákvörðun sættir maður sig við það,“ segir hún.
„Dagurinn er annasamari en kvöldið því þá fara flestir til fjölskyldna sinna. Það verður fámennt á heimilinu milli klukkan fimm
og níu. Svo fer fólkið að tínast heim aftur en það er gaman að fá það aftur brosandi frá sínum nánustu. Þá er sest í stofuna.
Við fáum okkur kannski sérrístaup, heitt kakó og smákökur. Allt verður svo rólegt, hátíðlegt og yndislegt.“ Hér er Sigrún til
vinstri ásamt Elsu Jónsdóttur sem vinnur með henni á vaktinni í kvöld. FRÉTTABLAÐIÐ/VALLI
SLYSA- OG BRÁÐADEILD
LANDSPÍTALANS
Áætlað er að 165 manns að meðaltali
leiti til slysa- og bráðadeildar Landspít-
alans á aðfangadag, jóladag og annan
í jólum ár hvert, þar sem mælst er til
að fólk með bráðavanda leiti aðstoðar
en fólk með viðvarandi vandamál fari
frekar á heilsugæslustöðvar. Umferðin
er meiri um hátíðarnar en á virkum
dögum. Venju samkvæmt verður þar
því fjöldi fólks að störfum, þar á meðal
Skúli Bjarnason læknir sem vinnur nú í
fyrsta sinn á aðfangadegi. „Þetta leggst
vel í mig og ég hef ekki undan neinu
að kvarta, enda sloppið við að taka vakt
síðustu sjö ár,“ segir læknirinn hlæjandi
og bætir við að hann hafi á móti unnið
um hver áramót og því orðið tímabært
að skipta á vöktum. „Ég hef það þá bara
gott um áramótin í staðinn,“ segir hann.
FRÉTTABLAÐIÐ/VÖLUNDUR
HJÁLPRÆÐISHERINN
Aðfangadagur á heimili Anne Marie
Reinholdtsen er með heldur óvenjulegu
sniði en þá er hefð fyrir því að öll fjöl-
skyldan sameinist til að taka þátt í starfi
Hjálpræðishersins. „Við erum öll í þessu
á aðfangadag og höfum gert það frá því
að börnin voru lítil. Þegar við fluttum
tímabundið til Noregs fannst krökkunum
alveg ömurlegt að þurfa að halda jólin
heima, þar sem við vorum þá bara ein.
Við urðum að finna fólk sem var ein-
samalt til að bjóða heim. Fyrir þeim voru
það jólin,“ segir Anne, sem hlakkar til að
takast á við verkefni dagsins, ekki hvað
síst undirbúninginn fyrir kvöldið. „Þá
snæðum við með fólkinu á gistiheimil-
inu, venju samkvæmt,“ segir hún.
FRÉTTABLAÐIÐ/VÖLUNDUR
SLÖKKVILIÐ HÖFUÐ-
BORGARSVÆÐISINS
„Ætli við verðum ekki sjö á vakt í Skógar-
hlíð í dag og svo 21 í heildina,“ segir
Stefnir Snorrason slökkviliðsmaður og
segir ekki vanþörf á því oftast sé mikið
um útköll á þessum degi. „Það er mikið
um sjúkraflutninga, sérstaklega á fólki
sem fer heim af endurhæfingarstofnun-
um til fjölskyldna sinna. Svo er talsvert
um útköll vegna slysa og veikinda og
eldsvoða,“ segir Stefnir, sem er ekki
óvanur því að verja aðfangadegi í vinn-
unni. „Maður sinnir bara sínu hlutverki
og fjölskyldan aðlagast því. Við höldum
jólin bara aðeins fyrr, áður en ég fer á
vakt, svo allir hinir geti átt gleðileg jól.“
FRÉTTABLAÐIÐ/VÖLUNDUR
NEYÐARLÍNAN
Elva Björk Björnsdóttir varðstjóri hjá
Neyðarlínunni hefur yfirleitt unnið um
áramót til að geta átt frí á aðfangadag. Í
ár ætlar hún hins vegar að breyta út af
vananum og vinna á þessum annasama
degi. „Mér finnst það í lagi þar sem
krakkarnir eru uppkomnir,“ útskýrir Elva
hress í bragði, en hún hefur búið sig
undir að allt mögulegt geti komið upp á.
„Það skapast mikil læti úti í þjóðfélaginu
og allt sem fer úrskeiðis endar hjá okkur.
Allt dettur í dúnalogn milli klukkan sex
og átta um kvöldið þegar fólk borðar.
Svo hefst örtröðin á ný,“ segir hún og
hlakkar til að hitta fjölskylduna þegar
vaktaskipti verða seinna um kvöldið.
FRÉTTABLAÐIÐ/VÖLUNDUR