Morgunblaðið - 19.12.2007, Blaðsíða 8

8 MIÐVIKUDAGUR 19. DESEMBER 2007 MORGUNBLAÐIÐ
FRÉTTIR
MEIRIHLUTI svarenda í
neyslukönnun, eða 65%,
kannast við að hafa feng-
ið gjöf sem þeir hafa ekki
not fyrir. Þeir kannast
einnig við að hafa ekki
skipt henni af tillitssemi
við gefandann. Svar-
endur telja sig gefa gjafir
fyrir um 40 til 50 þúsund
á ári og flestir eða 84%
telja sig fá þær gjafir
sem koma að góðum not-
um. 40% kaupa dýrari
gjafir en þeir vilja í raun.
Þetta er meðal þess
sem kemur fram í spurn-
ingalistakönnun sem Fé-
lagsvísindastofnun Háskóla Íslands gerði til að greina viðhorf landsmanna
til sóunar og endurvinnslu. Könnunin fór þannig fram að sendir voru
spurningalistar til 3.000 manns í mars 2007. Alls svöruðu 1.198 eða rétt um
40% og er hluta niðurstaðna að finna á reykjavik.is.
Meirihluti svarenda segist hafa fengið gjöf sem átti að skipta en af ein-
hverjum ástæðum hafi það síðan misfarist. Þeir sem yngri eru hafa frekar
látið hjá líða að skila gjöfum sem henta ekki og einnig þeir sem hafa hærri
tekjur og meiri menntun. Einar Mar Þórðarson, sérfræðingur hjá Fé-
lagsvísindastofnun, hafði umsjón með könnuninni.
Flestir svarendur telja sig gefa gjafir fyrir um 40 til 50 þúsund á ári.
Karlar kaupa gjafir að meðaltali fyrir hærri upphæðir en konur og þeir
sem eldri eru kaupa gjafir fyrir hærri upphæðir en þeir sem yngri eru.
Þeir sem eru með meiri menntun og hærri heimilistekjur eyða einnig
meira í gjafir en aðrir
Skýrsla með niðurstöðum könnunar á neysluvenjum og viðhorfum til
endurvinnslu kemur út í janúar 2008. Könnunin er samstarfsverkefni
Sorpu bs., Sorpstöðvar Suðurlands bs., Sorpeyðingarstöðvar Suðurnesja
sf., Umhverfissviðs Reykjavíkurborgar, Neytendasamtakanna, Land-
verndar og Félagsvísindastofnunar Háskóla Íslands.
Morgunblaðið/Kristinn
Margir skipta ekki jólagjöfum
af tillitssemi við gefandann
SMÁSÖLUAÐILAR eru á heima-
síðu Neytendasamtakanna, ns.is,
hvattir til að bjóða endurskins-
merki til sölu því eftirspurnin sé
fyrir hendi.
„Ekki er þó loku fyrir það skotið
að endurskinsmerki fáist í ein-
hverjum matvöruverslunum en
þeim er þá ekki gert hátt undir
höfði. Neytendasamtökin hvetja
matvöruverslanir til að fjarlægja
eitthvað af sælgætinu við kassana
og rýma fyrir endurskinsmerkj-
unum. Annar sjálfsagður „örygg-
isbúnaður“ er seldur við kassana,
nefnilega verjur, og furðulegt að
matvöruverslanirnar skuli ekki
hafa séð ástæðu til að bæta endur-
skinsmerkjum í vöruúrvalið,“ segir
á ns.is.
Eftir því sem Neytendasamtökin
komast næst eru endurskinsmerki
einna helst seld í apótekum og á
bensínstöðvum. Tryggingafélögin
hafa dreift endurskinsmerkjum en
þau virðast búin og Umferðarstofa
átti ekki endurskinsmerki.
Morgunblaðið/Ásdís
Endurskins-
merki lítt sýni-
leg í verslunum
ÍSLENDINGAR tóku þátt í alþjóðlegri ráðstefnu um
efnahagslegan stuðning við Palestínu sem fram fór í
París á mánudag. Ráðstefnan var haldin í framhaldi af
friðarviðræðum í Annapolis í nóvember og er markmiðið
að styðja við bakið á tveggja ára umbóta- og þróunar-
áætlun heimastjórnar Palestínumanna.
Utanríkisráðuneytið hefur undanfarna mánuði unnið
samkvæmt sérstakri framkvæmdaáætlun um Mið-
Austurlönd sem samþykkt var í ríkisstjórn og rædd í ut-
anríkismálanefnd eftir ferð utanríkisráðherra, Ingi-
bjargar Sólrúnar Gísladóttur, til Mið-Austurlanda síð-
astliðið sumar.
Í París tilkynnti Gréta Gunnarsdóttir, sviðsstjóri alþjóða- og öryggis-
mála, sem sækir fundinn fyrir Íslands hönd, að framlag Íslands myndi
nema fjórum milljónum Bandaríkjadala á næstu þremur árum. Er það jafn-
virði um 255 milljóna íslenskra króna.
Leggja fram 255 milljónir
Víða er neyð meðal
Palestínumanna.
RAUÐI krossinn fagnar því að rík-
ari þjóðir heims skuli ætla að stofna
sérstakan sjóð til að auðvelda þró-
unarríkjum að aðlagast loftslags-
breytingum. Stofnun sjóðsins var
samþykkt á loftslagsþinginu í Balí
nú um helgina. Á alþjóðaráðstefnu
Rauða krossins í lok nóvember
skuldbatt Rauði kross Íslands sig til
að rannsaka áhrif loftslagsbreyt-
inga á Íslandi og taka tillit til nið-
urstaðnanna í neyðarvarnaráætlun
félagsins. Rauði krossinn mun leita
eftir samvinnu við stjórnvöld og
viðeigandi stofnanir og samtök.
Breytt loftslag
SNIGLARNIR, Bifhjólasamtök lýð-
veldisins, undrast ummæli Rögn-
valds Jónssonar, eins reyndasta
vegaverkfræðings landsins, um að
ákvörðun stjórnvalda um að leggja
2+2-vegi til Selfoss og Borgarness
sé röng og frekar ætti að leggja
2+1-vegi. Sniglarnir telja að þetta
sé ekki góð lausn og í reynd hættu-
leg og vara við því að svona vegir
verði lagðir á Íslandi í framtíðinni.
Þeir ýti undir hraðakstur á tvöföld-
um köflum, sérstaklega á háanna-
tíma, hvort sem um er að ræða bíla,
mótorhjól, fjórhjól eða önnur öku-
tæki. Þá styðja Sniglarnir allshugar
áætlanir um 2+2-vegi milli þessara
staða.
Vilja tvöfalda vegi
Hópakstur Ökumenn á 650 hjólum aka af
stað frá Perlunni áleiðis til Hafnarfjarðar.
STUTT
„MÉR fannst þetta stórt,“ sagði Viktoría Guðmunds-
dóttir eftir að hún skoðaði aurflóðið sem hún lenti í á
Eyrarhlíð í fyrrakvöld. Flytja þurfti bílinn á verkstæði
til að þrífa hann og laga.
Vegagerðin ákvað að takmarka hraða á veginum um
Eyrarhlíð við 50 km/klst. en nokkrar aurskriður féllu
þar í fyrrinótt og var vegurinn hreinsaður í gær.
Á bloggi Einars Sveinbjörnssonar veðurfræðings
segir að á Ísafirði hafi mælst um 45 mm regns frá því
um kl. 18 í fyrrakvöld og til kl. þrjú í fyrrinótt.
Morgunblaðið/Halldór Sveinbjörnsson
„Mér fannst þetta stórt“
STEFNT verður að útboði sérleyfa
til leitar, rannsókna og vinnslu á olíu
og gasi á Drekasvæðinu, norðaustur
af Íslandi. Ríkisstjórnin samþykkti í
gær tillögu iðnaðarráðherra í þá
veru. Miðað er við að hægt verði að
bjóða leyfin út 15. janúar 2009.
Niðurstöður jarðeðlisfræðilegra
mælinga þykja gefa vísbendingar
um að á svæðinu gæti verið að finna
bæði olíu og gas í vinnanlegu magni.
Olía og gas hafa fundist víða á ná-
lægum og jarðfræðilega skyldum
svæðum. Í frétt frá iðnaðarráðuneyt-
inu segir einnig að mikil þróun sem
orðið hefur í bor- og vinnslutækni
ásamt reynslu af olíu- og gasvinnslu
á miklu hafdýpi á norðlægum slóðum
sé forsenda þess að nú er hægt að
leita þessara auðlinda á Drekasvæði.
„Ríkisstjórnin stefnir að því að
stuðla að skynsamlegri nýtingu
hugsanlegra olíu- og gasauðlinda á
Drekasvæðinu í sem mestri sátt við
umhverfið og samfélagið, þjóðinni til
hagsbóta. Engin trygging er fyrir
því að olía og gas finnist í vinnanlegu
magni á Drekasvæðinu en ljóst er að
verulegur olíu- og gasfundur gæti
haft kröftug efnahagsleg áhrif á ís-
lenskan þjóðarbúskap. Með því væri
fleiri stoðum skotið undir efnahag og
sjálfstæði þjóðarinnar, auk þess sem
olíuvinnsla myndi efla byggð á svæð-
um sem næst liggja Drekasvæðinu,“
segir í tilkynningu ráðuneytisins.
Gerðar verða ýtrustu kröfur um ör-
yggi starfsfólks og umhverfisvernd.
Stefnt að útboði leyfa
til olíuleitar við Ísland
Í HNOTSKURN
»Drekasvæðið er við mörk ís-lensku efnahagslögsögunnar
suður af Jan Mayen. Norðurhluti
þess er 42.700 km2 að flatarmáli.
Nafn svæðisins vísar til drekans í
skjaldarmerki lýðveldisins, þ.e.
landvættar Austurlands.
»Jarðfræðilega er svæðið hlutiaf meginlandi sem lá milli
Noregs og Austur-Grænlands.
Þar má finna þykk setlög.
»Þekking á umhverfisþáttumsvæðisins er takmörkuð.
Vanda þarf undirbúning og
tryggja mengunarvarnir og
skipulag viðbragða.