Dýraverndarinn - 01.11.1972, Qupperneq 21

Tízkutildrið hættulegt
sjaldgæfum dýrum
Dýraverndunarmenn um allan heim herða enn
andróðurinn gegn veiði sjaldgæfra dýra. Aróður er
rekinn gegn því að notuð séu dýraskinn í fatnað, en
tízkan er hvað hættulegust ýmsum tegundum. Nú
munu 60 tegundir vera í yfirvofandi hættu, en nefnd-
ar eru tegundir eins og tígrisdýr, hlébarðar, ýmsar
selategundir og krókódílar.
Þrátt fyrir aukna baráttu ýmissa dýraverndunar- og
náttúruverndarsamtaka er talið, að ein tegund deyi út
árlega. Frá því um 1600 hafa um 270 dýrategundir
dáið út, og nú á atómöldinni hefur mannkynið hert
sig verulega í útrýmingunni.
Mestar eru áhyggjurnar af dýrum, sem er slátrað
til þess eins að þjóna duttlungum tízkunnar, en
erfitt reynist að koma í veg fyrir veiðar sjaldgæfra
dýra, þegar offjár er í boði fyrir fallega feldi. Sökin
af þessu athæfi er rakin til tízkuduttlunga kvenna,
sem vilja skarta helzt því, sem ekki eru á allra
herðum.
Sem dæmi um hve erfitt er að fylgja eftir friðunar-
ákvæðum, þá má benda á, að í Sómalíu í Afríku er
gefið meira fyrir eitt hlébarðaskinn en nemur meðal-
árslaunum þar í landi. Boð og bönn ná því skammt.
Fleiri hólma í Tjörnina
Oðru hverju heyrast raddir um að setja fleiri hólma
í Tjörnina í Reykjavík. Fuglalífið á Tjörninni hefur
löngum þótt vera borginni til yndisauka og eru
flestir á einu máli um, að frekar mætti auka fugla-
lífið að fjölbreytni, enda fá griðlönd, sem fuglar eiga
á höfuborgarsvæðinu.
I nýlegu lesendabréfi í einu daglblaðanna er
stungið upp á því, að ef settir yrðu fleiri hólmar í
Tjörnina, þá væri tilvalið að gróðursetja tré í hólm-
ana. Auk þess sem trén yrðu til fegurðar, þá mundu
trén verða griðastaður ýmissa fugla, sem hafa minnk-
andi næði víðast annarsstaðar fyrir ágangi katta.
Tjörnin í Reykjavík er nálega einstök, en gæti orðið
enn fegurri með fleiri hólmum og gróðri, og aukið
fuglalíf mundi auka á þokka þessarar paradísar.
Vonandi sjá yfirvöld Reykjavíkurborgar sér fært
að verða við ábendingu þeirra, sem óska eftir fleiri
hólmum í Tjörnina.
Dýravinir!
Sædýrasafnið er
opið alla daga
kl. 10:00—19:00.
Sædýrasafnið
DÝRAVERNDARINN
85