Sameiningin - 01.11.1950, Blaðsíða 12

154
Sameiningin
Páfakirkjan telur auðvitað Lúther einhvern mesta
misindismann sögunnar, og ásakar hann og kirkjudeild þá
sem kennir sig við hann, og reyndar alla mótmælenda-
kirkjuna, um fráhvarf frá hinni einu sönnu trú. Engin leið
er til að bæta þetta frumhlaup Lúthers nema með því að
allir sem ekki eru kaþólskir komi heim til föðurhúsanna
í Rómaborg. Oss, sem í Canada dveljum, miðar þa einnig
nokkuð í áttina þangað, þótt hægt fari. Skýrslur um trú-
málastefnur hér í landi bera þessu vitni.
Hins vegar eru ýmsir aðrir mótmælendur heldur ekki
ánægðir með oss sem lúterskir teljumst. Annars vegar er-
um vér ásakaðir um að trúa of litlu, þ. e. vér höfnum páfan-
um og kerfi hans. Hins vegar er talið að vér trúum of miklu.
Siðbót Lúthers á að hafa storknað og stanzað eins ög hraun-
straumur sem ekki náði nema hálfa leið til hafs. Vér höld-
um enn í klæðafald kaþólsku kirkjunnar, trúum því sem
ekki er trúlegt er vér reiðum oss á heilaga ritningu til
sáluhjálpar, og hann sem er aðalpersóna hennar og um-
talsefni, Jesúm Krist. Þannig láta menn dæluna ganga.
Margir meðal fólks vors hafa líka látið telja sér hughvarf,
það svo að á stórum svæðum þar sem áður voru blómlegir
lúterskir söfnuðir er nú talið að ekki sé nein „lútersk með-
vitund“ til lengur.
Öllum ásökunum, hvort heldur sem þær koma frá
hægri eða vinstri, svörum vér, ekki með afsökunum, heldur
með einfaldri yfirlýsing: Vér höldum oss að Jesú Kristi.
Vér þekkjum engan annan sem vér getum treyst fyrir vel-
ferð sálna vorra, engan sem kennir fegurri lífspeki, engan
sem fremur en hann hvetur til göfugrar viðleitni, engan
annan sem gefur betri vegvísun í lífinu, og vissu í dauðanum
um framhald á frjósamari sviðum. Vér könnumst við að
margt í kenningu hans lætur illa í eyrum; ýmislegt er
þar sem vér vildum gjarnan hafa öðruvísi. En vér teljum
oss ekki fært að vinsa úr kenningu hans, heldur tökum
hana eins og hún liggur fyrir og trúum henni. 1 þessu telj-
um vér oss lifa í anda Lúthers og postula frumkristninnar,
sem áttu ekkert annað svar við spurningunni: Hvað á ég
að gjöra, til þess að ég verði hólpinn? en þetta: „Trú þú á
drottinn Jesúm“.