Sameiningin - 01.09.1954, Blaðsíða 13

Sameiningin
67
vel á því að hafa þessa athöfn þar, vegna þess sérstaklega, að
margt af heimilisfólkinu gat ekki farið í kirkjuna. Dr. V. J.
Eylands flutti andlegt og viðeigandi ávarp til fólksins.
Dr. R. Marteinsson las 103. sálm Davíðs og flutti bæn.
Séra Skúli Sigurgeirsson, fyrrum þjónandi á Gimli, nú
prestur í Bandaríkjunum, var viðstaddur og flutti vinsemdar-
ávarp og kæra kveðju frá konunni sinni, sem ekki var við-
stödd. Mrs. Anne Margrethe Sigmar, kona séra Haraldar,
söng sálm eftir föður sinn, séra Steingrím Thorláksson.
Nokkur hópur úr söngflokk safnaðarins var þarna viðstadd-
ur og hjálpaði við sálmana, sem sungnir voru.
Skrúðganga frá Betel flutti menn að dyrum nýju kirkj-
unnar. Mr. Barney Egilson, hinn vinsæli bæjarstjóri á Gimli
og forseti lúterska safnaðarins þar, lagði þá fram lykla að
kirkjunni. Þá var gengið inn í hana, og á meðan menn nálg-
uðust altarið, var lesinn sameiginlega 122. sálmur Davíðs.
Þegar menn höfðu sezt, flutti Dr. V. J. Eylands, forseti
íslenzka Lúterska Kirkjufélagsins, ávarp til safnaðarins og
endaði með bæn. Að því loknu framkvæmdi hann kirkju-
vígsluna, alt með viðeigandi hátíðarbrag.
Séra Eric H. Sigmar og séra Octavíus Thorláksson, tóku
nokkurn þátt í guðsþjónustunni með lestri og kveðjum.
Séra Skúli Sigurgeirsson tók einnig til máls, flutti söfnuð-
inum vinsemdarkveðjur og árnaðaróskir.
Dr. Haraldur Sigmar flutti með ljúfum anda prédikun
þessarar guðsþjónustu, sannan boðskap Jesú Krists. Að
henni lokinni söng Mrs. Sigmar fagurlega. Þá bar sóknar-
presturinn, séra H. S. Sigmar, fram hjartnæmar bænir og
að því búnu blessaði Dr. Marteinsson yfir söfnuðinn.
Þá fór fram fögur hringing dásamlegra klukkna, sem
söfnuðinum voru gefnar í minningu um Hrólf heitinn
Sigurdson, af ekkju hans, Elínu Sigurdson. Eftir þá hringing
var nokkur hópur fólks tekinn til altaris.
Eins og áður er getið, fóru fram tvær guðsþjónustur
að kvöldinu. Við hina fyrri prédikaði séra Eric H. Sigmar,
við hina síðari sóknarpresturinn, séra H. S. Sigmar. Við þá
guðsþjónustu söng söngflokkur Norður-Nýja-lslands undir
stjórn Jóhannesar Pálssonar. Frú Guðmunda Elíasdóttir,
fræg söngkona frá íslandi, söng einnig við þessa guðs-
þjónustu. Hátíðinni lauk með góðgjörðum og vinamóti.