Sameiningin - 01.09.1954, Blaðsíða 18

72
Sameiningin
sem er að einhverju leyti helguð minningu feðranna, skuli
standa mynd of opinni bók.
Annað sem vekur eftirtekt er hinn upplýsti kross, sem
blasir við ofar bókinni. Á kvöldin má sjá hann langt utan
af vatni, og annars staðar frá, þar sem hátt ,ber á. Ljósið á
krossinum kastar bjarma sínum einnig yfir bókina. Það er
ekki sama hvað menn lesa eða hvernig. Bókahillur og söfn
víða eru full af ruslbókum, sem engum manni er gagn í að
lesa. Eins og allir vita, er einnig hægt að lesa biblíuna sem
aðrar bækur, án þess að verða snortinn af efni hennar. Það
er einnig hægt að reisa kirkjur sem önnur samkomuhús, og
flytja í þeim ýmiskonar annarlegan boðskap, sem ekki
kemur kirkjunni hið minnsta við. Það er krossinn sem gerir
kirkjuna að kirkju, það er upprisuljóminn frá gröf hins
krossfesta, sem einkennir kristilega prédikun, og varpar
vonarbjarma yfir mannlegt líf í öllum hörmum þess og
raunum. Kirkja Krists verður ávalt helguð boðskap krossins,
það er hinn eini boðskapur vonarinnar og lífsins.
Að innan er kirkjan í lögun eins og skip. Einnig það er
táknrænt og tilhlýðilegt. Flestir þeirra, er vestur komu í
upphafi, höfðu náin kynni af hafinu; margir þeirra höfðu
stundað sjómennsku. Þegar hingað kom hændust þeir að
vatninu, sem bauð þeim svipuð atvinnuskilyrði og þau sem
þeir höfðu áður vanist, og þessi atvinnugrein hefir verið
stunduð af niðjum þeirra allt fram á þennan dag. í rýmri
skilningi er kirkja Krists eins og skip, sem flytur oss menn-
ina frá einni strönd til annarar, frá landinu sem er til lands-
ins fyrir handan hafið, og skilar oss eftir volk og vosbúð
þessa lífs upp að strönd eilífðarinnar.
í stafni kirkjunnar, við loft mót austri er gluggi einn
mikill með glermynd í litum. Sýnir hún lærisveinana við
fiskdrátt, og meistarann þar sem hann ávarpar þá og segir
við Pétur: „Legg net þitt til fiskidráttar11. Þetta er fögur
og áhrifamikil mynd, sem bendir á hið sígilda hlutverk
kirkjunnar, einnig þessarar nýju kirkju sem vígð er í dag:
að linna aldrei á mannaveiðum sínum, að draga, laða og
leiða mennina úr djúpi sjálfhyggjunnar, og lyfta þeim inn í
skip kirkju Krists, að þeir læri að þekkja hann, elska hann
og þjóna honum sem leiðtoga sínum á landi og sjó.
Vér helgum nú þessa kirkju í dag, og vígjum hana í
nafni Guðs föður, sonar og heilags anda. Vér biðjum að