Morgunblaðið - 19.03.2010, Blaðsíða 33

MORGUNBLAÐIÐ | 33
Þ
órhallur Heimisson segist vel finna
fyrir þeirri breytingu sem orðið hefur
á umgjörð brúðkaupa eftir að krepp-
an skall á. Það er þó ekki neikvætt því
nú eru meiri tilfinningar í spilunum
og verðandi brúðhjón gefa sér tíma til að ræða
við prestinn sinn áður en að athöfn kemur. Áður
var fólk upptekið yfir öllu því veraldlega sem
gera þurfti til að veislan yrði sem veglegust.
„Ég er ekki frá því að töluverð breyting hafi átt
sér stað eftir efnahagshrunið þótt ég hafi enga
sérstaka tölfræði yfir það. Yfirbyggingin hefur
minnkað mikið og meira um lágstemmd brúð-
kaup, jafnvel í heimahúsi þar sem aðeins eru
nánustu ættingar. Einnig hefur færst í vöxt að
brúðkaup og skírn séu sameiginleg. Þessi gríð-
arlega miklu brúðkaup sem hér þekktust á góð-
æristímanum eru alveg dottin upp fyrir. Þetta
er allt mun heimilislegra núna.“
Mikill glamúr
Var þetta komið úr böndunum að þínu mati?
„Var ekki allt komið úr böndunum? Maður
varð vitni að miklum og glæsilegum veislum á
tímabili. Þetta var kannski farið að snúast of
mikið um umgjörðina. Gestafjöldinn var gjarn-
an gríðarmikill og veisluföng stórfengleg. Því er
ekki að neita að glamúrinn var mikill. Tíðarand-
inn var svona og fólk var jafnvel í keppni við
aðra og sjónvarpsþættir mögnuðu þetta allt
saman upp.“
Þórhallur segist ekki hafa tilfinningu fyrir því
að hjónavígslum hafi fækkað en nú sé bara allt
annar stíll á þessu. Ekki var óalgengt að fjöldi
brúðarmeyja væri með í vígslunni, hringaberar,
mikil tónlist og frægt tónlistarfólk. „Þetta allt
heyrir sögunni til og ég held að fólk hafi ekki
áhuga lengur á svona glæsiveislum og finnist
það ekki passa.“
Endast hjónaböndin nokkuð betur í millj-
ónabrúðkaupum?
„Nei, það er á engan hátt hægt að segja að
samband sé þar á milli. Umbúðirnar eru ekki
aðalmálið þegar fólk gengur í heilagt hjóna-
band. Mér finnst ég þvert á móti tengjast verð-
andi brúðhjónum betur núna. Fólk er að gifta
sig af heilum hug og ég upplifi sterkari tilfinn-
ingar sem er mjög ánægjulegt.“
Ekki fleiri skilnaðir
Þórhallur vill ekki meina að skilnuðum hafi
fjölgað eftir að kreppan skall á og segir að til
séu skýringar á því. „Það var gerð úttekt á því í
Finnlandi þegar kreppan var þar og niður-
staðan var sú að skilnuðum fjölgaði ekki.
Ástæðan getur verið sú að það er erfitt að selja
íbúðir og fólk er mikið skuldsett svo það á erfitt
með að skilja þótt það vildi. Hins vegar hefur
fjölgað mjög því fólki sem leitar sér hjónabands-
ráðgjafar. Hún getur borið þann árangur að
fólk ákveður að snúa bökum saman og takast á
við erfiðleikana saman.“
Eftir að kreppan skall á hefur fólk sótt meira
í kirkjustarf en áður. Sumir hafa viljað endur-
nýja hjúskaparheiti sitt. „Oft er það tengt því að
fólk hafi tekist á við erfiðleika, veikindi eða þess
háttar og náð sér aftur. Fólk horfir fram á betri
tíð og langar þá til að endurnýja hjúskapar-
heitið.“
Bókin hans Þórhalls, Hjónaband og sambúð,
er byggð á námskeiðunum hans og hann segir
að hún sé mikið notuð sem handbók þar sem
fólk getur fengið leiðbeiningar við sitt hæfi.
„Fólk er annars tilfinninganæmara, opnara og
tilbúnara til að spjalla um hlutina en áður var.
Við finnum fyrir þessu líka í fermingunni núna
og prestar leggja mikla áherslu á að það er inni-
haldið en ekki umbúðirnar sem skipta máli. Eitt
af því sem ég get nefnt varðandi aukinn áhuga á
kirkjustarfi er að við í Hafnarfjarðarkirkju er-
um með barna- og unglingakór starfandi en í
honum voru fjörutíu krakkar en nú eru þeir
áttatíu. Fólk leitar meira í trúna og þann frið og
kyrrð sem kirkjan veitir.“
elal@simnet.is
Brúðkaupin látlausari en áður
Þórhallur Heimisson, sóknarprest-
ur í Hafnarfjarðarkirkju, hefur gefið
mörg brúðhjón saman auk þess
sem hann heldur reglulega fjölsótt
námskeið fyrir hjón sem vilja
styrkja sambandið. Þar að auki hef-
ur Þórhallur gefið út bók, Hjóna-
band og sambúð, sem hefur reynst
vel þegar erfiðleikar koma upp.
Morgunblaðið/Kristinn
Þórhallur Heimisson: „Maður varð vitni að miklum og glæsilegum veislum á tímabili. Þetta
var kannski farið að snúast of mikið um umgjörðina. Gestafjöldinn var gríðarmikill.“
Yfirbyggingin hefur minnkað
mikið og meira um lágstemmd
brúðkaup, jafnvel í heimahúsi
þar sem aðeins eru nánustu
ættingar viðstaddir.