Morgunblaðið - 02.01.2014, Blaðsíða 13

FRÉTTIR 13Innlent
MORGUNBLAÐIÐ FIMMTUDAGUR 2. JANÚAR 2014
Takk hreinlæti ehf, Viðarhöfða 2, 110 Reykjavík - Sími 577 6500 - Fax 577 6505
Geymslubox Ýmsarstærðirog gerðir
Brýnt er að hefja lærdóma sögunnar um
samstöðu þjóðarinnar og sigrana sem hún
skóp til vegs á ný. Gera þá „að leiðarljósi
við lausn sem flestra mála, leita sátta og
samstöðu í stað þess að kasta æ fleiri
sprekum á ófriðarbálið“. Þetta kom fram í
nýársávarpi forseta Íslands Ólafs Ragnars
Grímssonar í gær. Hann rifjaði upp hátíð-
arhöld í tilefni af 350 ára afmæli Árna
Magnússonar og hvernig heimkoma hand-
ritanna var ávöxtur af órofa samstöðu þjóð-
arinnar. „Sigurinn í baráttunni fyrir heim-
komu handritanna er meðal margra dæma
um að samstaðan hefur reynst okkur Ís-
lendingum farsælli leið en deilur og átök
sem oft fanga athygli líðandi stundar.“
Ólafur Ragnar fjallaði um fjölmiðlun
samtímans þar sem ágreiningur er talinn
meiri frétt en sáttargjörð. Einnig um nei-
kvæða umræðu í netheimum. Hann sagði
að hornsteinarnir stjórnarskrá, fullveldi og
lýðveldisstofnun hefðu allir byggst á sam-
stöðu þjóðarinnar og sigrarnir unnist þegar
hún réði för. „Sundruð sveit náði aldrei
neinum áföngum að sjálfstæði.“ Samstaða
þjóðarinnar skipti einnig sköpum varðandi
útfærslu landhelginnar, sigur í Icesave-
deilunni og þjóðarsáttasamningana fyrir
tuttugu árum, að mati forsetans.
„Nú, þegar við okkur blasa tímamót, að
baki fimm ára glíma við afleiðingar banka-
hrunsins og framundan skeið endurreisnar,
nýrrar sóknar, betra lífs, er brýnt að nýta
enn frekar samstöðuna.
Í glímunni við skuldavanda heimilanna er
sáttmáli kynslóðanna forsenda víðtækrar
lausnar, líkt og þjóðarátak er lykillinn að
bættri kunnáttu í skólum landsins. Metn-
aður Íslendinga er að vera í fremstu röð í
lestrargetu unglinganna; annað sæmir vart
bókaþjóð, eins og við köllum okkur á góðri
stundu.
Sama gildir um baráttuna gegn fátækt-
inni meðal okkar; ólíðandi með öllu að þús-
undir þurfi að treysta á matargjafir um
heilög jól og slíka aðstoð árið um kring.
Það er sárt að árétta aftur hér í ávarpi á
nýársdag að slík fátækt, einkum ungra
mæðra og einstæðinga, er smánarblettur á
íslensku samfélagi.“
Samstaða betri
en sundrung
Morgunblaðið/Sigurgeir S.
Forseti Íslands Ólafur Ragnar Grímsson
lagði áherslu á mikilvægi samstöðunnar í ný-
ársávarpi sínu.
 Nýársávarp Ólafs
Ragnars Grímssonar,
forseta Íslands
„Árið 2013 hefur gefið okkur tilefni til að líta
björtum augum fram á veginn og fagna nýju
ári sem ári uppbyggingar og ómældra tæki-
færa,“ sagði Sigmundur Davíð Gunnlaugsson
forsætisráðherra í áramótaávarpi sínu á
gamlárskvöld. Hann sagði að á heildina litið
hefði árið 2013 líklega verið betra en margir,
jafnvel flestir landsmenn, hefðu þorað að
vona.
Sigmundur Davíð rifjaði upp farsælar lykt-
ir Icesave-málsins fyrir íslensku þjóðina og
sagði að „fyrir vikið blasti við að allt það sem
ella hefði tapast mætti nýta til að reisa við ís-
lenskt efnahagslíf og um leið samfélagið sem
svo mikið hefði mætt á.“
Þá sagði forsætisráðherrann að gert væri
ráð fyrir umskiptum í rekstri þjóðarbúsins á
nýbyrjuðu ári. Skuldasöfnun yrði stöðvuð en
jafnframt yrði meira varið til heilbrigðismála
og framlög til félagsmála yrðu meiri en
nokkru sinni áður. Þess varð vart undir lok
nýliðins árs að verðmætasköpun hefði aukist
og varð hagvöxtur mun meiri en reiknað hafði
verið með.
„Með umfangsmiklum aðgerðum til að rétta
hlut skuldsettra heimila verður létt á því
fargi sem liggur á grunnstoð samfélagsins og
hagkerfisins, fjölskyldunum í landinu. Verð-
tryggð húsnæðislán verða færð niður sem
nemur allri þeirri óvæntu hækkun sem varð á
árunum í kringum bankahrunið. Auk þess
mun skattaafsláttur og önnur úrræði nýtast
til að létta enn frekar á skuldunum sem hald-
ið hafa aftur af vexti og velferð á Íslandi,“
sagði Sigmundur Davíð. Hann vitnaði til ný-
gerðra kjarasamninga og sagði þá vera hugs-
aða sem grundvöll raunverulegra kjarabóta.
Á nýju ári og næstu árum þyrfti að auka
kaupmátt Íslendinga jafnt og þétt. „Það ætl-
um við að gera í sameiningu. Sérstaklega þarf
að bæta áþreifanlega kjör þeirra lægst laun-
uðu en þau eru miklu lakari en við getum tal-
ið ásættanlegt á Íslandi. En það þarf líka að
rétta hlut millitekjuhópanna sem hafa tekið á
sig miklar byrðar á undanförnum árum.“
gudni@mbl.is
Uppbygging
og ný tækifæri
Morgunblaðið/Ómar
Forsætisráðherra Sigmundur Davíð Gunn-
laugsson segir árið 2013 hafa gefið tilefni til
bjartsýni.
 Áramótaávarp
Sigmundar Davíðs
forsætisráðherra