Skessuhorn - 22.08.2007, Qupperneq 18

18 MIÐVIKUDAGUR 22. ÁGÚST
Háskólinn á Bifröst verður
settur þann 3. september.
Skráðir nemendur í ár eru
um 1000 talsins og hafa
aldrei verið fleiri. Um 250
manns stunda meistaranám
og um 600 stunda annað
háskólanám, þar af 100 í
fjarnámi. Í frumgreinanámi
verða svo 150 manns. Ágúst
Einarsson, rektor skólans
segir nýjungar á námi við
Bifröst m.a. vera fjarnám við
frumgreinadeild skólans sem hafi
mælst afar vel fyrir og þurft hafi
að vísa mörgum frá. Að auki er
rekstur smárra fyrirtækja ný lína
innan skólans sem mikill áhugi er
fyrir. Þar fyrir utan eru fjölmargar
lengri og skemmri námsbrautir,
eins og verslunarstjóranám,
Máttur kvenna og Rekstur smærri
fyrirtækja auk hinna hefðbundnu
námsleiða í Félagsvísindadeild,
Lögfræðideild og Viðskiptadeild.
Bifröst hefur einnig opnað tvö
ný útibú á árinu. Annars vegar á
Egilsstöðum og hins vegar á Ísafirði.
Þessi útibú eru fyrstu skrefin í átt að
því að færa starfsemi skólans víðar
um land og auðvelda íbúum á þessum
svæðum að nálgast upplýsingar um
nám við skólann auk þess að veita
upplýsingar fyrir þá sem þegar
stunda fjarnám á þessum stöðum.
Unnið er að opnun fleiri útibúa
af þessu tagi. Að sögn Ágústar eru
a l l t a f
nokkrar hreyfingar í
kennarmálum á Bifröst, mikið er af
erlendum kennurum sem starfi með
meistaranemum og svo sé nokkur
hrókun á meðal annarra kennara.
Ágúst segir skólann búa að góðum
kennurum og sé vel undirbúinn fyrir
haustið. Aðal markmið vetrarins hjá
starfsfólki Háskólans á Bifröst er að
þétta námið og straumlínulaga það
og koma þannig til móts við auknar
kröfur í þjóðfélaginu. Reglugerð
skólans verður einnig endurskoðuð
og færð til betra horfs. Ágúst
segir að einnig sé verið að klára
íbúðablokkir fyrir nemendur
sem munu bæta húsnæðismál
Bifrestinga til mikilla muna og
verið sé að leggja lokahönd á
sparkvöll á lóð skólans. Hann
segir sérstöðu Bifrastar vera hið
stóra háskólaþorp sem risið er á
Bifröst, en þar búa nú um 700
manns og ekki eru fordæmi
fyrir slíku á öðrum stöðum
hér á landi. Hann segir einnig
að mjög öflug nemendaskipti
séu í skólanum og tæplega
helmingur nemenda fari
erlendis einhvern hluta úr
námstímanum, m.a. fari
margir til Kína. Ágúst
segir umhverfi Bifrastar
fjölskylduvænt, auk þess
sem nú sé lögð mikil
áhersla á menningarmál,
t.d. tónleikahald og listviðburði.
„Við viljum eflast og bæta okkur,“
segir Ágúst en tekur þó fram að
stækkun skólans muni ekki halda
áfram á sama hraða og verið hefur,
heldur muni stjórn skólans stefna
að því að halda betur utan um það
sem þegar er komið.
hög
Landbúnaðarháskóli Íslands á
Hvanneyri hefur nú þegar hafið
starfsemi sína þetta árið en tekið
var á móti fyrsta hópi nýnema þann
20. ágúst. Þar er að vísu ekki um að
ræða alla nemendur því nýnemar
munu koma til náms í
n o k k r u m
hollum á næstu vikum, að sögn
Ágústs Sigurðssonar, rektors LbhÍ.
Eftir á að koma í ljós hve mikill
fjöldi skilar sér en útlit er fyrir
að nemendur verði vel á fjórða
hundraðið, þar af 130 nýnemar.
Ágúst segir fólk vera að koma sér
fyrir í íbúðum á svæðinu og mikið
líf sé að færast í háskólaþorpið
á Hvanneyri. Hann segir nema
vera nokkuð hugmyndasama með
farartæki til flutninga og sé gaman
að fylgjast með því. Auk þeirra
nema sem búa á svæðinu munu um
15% verða í fjarnámi.
Helsta nýjungin hjá LbhÍ að þessu
sinni er ný deild í hestafræðum en
það er samstarfsverkefni Hólaskóla
og Landbúnaðarháskólans.
Hestafræði er BS nám og er hún
unnin og rekin með samvinnu
beggja skóla þar sem reynt sé að nýta
styrk hvers skóla fyrir sig. Ásókn í
hina nýju deild var umtalsverð og
fylltist hún hratt, en 18 nemendur
hefja nám við deildina að þessu
sinni. Umhverfisskiplagsbrautin
er þó vinsælasta deild skólans
enda hefur komið í ljós að mikil
eftirspurn er eftir fólki til vinnu
á sviði landslagsarkitektúrs og
skipulagsmála og allir brautskráðir
nemendur starfa eða stunda
framhaldsnám í sínu fagsviði að
sögn Ágústar. Almennt hefur mikill
áhugi verið fyrir námi í LbhÍ í
vetur en umsóknir um skólavist í ár
voru helmingi fleiri í ár en í fyrra.
Ágúst segir upphafið lofa góðu með
nýjar námsbrautir á sviði náttúru-
og umhverfisfræða, skógfræði
og landgræðslu. En fyrstu
skógfræðingarnir útskrifuðust í
vor. Mikill vöxtur hefur einnig
verið í rannsóknartengdu námi og
er kröftugt rannsóknastarf skólans
undirstaða þess. Útlit er fyrir að
meistaranemar verði á fjórða tug á
næsta ári auk fjögurra doktorsnema.
Hann sér einnig fyrir sér að
endurmenntunardeild skólans eigi
eftir að eflast til muna því eftirspurn
eftir margs konar fagtengdum
námskeiðum sé mikil. Hann segir
einnig að reynt hafi verið að taka
við eins
mörgum
n e m u m
í skólann
og hægt
væri en því miður hefði þurft
að vísa einhverjum frá.
Umhverfismál og
samningur við
Ohio - háskóla
Ágúst segir að í ljósi aukinna
áherslna á umhverfismál, geti
LbhÍ haft mikilvægu hlutverki að
gegna til að mynda með formlegri
menntun á þeim sviðum sem snerta
málaflokkinn, auk rannsókna á
þessu sviði. Fimm verkefni frá
LbhÍ á sviði vistvænna orkugjafa,
landgræðslu og skógfræði fengu
nýverið úthlutun úr Orku-
og umhverfissjóði Orkuveitu
Reykjavíkur. „Reyndar hefur
vísindafólki LbhÍ almennt gengið
vel í öflun rannsóknastyrkja nú á
síðustu misserum, sem er til marks
um hugmyndaauðgi og faglegan
slagkraft okkar fólks. Hitt er
annað að samkeppnin er gríðarleg
um mjög takmarkað fjármagn og
nauðsyn að efla rannsóknasjóði og
framlög til rannsókna hérlendis -
það mun skila sér margfalt til baka,“
segir Ágúst.
Ágúst segir að vaxandi samstarf
sé við innlenda og erlenda háskóla
og rannsóknastofnanir en hæst beri
þó nýr samningur LbhÍ við Ohio-
háskóla um margvísleg verkefni
á sviði kolefnisbindingar og
jarðvegsfræða auk nemendaskipta.
Þegar er hafin vinna við þetta
verkefni og komu kennarar og nemar
m.a. til Hvanneyrar í byrjun júní
til þess að huga að sameiginlegum
rannsóknaverkefnum auk annarra
verkefna í tengslum við þetta
samstarf.
hög
Inga Dóra Halldórsdóttir tók
formlega við starfi framkvæmda-
stjóra Símenntunarmiðstöðvar
Vesturlands 1. ágúst síðastliðinn af
Ingu Sigurðardóttur á Akranesi. Inga
Dóra hóf störf hjá SMV sumarið
2004 og þá sem ráðgjafi, en síðasta ár
gegndi hún stöðu framkvæmdastjóra
í ársleyfi Ingu Sigurðardóttur. Hjá
Símenntunarmiðstöðinni
starfa auk Ingu Dóru þær
Guðrún Vala Elísdóttir, náms-
og starfsráðgjafi og Svava
Svavarsdóttir, skrifstofustjóri.
Inga Dóra segir vinnu við
námsvísi vera í fullum gangi
og sé hann óðum að taka á
sig mynd. Að venju verður í
námsframboði miðstöðvarinnar
af nógu að taka. „Við leggjum
nú aukna áherslu á lengri
námsleiðir, en einnig bjóðum
við upp á tungumálanámskeið,
tölvunámskeið, tómstunda-
námskeið, starfstengd
námskeið og síðan eru námskeið
varðandi mataræði og ýmis
sjálfsræktarnámskeið alltaf vinsæl,“
segir Inga Dóra.
Símenntunarmiðstöðin á
Vesturlandi hefur nú þegar haft
Landnemaskólann í þrjú skipti,
grunnnám skólaliða í þrjú skipti,
grunnnám fyrir byggingaliða í eitt
skipti og námskeiðið Aftur í nám var
sl. haust. Alls hafa 107 einstaklingar
lokið þessum námsleiðum. „Þetta er
í það minnsta góð byrjun og þörfin
er svo sannarlega fyrir hendi,“ segir
Inga Dóra, og bætir við: „Þessar
tölur sýna að svo sé og auðvitað
hvetur þetta okkur hjá Símenntun
að gera enn betur og verða við
óskum íbúa á Vesturlandi um
fjölbreytt námstækifæri sem henta
þeim. Við munum einnig bæta við
tveimur námsleiðum til viðbótar
við þær sem eru taldar hér að ofan.
Annars vegar verður boðið upp á
Grunnmenntaskóla á Snæfellsnesi
sem er 300 kennslustunda
n á m
og er stærsta
námsleiðin sem við bjóðum upp á
nú á haustönn. Einnig bjóðum við
upp á námsleið sem nefnist Skref
til sjálfshjálpar í lestri og ritun og
er markmiðið að styrkja lestrar- og
ritunarhæfni og auka þar með hæfni
til starfs og áframhaldandi náms.
Við leggjum mikla áherslu á að ná
til fólks með lesblindu eða einhvers
konar lestrar- og riterfiðleika.
Lesblinda er mun algengari en við
gerum okkur grein fyrir og það eru
til ýmsar leiðir til að leiðbeina fólki til
sjálfshjálpar.“ Inga Dóra segist vilja
bæta við að Símenntunarmiðstöðin
sé í samstarfi við Háskólann á Bifröst
og bjóði upp á námskeið sem nefnist
Upplýsingatækni og bókhald. Það
er 60 kennslustundanám og kennt í
gegnum svokallaðan námsskjá. Þetta
námskeið var í boði á síðustu vorönn
og gaf það góða raun.
Líkt og áður verður boðið upp á
íslensku fyrir útlendinga
sem hafa verið duglegir
að sækja þau námskeið.
Á síðustu önn voru
námskeiðin niðurgreidd
að stórum hluta af
ríkinu og það sama á
við nú. Að meðaltali
hafa 100 manns sótt
þessi námskeið á
Vesturlandi, síðustu
sex ár. Útlendingum
hefur fjölgað ört á
Vesturlandi og þar af
leiðandi hefur þörfin
aukist verulega á
fræðslu um málefni
i n n f l y t j e n d a
og þá sérstaklega fyrir
starfsfólk fyrirtækja og stofnana.
Því ákváðu stjórnendur
Símenntunarstöðvarinnar að fara í
samstarf við Alþjóðahúsið og bjóða
upp á þrenns konar námskeið er
varða málefni innflytjenda. „Ég hvet
Vestlendinga til að afla sér upplýsinga
um það sem Símenntunarmiðstöðin
býður upp á í haust og skrá sig til
þátttöku sem fyrst. Námsvísirinn
fer í dreifingu þriðjudaginn 4.
september, en við setjum námskeiðin
einnig á vefinn: www.simenntun.is,“
sagði Inga Dóra að lokum.
bgk
Háskólarnir og símenntun á Vesturlandi
Háskólinn á Bifröst:
Nýjar námsleiðir og útibú meðal
nýjunga í þúsund manna skóla
Starfsmenn S
ímenntunarst
öðvar Vesturla
nds
Símenntunarstöðin á Vesturlandi:
Lengri námsleiðir en áður verða
í boði í haust
Landbúnaðarháskóli Íslands á
Hvanneyri:
Fjölbreytt nám í boði
­ ný braut í hestafræðum
hefst í haust