Frjáls verslun - 01.08.2010, Page 47

F R J Á L S V E R S L U N • 8 . - 9 . T B L . 2 0 1 0 47
Hvenær telur þú að fjárhagslegri
endurskipulagningu fyrirtækja ljúki og
þau geti byrjað að fjárfesta aftur?
Þetta hefur því miður tekið mun
lengri tíma en við gerðum ráð fyrir
en okkur finnst að nú séu viðhorf að
breytast þannig að á vordögum 2011
ætti fjárhagslegri endurskipulagningu
fyrirtækja að vera að mestu lokið.
Ákvarðanafælni hefur undanfarna mánuði
víða verið áberandi og er að mínu mati
ein meginorsök þess hve langan tíma
þetta hefur tekið.
Finnur þú á meðal viðskiptavina
þinna að þeir fái ekki nægilega
fyrirgreiðslu í bönkum?
Það er nokkuð kvartað undan
hægagangi í samskiptum við
bankana og þá frekar yfir því að mál
fái ekki afgreiðslu og ekki séu teknar
ákvarðanir. Vandamálin hér eru
nátengd svari við spurningu eitt.
Finnur fyrirtæki þitt beint fyrir því að
gjaldeyrishöftin trufli starfsemi þess?
Rekstur KPMG er að litlu leyti háður
gjaldeyrisviðskiptum þannig að
gjaldeyrishöftin hafa engin teljandi áhrif á
rekstur félagsins.
Er fyrirtæki þitt í samkeppni við
fyrirtæki í eigu banka eða kröfuhafa?
KPMG er ekki í samkeppni við fyrirtæki
í eigu þessara aðila. Hins vegar erum
við í beinni samkeppni við bankana
sjálfa um ýmiss konar aðra þjónustu en
endurskoðun.
Hvaða áhrif hefði það á starfsemi
fyrirtækis þíns ef Íslendingar gerðust
aðilar að Evrópusambandinu?
Aðild að Evrópusambandinu hefði engin
veruleg áhrif á rekstur KPMG. Komi til
aðildar munum við aðstoða viðskiptavini
okkar við aðlögun eftir þörfum en Ísland
hefur hins vegar nú þegar innleitt megnið
af regluverki Evrópusambandsins.
Hyggst fyrirtæki þitt bæta við sig fólki á
næstunni?
Við höfum verið að bæta við okkur fólki
að undanförnu og ég geri ráð fyrir að sú
þróun haldi áfram. Þessi þróun fer samt
mikið eftir því hvernig gengur að ljúka
endurskipulagningu íslensks atvinnulífs.
Ertu hlynntur því að festa vísitöluna í
öllum lánasamningum og kippa þannig
verðtryggingunni úr sambandi?
Það gleymist stundum að það eru ekki
bara útlán sem eru verðtryggð heldur
líka fjármögnun bankanna. Ef taka á
verðtryggingu úr sambandi í því skyni
að lækka skuldir þá þarf að finna þann
sem á að borga þessa lækkun. Þetta er
um margt hliðstætt almennri niðurfærslu
skulda sem hefur verið rædd en strandar á
því að enginn vill borga.
Ef þú yrðir forsætisráðherra í einn
dag; hvert yrði þitt fyrsta verk?
Það að reyna að ná sáttum í
þjóðfélaginu og fá fólkið í landinu
til að hætta að horfa svona mikið
í baksýnisspegilinn en horfa þess
í stað fram á veginn. Sú reiði sem
hefur verið áberandi í samfélaginu er
skiljanleg en hún ein og sér leiðir ekki
til endurreisnar efnahagslífsins. Við
viljum rækta hér blómlegt mannlíf, drifið
áfram af bjartsýnu fólki, og til þess þarf
svo margt annað en peninga.
Viðskiptalífið yrði betra ef …
… ekki væru gjaldeyrishöft, bankarnir ættu
ekki fyrirtæki sem væru í samkeppni á
almennum markaði og að skattlagningu
á atvinnulífið og rekstur væri í hóf stillt og
hún betur útfærð. Þá er skattlagning á
einstaklinga orðin það mikil að hún hlýtur
að koma niður á viðskiptalífinu vegna
minni einkaneyslu.
Sigurður Jónsson,
framkvæmdastjóri KPMG á Íslandi.
Við höfum verið að
bæta við okkur fólki
SIGURÐUR JÓNSSON
framkvæmdastjóri KPMG á Íslandi
Ákvarðanafælni
áberandi