Frjáls verslun - 01.08.2010, Qupperneq 48

48 F R J Á L S V E R S L U N • 8 . - 9 . T B L . 2 0 1 0
Hvenær telur þú að fjárhagslegri
endurskipulagningu fyrirtækja ljúki
og þau geti byrjað að fjárfesta
aftur?
Ég tel að enn sé eitthvað í land með
að fjárhagslegri endurskipulagningu
ljúki. Enn eru ýmis mál ófrágengin,
s.s. varðandi gengistryggð lán,
og fjöldi málsókna í farvegi eða í
farvatninu. Afar mikilvægt er fyrir
efnahagslífið að þessum málum sé
hraðað.
Finnur þú á meðal viðskiptavina þinna
að þeir fái ekki nægilega fyrirgreiðslu í
bönkum?
Ég hef heyrt marga kvarta yfir seinagangi
bankanna í úrlausnum ákveðinna mála,
hræðslu við að taka ákvarðanir og að
einföldustu málum sé vísað til dómstóla
til úrlausnar. Þetta kostar mikinn
tíma og peninga og seinkar þar með
endurreisninni.
Finnur fyrirtæki þitt beint fyrir því að
gjaldeyrishöftin trufli starfsemi þess?
Gjaldeyrishöftin hafa áhrif á okkar
starfsemi. Við höfum á undanförnum árum
boðið upp á breiða vörulínu erlendra sjóða
fyrir viðskiptavini okkar en getum það
ekki á meðan gjaldeyrishöftin eru við lýði.
Þau fækka því þeim fjárfestingarkostum
sem sparifjáreigendur hafa úr að velja.
Óvissa um afnám þeirra hefur einnig
valdið miklum sveiflum á verði íslenskra
ríkisskuldabréfa.
Er fyrirtæki þitt í samkeppni við
fyrirtæki í eigu banka eða kröfuhafa?
Já við erum aðallega í samkeppni við
fjármálafyrirtæki sem eru ýmist í eigu
ríkisins eða kröfuhafa.
Hvaða áhrif hefði það á starfsemi
fyrirtækis þíns ef Íslendingar gerðust
aðilar að Evrópusambandinu?
Það er erfitt að fullyrða um það að svo
stöddu en fyrirfram hef ég ekki trú á því að
það hefði mikil áhrif á starfsemi Íslenskra
verðbréfa.
Hyggst fyrirtæki þitt bæta við sig fólki á
næstunni?
Frá hruni fjármálakerfisins hefur starfsfólki
félagsins fjölgað um 20% vegna aukinna
umsvifa. Ef fram heldur sem horfir er
líklegra en ella að við bætum við okkur á
næstu mánuðum þótt ekkert liggi fyrir í
þeim efnum.
Ertu hlynntur því að festa vísitöluna í
öllum lánasamningum og kippa þannig
verðtryggingunni úr sambandi?
Slík aðgerð er að mínu mati
illframkvæmanleg og hefði gríðarleg
áhrif á kerfið í heild. Menn hafa
notað verðtrygginguna sem forsendu
í samningsgerð í langan tíma og
slíkum forsendum er flókið að breyta
eftir á. Jafnvel spurning hvort það
stæðist lög. Forgangsmál er að ná
vaxtastiginu niður til frambúðar. Til
lengri tíma litið væri æskilegt að
draga úr vægi verðtryggingar.
Ef þú yrðir forsætisráðherra í einn dag;
hvert yrði þitt fyrsta verk?
Það eru mörg verkefni sem bíða úrlausnar
en sennilega fá þeirra sem hægt væri að
afgreiða á einum degi. Forsætisráðherra
hefur einnig takmörkuð völd einn og
sér. Brýnasta verkefnið er endurreisn
íslensks atvinnulífs og skuldavandi
heimilanna og þau verkefni ættu að vera
forgangsverkefni.
Viðskiptalífið yrði betra ef …
… horft væri minna í baksýnisspegilinn
í leit að blórabögglum og í meira mæli
fram á veginn með það að markmiði að
bjarga fólki og fyrirtækjum. Einnig má
nefna að öll umræða í þjóðfélaginu snýr
að því neikvæða en lítill áhugi er á því
jákvæða. Umræða á þeim nótum hefur
ekki uppbyggjandi áhrif.
Sævar Helgason,
framkvæmdastjóri Íslenskra verðbréfa.
Umræðan snýr að því
neikvæða en lítill áhugi
er á því jákvæða
SÆVAR HELGASON
framkvæmdastjóri Íslenskra verðbréfa
Forgangsmál
að ná vöxtum
niður