Frjáls verslun - 01.08.2010, Qupperneq 49

F R J Á L S V E R S L U N • 8 . - 9 . T B L . 2 0 1 0 49
Hvenær telur þú að fjárhagslegri
endurskipulagningu fyrirtækja ljúki og
þau geti byrjað að fjárfesta aftur?
Fjárhagslegri endurskipulangingu
fyrirtækja miðar allt of hægt og gæti
tekið mörg ár til viðbótar ef áfram verður
haldið á málum eins og verið hefur.
Finnur þú á meðal viðskiptavina þinna
að þeir fái ekki nægilega fyrirgreiðslu
í bönkum?
Já, við finnum m.a. fyrir því að við-
skiptavinir okkar í innflutningi eiga erfitt
með að fá fyrirgreiðslu og lán til vöru-
kaupa að utan.
Finnur fyrirtæki þitt beint fyrir því að
gjaldeyrishöftin trufli starfsemi þess?
Nei það gerum við ekki þar sem stór
hluti veltu okkar kemur að utan og við
höfum greiðan aðgang að þeim gjaldeyri
sem við þurfum til rekstrarins.
Er fyrirtæki þitt í samkeppni við
fyrirtæki í eigu banka eða kröfuhafa?
Já að vissu leyti. Almennt er það mjög
óheppilegt að fyrirtæki séu til langs tíma
í eigu banka og að endurskipulagning
fyrirtækja sé ekki gegnsæ því það getur
skaðað samkeppnisstöðuna og skapað
óvissu.
Hvaða áhrif hefði það á starfsemi
fyrirtækis þíns ef Íslendingar gerðust
aðilar að Evrópusambandinu?
Það hefði eflaust minni áhrif á okkur en
önnur íslensk fyrirtæki þar sem tekjur
okkar eru að helmingi frá öðrum löndum í
erlendri mynt og uppgjör okkar er í evrum.
Hyggst fyrirtæki þitt bæta við sig fólki á
næstunni?
Við teljum að því miður stefni í ákveðna
stöðnun efnahagslífsins næstu tvö árin.
Fari sem horfir munum við líklega ekki
bæta við okkur fólki eða fækka. Það
er ljóst að framtíðarstefna stjórnvalda
mun hafa áhrif á okkur jafnt sem önnur
fyrirtæki og framvindu efnahagslífs hér á
landi.
Ertu hlynntur því að festa vísitöluna í
öllum lánasamningum og kippa þannig
verðtryggingunni úr sambandi?
Þetta er mjög erfitt mál að eiga við þar
sem margir aðilar með mismunandi
hagsmuni koma að borðinu. Vísitalan
er ekki aðalóvinurinn heldur er það
meira aðkallandi að laga og leiðrétta
uppbyggingu vísitölunnar, einfalda hana
og koma í veg fyrir óeðlilega víxlverkun
hennar.
Ef þú yrðir forsætisráðherra í einn dag;
hvert yrði þitt fyrsta verk?
Ég myndi hrinda af stað verkefninu
„Ísland endurreist“ á svipaðan hátt og
við endurreistum Eimskipafélag Íslands,
með skýrt markaða stefnu til framtíðar,
trúverðugleika, gegnsæi og jafna meðferð
allra aðila að leiðarljósi.
Viðskiptalífið yrði betra ef …
… afskipti ríkisins væru minni af
atvinnulífinu og framkvæmdum hins
opinbera væri flýtt. Ríkið stæði ekki í vegi
fyrir framkvæmdum og erlendri fjárfestingu
heldur hvetti þjóðina og fyrirtæki til dáða
og góðra verka.
Gylfi Sigfússon,
forstjóri Eimskipafélags Íslands.
Ríkið stendur í vegi
fyrir framkvæmdum
GYLFI SIGFÚSSON
forstjóri Eimskipafélags Íslands
Endur skipu lagning fyrir tækja
verður að vera gegnsæ