Frjáls verslun - 01.08.2010, Síða 60

60 F R J Á L S V E R S L U N • 8 . - 9 . T B L . 2 0 1 0
Hvenær telur þú að fjárhagslegri
endurskipulagningu fyrirtækja ljúki og
þau geti byrjað að fjárfesta aftur?
Það er afar brýnt fyrir atvinnulífið að
fyrirtækin komist út úr bönkunum sem
fyrst og sjái tækifæri í því að fjárfesta á ný.
Það er hins vegar engin leið að gera sér
grein fyrir því hvenær þessu lýkur enda
víst um 7.000 fyrirtæki sem bíða. En ég
vona að með tillögum sem komnar eru
fram hjá efnahags- og viðskiptaráðherra
skapist svigrúm til að ráðast í þetta verk
og leysa stærstan hluta vandans á fyrri
hluta næsta árs.
Finnur þú á meðal viðskiptavina þinna
að þeir fái ekki nægilega fyrirgreiðslu í
bönkum?
Já, bæði meðal viðskiptavina, sem eru
allir erlendir, og ekki síður á meðal þeirra
aðila sem þjónusta okkur hér heima. Ég
held að það sé ágætt fyrir okkur að muna
að fjármálakreppan var ekkert séríslenskt
fyrirbæri og hefur breytt ýmsu í viðskiptum
um allan heim. En íslensku fyrirtækin eru
flest hálflömuð hvað varðar nýfjárfestingar
vegna annaðhvort skuldavanda eða
þess að þau sem hafa fjárfestingagetu
halda samt að sér höndum vegna þess
að ástandið er enn ótryggt og litla
fyrirgreiðslu að hafa í bönkunum.
Finnur fyrirtæki þitt beint fyrir því að
gjaldeyrishöftin trufli starfsemi þess?
Við störfum vissulega eftir höftunum
og þannig séð finnum við ekki lengur
sérstaklega fyrir þeim. Hins vegar erum
við augljóslega að kaupa krónuna dýrar
en völ er á á alþjóðlegum markaði og
fyrir fyrirtæki sem er með alþjóðlega
gjaldeyrismiðlun þar sem hagstæðasta
verð á mynt er keypt hverju sinni – fyrir
náttúrlega utan íslensku krónuna – þá
vekur þetta athygli. Þetta er ástand
sem flestir þeir sem koma að þessum
viðskiptum að jafnaði hafa bara lesið um
í sögubókum en ekki kynnst, fyrr en nú, í
daglegum rekstri.
Er fyrirtæki þitt í samkeppni við
fyrirtæki í eigu banka eða kröfuhafa?
Nei.
Hvaða áhrif hefði það á starfsemi
fyrirtækis þíns ef Íslendingar gerðust
aðilar að Evrópusambandinu?
Kostnaður myndi aukast verulega þar sem
settir yrðu tollar á súrál sem og á flest ef
ekki öll íblöndunarefni sem notuð eru í
virðisaukandi framleiðslu.
Hyggst fyrirtæki þitt bæta við sig fólki á
næstunni?
Já. Við erum að fara að byggja nýja
verksmiðju, kerfóðrunarbyggingu, sem
mun kosta á fjórða milljarð, krefjast fjölda
starfa á byggingartíma næstu tvö árin og
um þrjátíu varanlegra starfa.
Ertu hlynntur því að festa vísitöluna í
öllum lánasamningum og kippa þannig
verðtryggingunni úr sambandi?
Ég hef ekki farið í saumana á þessu en
ég er ekki hlynntur því að skaða til lengri
tíma lífeyrissjóðakerfið okkar. Hvað sem
gert verður að vernda það til lengri tíma
litið. Ég er hins vegar fylgjandi því að við
notum fjárfestingagetu lífeyrissjóðanna
til að ráðast í arðbær gjaldeyrisskapandi
verkefni.
Ef þú yrðir forsætisráðherra í einn dag;
hvert yrði þitt fyrsta verk?
Ég myndi gera allt sem hægt væri til að
skapa hér skilyrði til að efla fjárfestingu
í landinu. Þar á ég ekki bara við að hér
verði byggt á stórum virkjanaverkefnum
eingöngu heldur líka einfalda skattkerfið
og koma á fót hvötum til þess að fyrirtæki
ráðist í fjárfestingar og þróunarverkefni.
Viðskiptalífið yrði betra ef …
… stöðugleiki væri fyrir hendi, reglur
skýrar og það væri ekki sjálfkrafa
tortryggilegt ef menn stunduðu
atvinnustarfsemi.
Tómas Már Sigurðsson, forstjóri Alcoa.
Fylgjandi því að
nota fjárfestinga­
getu lífeyris­
sjóðanna til að
ráðast í arðbær
verkefni
TÓMAS MÁR SIGURÐSSON
forstjóri Alcoa
Bygging nýrrar verksmiðju
krefst fjölda nýrra starfa