Húnavaka - 01.05.1997, Page 60

58
HUNAVAKA
Pusan í S-Kóreu til að sjá um skoðun á vélbúnaði og öðru í skipi sem
ákveðið hafði verið að kaupa. Var það í eigu Rússa og hafði verið á
krabbaveiðum á hafmu úti fyrir Kamchatka. Leist mér ekki vel á þessa
ferð þar sem ég var í miðju verki við endurbætur á rækjutogaranum. Það
varð þó úr að ég færi og var hugmyndin að ég yrði í viku og skoðaði vél-
búnaðinn, síðan kæmi ég heim en rússnesku vélstjórarnir, sem voru á
skipinu, áttu að sigla með til Islands.
Ætla ég nú að reyna með þessari grein að segja frá þessu ferðalagi og
því sem fyrir augu bar.
Sögðum bara „guðlaun“ að gömlum
og góðum íslenskum sið
Lagt var af stað frá Reykjavík árla morguns þann 9. desember. Fljúga átti
til Kaupmannahafnar, þaðan til Osaka í Japan og svo til Pusan. Ferðafé-
lagana þrjá hafði ég ekki séð fyrr en við lögðum af stað. Skulu þeir því
kynntir hér.
Skipstjórinn sem sigla átti skipinu til Islands heitir Sigurður Þorsteins-
son. Hann er þekktur fyrir það að kaupa gamalt varðskip, Albert og fara
með fjölskylduna út í heim á vit ævintýra. Var skrifuð bók um hans sögu
fyrir nokkrum árum.
Stýrimaðurinn heitir Sigurður Brynjólfsson, gamall togaraskipstjóri og
margreyndur í ýmsum raunum. Hér eftir nefndur Siggi Bryn. til aðgrein-
ingar.
Maðurinn sem sjá átti um kaupin á skipinu fyrir hönd útgerðar heitir
Einar Hermannsson. Ædaði hann ekki að sigla með skipinu heim.
Sá fjórði er svo greinarhöfundur sem taldi sig vera að fara í viku ferða-
lag þótt raunin yrði önnur. Var ég þar af leiðandi sá eini af áhöfn Arnars
sem fór í þessa ferð en aðrir af áhöfninni vildu af ýmsum ástæðum ekki
fara.
Þegar við millilentum á Kastrup þá var þriggja tíma bið eftir vélinni
tíl Osaka. Vildi Sigurður skipstjóri endilega að við borðuðum þarna rauð-
sprettu upp á danskan máta, það er með ekta heimatilbúnu remolaði og
tilbeyrandi. Reyndist þetta hið mesta lostæti.
Er við skráðum okkur inn kom í ljós að við höfðum verið settir á fyrsta
farrými sökum plássleysis. Vorum við fullkomlega sáttir við það þar sem
við áttum fyrir höndum 11 til 12 tíma flug til Osaka. Fólkið sem við flug-
um með var svo til allt Austurlandabúar. Lítið bar til tíðinda á leiðinni
og notuðu menn tímann til að spjalla saman, horfa á kvikmyndir og sofa.
I þessu flugi fórum við yfir 11 tímabelti og var tímamunur níu
klukkustundir.