Dagblaðið Vísir - DV - 20.09.2013, Blaðsíða 10

Án starfsleyfis
en fÁ milljónir
10 Fréttir 20.–22. september 2013 Helgarblað
n Mótomos hefur fengið ellefu milljónir frá bænum n Hafa starfað án leyfis frá 2008
Í
þróttafélagið Mótomos hefur feng­
ið 11,2 milljónir króna í styrki frá
Mosfellsbæ frá því árið 2009, án
þess að hafa leyfi fyrir starfseminni.
Styrkirnir voru meðal annars veitt­
ir til uppbyggingar akstursíþrótta­
svæðis félagsins á Leirvogstungumel­
um. Þetta kemur fram í gögnum sem
DV hefur undir höndum.
Formaður skipulagsráðs Mosfells­
bæjar sat í stjórn Mótomos og sótti um
starfsleyfi fyrir félagið árið 2009. Hann
segir ekkert athugavert við það að fé­
lag án starfsleyfis hafi fengið milljóna
styrki frá bænum. Svæðið hefur verið
starfrækt frá því í mars 2008 án þess þó
að fyrir því hafi fengist leyfi hjá heil­
brigðiseftirlitinu. Framkvæmdastjóri
Heilbrigðiseftirlits Kjósarsvæðis segir
bæjaryfirvöld í Mosfellsbæ ekki hafa
farið að leikreglum.
Íbúar á Kjalarnesi, sem búa í ná­
grenni svæðisins, hafa ítrekað kvart­
að formlega vegna hávaðamengun­
ar og óskað eftir því að starfsemin
verði lögð niður. Þá hafa bæjarfulltrú­
ar Íbúahreyfingarinnar í Mosfellsbæ
farið fram á að notkun brautarinnar
verði bönnuð. Meirihluti Sjálfstæðis­
manna hefur ekki orðið við slíkum
óskum en í skriflegu svari frá Haraldi
Sverrissyni, bæjarstjóra Mosfellsbæj­
ar, kemur fram að bráðlega verði far­
ið í frekari framkvæmdir á svæðinu.
Heimildarmönnum DV ber saman
um að málið sé áfellisdómur yfir
skipulagsmálum í Mosfellsbæ.
Fulltrúi Sjálfstæðisflokks sat í
stjórn Mótomos
Málið var tekið fyrir á fundi bæjar­
stjórnar Mosfellsbæjar þann 12. sept­
ember síðastliðinn. Bæjarfulltrúar
Íbúahreyfingarinnar lögðu fram bók­
un en þar kom fram að Skipulagsstofn­
un hefði gert alvarlegar athugasemdir
við akstursíþróttasvæðið, og að Mos­
fellsbær hefði ekki farið að lögum í
málinu. „Íbúahreyfingin leggur til að
öll notkun brautarinnar verði bönnuð
þegar í stað og ekki opnað aftur fyrr
en leyfi liggja fyrir og farið hefur verið
að lögum varðandi starfsemina.“ Þá er
það gagnrýnt í bókuninni að fulltrúi
Sjálfstæðisflokksins í bæjarráði sitji
jafnframt í stjórn Mótomos, og farið
fram á að gerð verði úttekt á styrkjum
til félagsins.
Elías Pétursson, fulltrúi
Sjálfstæðis flokksins í bæjarráði og
formaður skipulagsnefndar bæjar­
ins, segir rangt að hann sitji í stjórn
Mótomos. Hann hafi hins vegar setið
í stjórn Mótomos þegar hann sótti um
starfsleyfi fyrir hönd félagsins í janúar
2009, „og það var allt gert í samráði
við heilbrigðiseftirlitið.“ Hann segist
ekkert hafa komið nálægt stjórn fé­
lagsins eftir að hann tók að starfa í
skipulagsnefnd. Elías telur sig ekki
vanhæfan til þess að fjalla um málefni
Mótomos innan skipulagsnefndar,
þrátt fyrir að hafa setið í stjórn félags­
ins og sótt um starfsleyfið fyrir hönd
þess. „Það hefur verið borið upp á
mig að ég sé vanhæfur til þess að vera
formaður skipulagsnefndar og fjalla
um þetta mál,“ segir Elías. Sú gagn­
rýni standist hins vegar ekki nánari
skoðun, að hans mati, þar sem fólk úr
öllum flokkum hafi komið að félags­
málastörfum í bænum.
Bænum settir afarkostir
Heilbrigðiseftirlit Kjósarsvæðis
hefur allt frá árinu 2008 gert ítrek­
aðar athugasemdir við starfsemi
Mótomos, meðal annars vegna há­
vaðamengunar, sem samkvæmt út­
reikningum Verkfræðistofunnar Verk­
ís hf. er óásættanleg. Í minnisblaði
heilbrigðiseftirlitsins, sem dagsett er
26. júní 2013, kemur meðal annars
fram að starfsemin samræmist ekki
gildandi aðalskipulagi. Þá er lagt til að
Mosfellsbær láti framkvæma hljóð­
mælingar eins og bærinn hafði lofað
í sérstakri aðgerðaáætlun sem sett var
fram í janúar 2009. „Óskað er eftir við­
brögðum fyrir 1. október 2013.“
Í umsögn heilbrigðiseftirlitsins við
aðalskipulag Mosfellsbæjar frá því í
apríl 2013 kemur fram að ekki sé hægt
að afgreiða starfsleyfi fyrir starfsem­
ina þar sem hún sé ekki í samræmi
við skipulag, „umgengni þar er slæm
og talsverð rykmengun er frá svæðinu
þegar fínt efni úr brautum fýkur til.“ Þá
kemur einnig fram að svæðið liggi að
hluta til inni á hverfisvernduðu svæði
sem er í mikilli nálægð við eina bestu
laxveiðiá landsins.
Sakar eftirlitið um hörku
Formaður skipulagsnefndar, Elías
Pétursson, er afar gagnrýninn á fram­
ferði Heilbrigðiseftirlits Kjósarsvæðis
í þessu máli: „Heilbrigðiseftirlitið hef­
ur verið vægast sagt hart í öllum sam­
skiptum við þennan klúbb. Miklu
harðara heldur en það hefur verið við
önnur íþróttafélög eða aðra starfsemi
hér í Mosfellsbæ.“
Hann segir aðila innan bæjarfé­
lagsins hafa verið af öllum vilja gerð­
ir til þess að klára málið en aðal­
skipulagið hafi einfaldlega dregist.
„Menn töldu að ef starfsemin yrði
stöðvuð út af þessu, þá myndum við
einfaldlega eyðileggja íþróttafélagið.
Menn voru bara að reyna að gera það
besta úr vondri stöðu.“
Elías segir ekkert athugavert við
það að bærinn hafi veitt rúmum ell­
efu milljónum í félag sem starfar án
starfsleyfis. Fénu hafi verið varið í
uppbyggingu akstursíþróttasvæðis­
ins og til barna­ og unglingastarfs.
Málið snúist aðallega um skipulags­
mál sem hafi dregist af óviðráðanleg­
um orsökum. „Menn gerðu sér ekki
grein fyrir því að það þyrfti starfsleyfi
fyrir þessu.“
Fóru vægustu leiðina
Þorsteinn Narfason, framkvæmda­
stjóri Heilbrigðiseftirlits Kjósarsvæðis,
segir aldrei hafa leikið neinn vafa á
því að akstursíþróttasvæði af þessari
stærðargráðu væri starfsleyfisskylt.
„Bærinn fylgdi ekki alveg leikreglum
í þessu máli. Í rauninni hefði þetta
þurft nokkurra ára undirbúning,“
segir Þorsteinn í samtali við DV.
Aðspurður hvort heilbrigðis­
eftirlitið gangi of hart fram í þessu
máli segir Þorsteinn: „Okkur er nátt­
úrulega bara falið að starfa eftir þeirri
löggjöf sem er í gildi í landinu. Svona
starfsemi er starfsleyfisskyld og hún
er háð mati á umhverfisáhrifum.“ Slíkt
mat hafi ekki farið fram og því megi í
raun segja að Mosfellsbær hafi dreg­
ið lappirnar í málinu. „En við höfum
í sjálfu sér farið vægustu leiðina. Við
höfum ekki stoppað þetta þó að það
sé kannski ástæða til.“
Verja rétt íbúa
Heilbrigðiseftirlit Kjósarsvæðis fór
nýlega fram á að það yrðu gerðar
hljóðmælingar af starfseminni. „Við
eigum auðvitað að verja rétt íbúa
til þess að búa við viðunandi að­
stæður. Þess vegna höfum við sett
fókusinn á þessar hljóðmælingar,“
segir Þorsteinn. Þá segir hann ljóst að
það muni þurfa að byggja afar háar
hljóðmanir, allt upp í 21 metra á hæð,
til þess að koma í veg fyrir hávaða frá
svæðinu. Hvort það sé eitthvað sem
íbúar á svæðinu vilji, sé spurning sem
eðlilegt sé að spyrja.
Þann 2. september 2012 barst bæj­
arráði Mosfellsbæjar bréf frá íbúum
á Kjalarnesi þar sem kvartað var yfir
þeim hávaða sem fylgdi starfsemi
Mótomos, og lagt til að starfsemin yrði
lögð niður. Í svari bæjarráðs kom fram
að litið yrði á bréfið sem athugasemd
við aðalskipulag. Engin áform væru
af hálfu bæjarins um að leggja starf­
semina af. Þá barst Heilbrigðiseftirliti
Kjósarsvæðis kvörtun frá húseiganda
á Kjalarnesi þann 4. júlí síðastliðinn
vegna hávaða og rykmengunar frá
Mótomos. Margir íbúar svæðisins eru
orðnir langþreyttir á ástandinu.
Ráðist í framkvæmdir
Svo virðist sem ítrekaðar athugasemd­
ir íbúa og heilbrigðis eftirlitsins muni
engu breyta um fyrirætlanir bæjar­
stjórnar Mosfellsbæjar. Í skriflegu
svari við fyrirspurn DV segir Haraldur
Sverrisson, bæjarstjóri Mosfellsbæjar,
að þegar hafi verið gerður samningur
við Mótomos sem geri ráð fyrir því að
bærinn sjái félaginu fyrir landi.
Áætlanir um akstursíþróttasvæði
á Leirvogstungumelum haldi: „Ný­
samþykkt aðalskipulag Mosfellsbæj­
ar gerir ráð fyrir akstursíþróttasvæði
á Leirvogstungumelum þar sem
Mótomos er með starfsemi í dag. Á
grundvelli þessa aðalskipulags hef­
ur skipulagsnefnd hafið vinnu við
gerð deiliskipulags á svæðinu þar
sem fjallað verður um nauðsynlegar
mótvægis aðgerðir s.s. hljóðvarnir
og sett ákvæði þar að lútandi. Þegar
þessari vinnu lýkur verður hægt að
ráðast í framkvæmdir á svæðinu sem
varða þessa þætti.“
Nú þegar hefur Mosfellsbær varið
10,5 milljónum í framkvæmdir við
svæðið. Í svari bæjarstjórans kemur
ekki fram hversu miklum fjármunum
til viðbótar verður varið í upp­
byggingu. n
Ítrekaðar kvartanir Haraldur Sverrisson,
bæjarstjóri Mosfellsbæjar, segir að farið
verði í frekari framkvæmdir á næstunni,
þrátt fyrir ítrekaðar kvartanir íbúa og
athugasemdir frá heilbrigðiseftirlitinu.
Fóru ekki að leikreglum Þorsteinn
Narfason, framkvæmdastjóri Heilbrigðis-
eftirlits Kjósarsvæðis, segir bæjaryfirvöld
ekki hafa farið að leikreglum.
Segist ekki vanhæfur Elías Pétursson,
formaður skipulagsnefndar Mosfellsbæjar,
sat í stjórn Mótomos og sótti um starfsleyfi
fyrir félagið. Hann segist ekki vera vanhæfur
til þess að fjalla um málefni Mótomos.
„Menn gerðu sér
ekki grein fyrir því
að það þyrfti starfsleyfi
fyrir þessu.
Jón Bjarki Magnússon
blaðamaður skrifar jonbjarki@dv.is
Ekkert leyfi Akstursíþróttasvæði Mótomos að Leirvogstungumelum hefur verið starfandi frá því 2008 án þess þó að fengist hafi leyfi fyrir
starfseminni. Mynd SigtRygguR ARi