Lögmannablaðið - 01.03.2005, Blaðsíða 4
4 1 / 2 0 0 5
FRÁ RITSTJÓRN
Það vakti athygli ritstjórans aðá Alþingi var nýlega lögð
fram þingsályktunartillaga um
frjálslegri klæðnað alþingis-
manna í þingsal og um ávarps-
venjur.
Athyglisvert er að skoða
greinargerðina sem fylgdi þessu
„þjóðþrifamáli“. Af henni má
ráða að eini tilgangurinn með til-
lögunni sé sá að þingmönnum verði gert
„…kleift að klæðast alþýðlega í þingsal og
um leið að færa venjur um klæðnað þing-
manna til nútímalegra horfs.“ Til frekari
skýringa er svo greint frá því að á danska
þinginu „…séu venjur og hefðir hvað þetta
varðar með nútímalegri hætti.“
Af lestri greinargerðarinnar verður ekki
annað ráðið en flutningsmennirnir telji að
núverandi klæðnaður þingmanna sé bæði
óalþýðulegur og gamaldags, að auki séu
íslensku þingmennirnir púkalegir miðað við
danska starfsbræður sína. Eða hvað? Í
greinargerðinni er hvergi vikið að því
hvaða reglur eru í gildi varðandi klæðnað
þingmanna né útskýrt hvað megi teljast
alþýðlegur og nútímalegur klæðnaður eða
hvaða nútímalegu hefðir og venjur gildi á
danska þinginu. Hefði verið forvitnilegt að
sjá nánari útskýringar og rökstuðning með
tillögunni.
Þá telja flutningsmenn tillögunnar að
ræðutími þingmanna muni nýtast mun betur
með því að leggja af þann sið að ávarpa
ráðherra og aðra þingmenn með orðunum;
„Háttvirtur“, „Hæstvirtur“.
Vonar ritstjórinn að lögmenn
fari ekki að krefjast breytinga í
sömu átt í málflutningi fyrir
dómstólum.
Meðal efnis í blaðinu er grein
eftir Helga Jóhannesson hrl. um
hagsmunaárekstur og trúverðug-
leika lögmanna. Grein þessi er
tímabær þar sem svo virðist sem
aðrir aðilar en lögmenn séu í
auknum mæli farnir að teygja sig lengra inn
á hagsmunagæslu fyrir þriðja aðila. Hættan
hér er sú að með slíkri hagsmunagæslu telji
viðskiptavinur sig vera að kaupa lögmanns-
þjónustu með þeirri ábyrgð sem fylgir skv.
lögum um lögmenn og siðareglum lög-
manna eða að viðkomandi aðili sé sérfræð-
ingur á því sviði sem hann gefur sig út fyrir
að vera. Raunin er auðvitað allt önnur.
Ritnefnd stóð nýlega fyrir hringborðsum-
ræðum með fjórum lögmönnum um breyt-
ingar sem eru að verða á rekstrarformi lög-
mannsstofa og framtíð einyrkjans. Um þær
umræður er fjallað í blaðinu og er stefnt að
því að halda frekari hringborðsumræður um
hugðarefni lögmanna í framtíðinni.
Hjá félaginu eru tveir viðburðir fram-
undan, aðalfundur þann 11. mars og svo
árshátíðin þann 12. mars. Eru félagsmenn
hvattir til þess að fjölmenna á hvoru tveggja
enda hefur mæting á aðalfund verið dræm
fram að þessu. Ritstjóri vonast til þess að
lögmenn sjái sér fært að mæta og haldi sig
við þann óalþýðlega og gamaldags klæða-
burð sem sumum þingmönnum finnst
íþyngjandi við störf sín.
Guðrún Björg
Birgisdóttir
hdl.